Ifyacitilwe 3
3
1Popele apo Petilo na Yoane ŵaliile kwitempuli pampindi yakutembela, pakuteyama'kasuŵa. 2Popele aŵantu ŵalimupintile umbi umuntu icilema, icafyelwe neŵulema, wopele ŵalukumulalika insiku syonse kumulyaŋgo wetempuli, isina lyauo Mulyaŋgo Uweme, mukulomba-lomba ifyalukoso kuli ŵaŵo aŵalukwinjila mwitempuli. 3Uyo, pakuŵona Petilo naYoane ŵalukwinjila mwitempuli, aliŵalombele ifyalukoso. 4Popele Petilo, ili amutontomekesye pamo naYoane, alilaŵile ati: Ŋgotutontomeke. 5Popele aliŵomfwile, pakuti pakucetekela ati naku poka akantu kuli ŵo. 6Sombi Petilo alilaŵile ati: Neli lisilifa neli ligolide nsikwete-po neli panini; sombi ico ici ndi naco ndukukupela. Mwisina lyaŵaYesu Klistu, aŵakuNasaleti, ulukwenda!
7Peŋka alimwikete kukuŵoko ukwalwine, nekumwimya; popele amakasa akwe nemafupa amutupokoso twakwe nekupulililo'kukosa. 8Naye alicilucile, nekwimakana, nekutatiko'kwenda; popele aliinjile naŵo mwitempuli, ili enda nekusotoka nekuŵalemya ŵaLesa. 9Popele aŵantu ŵonse ŵalimubwene alukwenda nekulukuwacindika ŵaLesa. 10Naŵo ŵalimwisiŵile ati niwoyo wopele uwalukwikala ukulukulomba-lomba ifyalukoso kuMulyaŋgo Uweme uwamwitempuli. Lomba ŵalikaŋkamene lukoso ukwakuti pakuti pali fyefyo ifyacitilwe kuli ye.
11Peŋka'po, ili aŵekatisye Petilo naYoane uyo-muntu, aŵantu ŵonse ŵaliŵutucile ukuwuŋgana pamo kuli ŵo mumulyaŋgo uwailicilwe ati wakwe Solomoni, nekulukukaŋkamana ukwakuti. 12Naye Petilo, pakuŵone'fyo, aliŵaasucile aŵantu ati: Mwewantu, mweŵaIsilaeli, mbanindo mulukukaŋkamanina pali wuyu-muntu? Kaŵili mbanindo mulukututontomekela fweŵo, koti kweŵa ati amakosa esu neli kupala-ŵaLesakwesu ekwamupelo'kwenda? 13ŴaLesa ŵaŵaAblaamu naIsaci naYakobi, ŵaLesa ŵaŵawisifwe, eŵaŵalemesye ŵa Yesu Aŵapyunjisi ŵaŵo, aŵo aŵa mwaloŵele nekukana pamenso akwe Pilati, ili ati akaŵakakulule. 14Sombi mweŵo mwaliŵakene Aŵo Aŵaswetelele Awaluŋgeme, nekulomba ati tupoke akapondo. 15Eli mwaipeye Imfumu yaMweo, iyo ŵaŵusisye ŵaLesa pakati kaŵafwile; fwewo tuli nimboni syafyefyo. 16Popele, pakuti pakucetekela ukwamwisina lyaŵo, isina lyaŵo elyakosya uyu-muntu, uyu mwaŵona nekwisiŵa. Icine ukucetekela uko ukwamuli ŵo ekwamupelo'kukosa uku ukuweme pamenso enu mwense.
17Pano mweŵame, ndiisi ati mwalicitile'fyo, mweŵakuŵulo'kwisiŵa, nempemba syenu nasyo fyopele'fyo. 18Sombi ifintu ifyo ifi ŵasimicile ŵaLesa patunwa twaŵakusimika ŵonse, ati ŵaKlistu ŵaŵo ŵakasomenwa, fyopele'fyo efi ŵacitile. 19Pakuti pali fyefyo, lapileni, mwaluluke, ati ifyakuŵifya fyenu fisimaŋgane; fyopele'fyo sikese impindi syakukosa isyakufuma kuli ŵaSikulu; 20naŵo nekutuma ŵaKlistu, aŵo aŵasalulwilwe pakuti pali mweŵo, eŵaYesu: 21ŵopele ukwelelwa ati Iulu lipoke ili tasiŋgesa impindi syakubwesya ifintu fyonse, fyopele'fyo ifi ŵaLesa ŵalaŵile patunwa twaŵakusimika ŵaŵo aŵaswetelele aŵali-ko ukufuma nakumpindi yakuleŋgwa kwacalo.
22Mose icine alilaŵile ati: ŴaSikulu Lesa ŵakamupyanicileni uwakusimika uwakwiŵumba lyaŵakwaŵenu, upalene naneŵo; popele ifintu fyonse ifi akalukulaŵila kuli mweŵo, mukalukufiumfwa. 23Pakaŵa ati aŵantu ŵonse utakomfwa uwakusimika uyo akonalwa ono ono ukumufumya pakati kaŵantu. 24Icine neŵakusimika ŵonse ukutaticila kuli Samweli, naŵaŵo aŵakunuma yakwe, ŵonse aŵalaŵile, aŵo naŵo ŵalisimicile ifyansiku sino. 25Mweŵo muli ŵana ŵaŵakusimika, kaŵili muli ŵana ŵakulaya uko ukwalayene ŵaLesa naŵawisinwe, ili ŵalaŵile kuli Ablaamu ati: Muŵana ŵoŵe aŵantu aŵamisyoŵo yonse iya pansi pano emo ŵakasyucila. 26Kuli mweŵo tanje, ŵaLesa, ili ŵaŵaŵusisye Aŵapyunjisi ŵaŵo, eko ŵaŵatumine, mukumusyucisyeni, pakumwalululeni mweŵo mwense ukuleke'fyakuŵifya fyenu.
Currently Selected:
Ifyacitilwe 3: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
