Ifyacitilwe 10
10
1Eko ali kuKaisalia umbi umuntu, isina lyakwe niKonelyo, icilolo cafita umwanda, iceŵumba ilyailicilwe ati Liŵumba lyaŵalialya; 2umuntu utekenye, uwalukutina ŵaLesa pamo neŵamuŋanda yakwe ŵonse, uwalukupe'fyakupa lukoso ifinji kuŵantu, nekulukutembela kuli ŵaLesa insiku syonse. 3Uyo alibwene mukuŵoneka apaswetele, pampindi yakuteyama'kasuŵa, Iŋkalamba yaŵaLesa ilukwinjila umwali ye, nekulaŵila kuli ye ati: Konelyo! 4Naye nekwitontomeka, nekuŵa nemwenso, nekulaŵila ati: Nindo, Sikulu? Nayo yalilaŵile kuli ye ati: Ukutembela koŵe nefyakupa fyoŵe fyafika kwiulu mukuŵeŵucisya ŵaLesa. 5Pano lomba utume aŵantu kuJopa, mukuleta umuntu, isina lyakwe niSimoni, limbi nalyo niPetilo. 6Alukwikala pamo naumbi Simoni umunyucisi; iŋanda yakwe ili pambali yacisiŵa. 7Peŋka'po, pakukumbuluka iŋkalambe'vo iyalaŵile nakwe, aliŵetile aŵapyunjisi ŵakwe ŵaŵili nemusilikani utekenye uwapeŵumba lyaŵaŵo aŵalukumutinamina insiku syonse; 8popele, pakuŵaŵulisisya fyonse, aliŵatumine kuJopa.
9Ŋgamailo, ili ŵenda nekupalamina kumusi, Petilo alininine peulu pananda mukutembela, akasuŵa pakati keulu. 10Naye aliumfwile insala, nekufwayo' kulya; sombi, ili ŵacansika, alilesucile; 11peŋka alibwene kwi ulu kwalekana, necintu cimbi cilukuseluka, koti ninsalu ikulu, ilukutulwa pansi mumikoŋko ine. 12Mukati kacico mwali imikoka yonse yanama isyenda kumolu ane, nefiloŋgolo fyapansi, nefyuni fyamwiulu. 13Elyo lyaisile kuli ye isiwi ati: Ŵuka, Petilo, wipaye, ulye! 14Sombi Petilo ati: Koku mweŵaSikulu, pakuti nsiŋgalyapo neli limo ifintu ifinaŋgwa ifiŵipile. 15Nalyo lyaliisile kuli ye liŵili isiwi ati: Ifyo ifi ŵaswesya ŵaLesa, tekufieŵa weŵo ati finaŋgwa. 16Kaŵili ifyo fyalicitilwe litatu; popele icintu ico calipokelwe bwaŋgu kwiulu.
17Lomba, pakulukukaŋkamana Petilo mumutima wakwe, ati mbokuŵoneka uku naŵona kwasyani; kusaŋga aŵantu aŵo aŵatuminwe kuli Konelyo, pakwipusyansyanya ifyananda yakwe Simoni, ŵaliimakene pamulyaŋgo, 18nekwita nekwipusya ati: Kani Simoni uwilicilwe ati niPetilo, emo ekala muno? 19Popele, ili acilaŋguluka Petilo ifyakuŵoneka uko, Umupasi walilaŵile kuli ye ati: Ŵona, aŵantu ŵatatu ŵalukukufwaya. 20Sombi ima, useluke, ulukuya naŵo, wikanaika, pakuti nineŵo naŵatuma! 21Naye Petilo aliselucile kuŵantu aŵo, nekulaŵila ati: Ŵoneni, neŵo enewoyo uyu mulukufwaya: mbanindo mwaisila? 22Naŵo ati: Konelyo, icilolo cafita umwanda, umuntu uluŋgeme, utonda ŵaLesa, uwampupo isiweme isyakumukoka waŵaJuda ŵonse, walicenjesiwe kuŋkalamba iswetelele ati atume aŵantu mukumwitileni kunanda yakwe, nekumfwa amasiwi kuli mweŵo. 23Fyopele'fyo aliŵenjisye, nekuwalaŋga umwakulala.
