Ifyacitilwe 2

1Peŋka, pakufika akasuŵa kewuŋgano lyaPentekosite, ŵonse ŵaliŵuŋgene pamo nemutima umo. 2Popele calipulilile ukufuma kwiulu icipupa koti kupupa kwacipupu icikulu, nekwisula muŋanda monse umo umu ŵaikele. 3Peŋka syalibwenekele kuli ŵo imini isilekenemo koti mulilo, nekwikala pali ŵo ŵonse. 4Naŵo ŵonse ŵaliiswile Umupasi Uswetelele, nekutatiko'kulawila nemini simbi, koti masiwi ayo aya walukuŵapela Umupasi.

5Sombi kwalukwikala kuJelusalemi aŵaJuda ŵambi, aŵantu awaluŋgeme, aŵafumine kumikoka yawantu yonse iyapansi pano. 6Peŋka'po, ili caumfwanicile icipupe'co, iŵumba lyaŵantu lyaliwuŋgene, nekukaŋkamikwe'kwakuti, pakuti aŵantu ŵonse ŵalukumfwa ati ŵalukulaŵila imilaka yesu. 7Naŵo ŵalikaŋkamicilwe nekukaŋkamanc'kwakuti, nekulaŵila ati: Ŵoneni, aŵa-ŵantu aŵa lukulaŵila kansi ŵonse taŵali ŵakuGalili? 8Mbasyani lomba tulukumfwa, fweŵo fweŵantu fwense, mumilaka yesu iyo iyi twafyalilwe-mo? 9AŵaPafya, neŵaMadai, neŵaElami, neŵalukwikala kuMesopotamya, nakucalo caŵena-Juda, nakuKapadoca, nakuPonto, nakuAsya, 10nakuFiluja, nakuPamfulya, nakucalo caIjipiti, nakumitala iyakuLibya isiŋgulucile Kulene, neŵalukulinsya awafumine kuLoma, neŵaJuda, neŵaalucile ŵaJuda, 11neŵakuCilete, neŵaAlabi; tulukumfwa ati ŵalukulaŵila mumilaka yesu ifyamilimo ikulu iyaŵaLesa. 12Popele ŵonse ŵalikaŋkamicilwe nekukaŋkamana, nekuŵulansyanya ati: Mbefi findo? 13Sombi ŵambi naŵo ŵalukuseka, nekulaŵila ati: Ŵaikuta imfaina isyaŵukumo.

14Sombi Petilo aliimakene pamo neŵaŵyakwe ikumi naumo, nekuŵilicisya kuli ŵo ati: Mweŵantu ŵamucalo caŵena-Juda, namweŵo mwense mwemwikala kuJelusalemi, fiisiŵeni ifi, mumfwisye amasiwi anji, 15Pakuti aŵantu aŵa taŵapendelwe, koti nififi ifi mulukweŵa, pakuti ŵukumo akasuŵa katuntumuka lukoso; 16sombi ifi nifyefyo ifyalaŵilwe kuli Joeli uwakusimika ati:

17ŴaLesa ŵalilaŵile ati: Pansiku syakupela-ko, pakaŵa'ti

Ŋketila-po Umupasi wanji paŵamunefu ŵonse;

Popele aŵana ŵenu aŵalalume neŵanakasi ŵakalukusimika,

Newasaŋkwa ŵenu ŵakalukuŵona ifyakuŵona,

Neŵacekulu ŵenu aŵalalume naŵo ŵakalukulota ifiloto;

18Icine napaŵapyunjisi ŵanji aŵalalume neŵanakasi

Ŋketila-po ifyaMupasi wanji pansiku isyo, naŵo ŵakalukusimika.

19Kaŵili ŋkalanjisya ifyakukaŋkamana mwiulu,

Netwisiŵilo pacalo capansi,

Imilopa nemulilo neŋkumbi yacusi.

20Akasuŵa kakaaluka nimfinsi,

Nemwensi nawo milopa,

Ili takaŋgesa akasuŵa kaŵaSikulu,

Ako akakulu akabwenekesye.

21Popele fikaŵa kuŵantu ŵonse ukalilila isina lyaŵaSikulu ati akapuluka.

22Mweŵantu, mweŵaIsilaeli, umfweni amasiwi aya: ŴaYesu ŵakuNasaleti, aŵantu aŵasuminwe kuli ŵaLesa pakuti pali mweŵo, nemilimo ikulu nefyakukaŋkamana netwisiŵilo, utu ŵacitile ŵaLesa naŵo pakati pali mweŵo; koti nifyopele'fyo ifi mŵisi mweŵene; 23aŵo ŵopele, ili ŵaposelwe kukufwaya ukwansicilwe nekwisiŵila limo kwaŵaLesa, mweŵo muminwe yaŵapupa mwaliŵatalicile, nekuŵepaya. 24Aŵo ŵaLesa eŵaŵaŵusisye, ili ŵakakulwile ukusomena kwamfwa; pakuti imfwa tayaisiŵile ukuŵekatisya. 25Pakuti Dafidi alilaŵile ifyaŵo ati:

Nalukuŵaŵona ŵaSikulu pamenso anji insiku syonse,

Pakuti ŵali kulwine lwanji, niiŋgesakutesiwa neŵo.

26Pakuti pali fyefyo umutima wanji walitemenwe,

Nelumini lwanji nalo nekulukusemba;

Nakaŵili umunefu wanji ukalukwikala nekucetekela:

27Pakuti tamukasya-po umupasi wanji muSyeoli,

Neli ku sumina ati Umuntu wenu Uswetelele aŵone ukuwola.

28Mwalinjisiŵisye insila syaMweo;

Mukanjisusya ukutemwa nemenso enu.

29Mweŵakwasu, ndiisi ukulaŵila bwino kuli mweŵo ifyakwe wisi fwe wakale Dafidi, ati alifwile, nekusikwa, necilende cakwe tucili naco naŵukumo. 30Pakuti ye wakusimika, nekwisiŵa ati ŵaLesa ŵalilayene nakwe necilapo ati: Paŵana aŵakufyalwa kuli weŵo, ŋkapyanika-po umbi mukwikala peteŵe lyoŵe. 31Popele ye, pakubwene'fyo limo, alilawile ifyakuŵuka kwaŵaKlistu, ati ukusiwa muSyeoli ŵawa, neli munefu waŵo ukuŵona ukuŵola, woyu. 32Aŵo-ŵaYesu ŵaLesa eŵaŵaŵusisye, nefyafyefyo fwense tuli nimboni. 33Peŋka ili ŵasuntwilwe peulu kukuŵoko kwaŵaLesa ukwalwine, nekupoka kuli ŵaWisiŵo ukulayo'kwaMupasi Uswetelele, ŵaitile'fi ifi mulukuŵona nekumfwa. 34Pakuti Dafidi taemine kwiulu, sombi umwine alilaŵile ati:

ŴaYawe ŵalilaŵile kuli ŵaSikulu ŵanji ati:

Ulukwikala kulwine lwanji,

35Ili nsiŋgatwalula utupondo toŵe cipuna icakusamina-po amakasa oŵe.

36Pakuti pali fyefyo, icikoto icaŵaIsilaeli conse ciisiŵe icine ati ŵaLesa ŵaliŵekalicile aŵo-ŵaYesu, aŵa mwatalicile, niŵaSikulu nakaŵili niŵaKlistu.

37Popele apo, pakumfwe'fyo, ŵalilasilwe mumitima yaŵo, nekulaŵila kuli Petilo nakutanjisi isyo simbi ati: Mweŵakwasu, mbatucite syani? 38Petilo naye alilaŵile kuli ŵo ati: Lapileni, muŵatisiwe mweŵo mwense mwisina lyaŵaYesu Klistu, ukwakulekelela ifyakuŵifya fyenu; eli mukapoka impese yaMupasi Uswetelele. 39Pakuti ukulaya kuli kuli mweŵo, nakuŵana ŵenu, nakuli ŵo ŵonse aŵacili ukutali; aŵo ŵonse aŵa ŵaketa ŵaSikulu Lesa wesu. 40Nakaŵili nemasiwi ambi aenji alisimicile, nekuŵacenjesya, nekulaŵila ati: Ŋgamulipulusye kucitentekwa ici icisendeme!

41Lomba aŵo aŵasumine amasiwi akwe, ŵaliŵatisiwe; popele akasuŵa ako ŵalilundilwe-po aŵantu koti masausande atatu. 42Naŵo ŵaliikele nemuŋkonsya muŵusambisi nekwambala kwantanjisi, nekulukukumala siŋkwa, nekulukutembela.

43Nekutina nekwisa pali ŵo ŵonse: nefimpelampela netwisiŵilo utwinji twalicitilwe kuntanjisi. 44Peŋka ŵonse aŵalukucetekela ŵaliikele pamo; nefintu fyaŵo fyonse fyali fimo; 45kaŵili ŵaliulile ifintu fyaŵo nemaŵoni aŵo, nekwaŵana ŵonse koti kupeŋga kwaŵo. 46Popele apo insiku nansiku ŵalukwikala nemuŋkonsya mwitempuli, nemutima umo, nekulukukumala siŋkwa kwaŵo, nekulukulya ifyakulya fyaŵo nekutemwa nekutekanya ukwamumitima, 47ili ŵaŵalemya ŵaLesa, nekulukutemiwa kuŵantu ŵonse. Popele ŵaSikulu ŵalukulunda-po pewuŋgano lyaŵo insiku nansiku aŵo aŵalukupuluka.

Currently Selected:

Ifyacitilwe 2: AAL59

Highlight

Copy