Ŋgamailo aliimine nekuya naŵo; neŵakwaŵo ŵambi aŵakuJopa aliile naŵo. 24Ka ŵili ŋgamailo ŵaliinjile muKaisalia; naKonelyo naye kale awuŋgenye aŵakwaŵo nefiŵusa fyakwe, nekuŵapembelela. 25Peŋka, pakwinjila Petilo, Konelyo alimucinsisye, nekuwila pansi muceni cakwe, nekumucindika. 26Sombi Petilo alimwimicili, nekulaŵila ati: Ima; naneŵo ndi muntunsi! 27Lomba, ili acambala nakwe, aliinjile nekuŵona aŵantu aŵenji ŵaŵuŋgana; 28nekulaŵila kuli ŵo ati: Mweŵo mweŵene muliisi ati tafyelelwe umuJuda ukukumaŋkana neli kwinjila mumuntu wamukoka umbi; sombi ŵaLesa ŵalimbwenesye ati tekwelelwa neŵo ukwilika aŵantu ŵonse neli umo ati ŵalukoso neli ati ŵaŵipile. 29Pakuti pali fyefyo ndiisile uwakuwulo'kuleŋgulula, pakwitwa. Popele ndukwipusya ati: Nindo mwanjitile? 30Naye Konelyo ati: Syapita insiku sitatu, ukupendela kumpindi ino, ati nalukutembela muŋanda yanji, pampindi yakuteyama'kasuŵa; lomba kusaŋga nikumuntu uwafwite ifyakufwala ifisasamucile aliimakene pamenso anji, 31nekulaŵila ati: Konelyo, ukutembela koŵe kwaumfwanika, nefyakupa fyoŵe fyalaŋgulukwa pamenso aŵaLesa. 32Lomba utume aŵantu kujopa, mukumwita Simoni, uwilicilwe ati niPetilo; alukwikala muŋanda yakwe Simoni umunyu cisi, pambali yacisiŵa. 33Pakuti pali fyefyo kampulilila ukutuma aŵantu kuli mweŵo; lomba mwacita bwino, pakuti mwaisa. Fwense lomba tuli pano pamenso a ŵaLesa, mukumfwa fyonse'fyo ifi ŵamuŵulileni ŵaSikulu. 34Telyo Petilo aŋgaasuka, nekulaŵila ati:
Icinenene naŵona ati ŵaLesa taŵali nemusalululo paŵantu; 35sombi mumikoka yaŵantu yonse, uyo ulukuŵatonda, nekulukucite'filuŋgeme, nimpokelo kuli ŵo. 36Isiwi ilyo ili ŵatumine kuŵaIsilaeli, ilyakutulisya leeŵo leiweme icaŵutende icakuli ŵaYesu Klistu (aŵo eŵaSikulu ŵafintu fyonse), 37isiwi ilyo mweŵo mweŵene muliliisi, ilyatulicile monse mucalo caŵena-Juda, ukutatika kuGalili, ili atulisisye Yoane ukuŵatisya kwakwe; 38ifyaŵaYesu ŵakuNasaleti, ati ŵaLesa ŵaliŵasufisye neMupasi Uswetelele nemakosa; aŵalukupitana ili ŵacite'fiweme, nekulukuŵusya ŵonse aŵakululucile kumusensesi, pakuti ŵaLesa ŵali naŵo. 39Nafweŵo tuli nimboni syafintu fyonse ifi ŵacitile mucalo caŵaJuda namuJelusalemi; aŵo aŵa ŵaipeye kaŵili, ili ŵaŵatalicile pamuti. 40Aŵo ŵaLesa eŵaŵaŵusisye pansiku sitatu, nekusumina ati ŵaŵoneke, 41tekuŵantu ŵonse, sombi kumboni isyo isyasalulwilwe akale kuli ŵaLesa, ekuli fweŵo, fwetwalile nekunwa naŵo, pakuŵuka ŵo paŵafwile. 42Popele ŵalitufundile ati tutulisye kuŵantu, nekusimika ati aŵa eŵaŵo aŵasalulwilwe kuli ŵaLesa ukwikala ŵakusololwela-mo aŵalaŵi neŵafwile. 43Aŵo aŵakusimika ŵonse ŵalisimicile ati mwisina lyaŵo aŵantu ŵonse ulukupema-mo muli ŵo akapoka ukulekelela kwakuŵifya.
44Lomba, ili acilaŵila amasiwi ayo Petilo, Umupasi Uswetelele waliponene pali ŵaŵo ŵonse aŵaumfwile lsiwi. 45Naŵaŵo aŵakopwelwe aŵalukucetekela, ŵonse aŵaisile nakwe Petilo, ŵalikaŋkamene, pakuti impese yaMupasi Uswetelele yaliitilwe napaŵenafyalo. 46Pakuti ŵaliŵomfwile ŵalukulaŵila nemini, nekulukulemya ŵaLesa. Kumfwa Petilo kaasuka ati: 47Kani kuli uwakukanya amenda ati aŵa tekuŵatisiwa, aŵapokele Umupasi Uswetelele pamo nafweŵo? 48Naye aliŵaŵulile ati ŵaŵatisiwe mwisina lyaŵaYesu Klistu. Popele apo ŵalimukombetele ati ekale nasimbi insiku.
Currently Selected:
Ifyacitilwe 10: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
