Ifyacitilwe 5
5
1Sombi umuntu umbi, isina lyakwe niAnanaya, uwali nemukasi wakwe, Safila, aliulisye uŵuŵoni bwaŵo ŵumbi nendalama; 2simbi nekufisa, ŵoŵilo nekufundana nemukasi wakwe; popele simbi nasyo alitwite nekutula muceni cantanjisi. 3Sombi Petilo alilaŵile ati: Ananaya, mbanindo Satana aisusisyo' mutima woŵe ukutumpaika Umupasi U swetelele, nekufisa indalama simbi isi waulisye nasyo icalo? 4Lomba tauŋgaculisya, kansi tacali coŵe wemwine? Nakaŵili, pakucula, kansi tawali nemakosa pali co? Mbanindo walaŋgulucile' fi mumutima woŵe? Tautumpaicile aŵantu, sombi waŵepa kuli ŵaLesa! 5Pakumfwa amasiwi ayo, Ananaya aliwilile pansi, nekufwa. Peŋka aŵantu ŵonse aŵaumfwile'fyo ŵaliŵele nemwenso ukwakuti. 6Popele apo aŵasaŋkwa ŵaliimine, nekumupeta, nekumutwala pesonde mukumusika.
7Pakupite'mpindi koti sitatu, umukasi wakwe naye aliinjile, uwakuŵulo' kwisiŵa ifyo ifyacitilwe. 8Popele Petilo alilaŵile kuli ye ati: Umbule kani isindalama esyopele mwaulile necalo ico? Naye nekusumina ati: Inya, esyopele' syo. 9Sombi Petilo alilaŵile kuli ye ati: Mbanindo mwafundanina limo mukwesya Umupasi waŵaSikulu? Ŵona! Amakasa aŵaŵo aŵasika umulume woŵe ali kumulyaŋgo; naweŵo ŵakukutwala pesonde! 10lmpindi yopele'yo naye aliwilile pansi muceni cakwe, nekufwa. Naŵo awasaŋkwa ŵaliinjile, nekumusaŋga ufwile, nekumutwala pesonde, nekumusika pamulume wakwe. 11Popele ikelesya lyonse neŵantu ŵonse aŵaumfwile'fyo ŵaliŵele nemwenso ukwakuti.
12Kaŵili kuminwe yantanjisi utwisiŵilo utwinji nefimpelampela fyalicitilwe pakati paŵantu; nasyo syonse syalukuŵuŋgana nemutima umo mumulyaŋgo wakwe Solomoni. 13Sombi aŵasyeleko ŵonse neli umo taŵali nemitima iyakukumaŋkana nasyo; sombi naŋgawe' fyo aŵantu ŵalukusicindika. 14Kaŵili aŵacetekele aŵakucila ubwinji ŵalisaŋkanine kuli ŵaSikulu, amaŵumba aŵalalume neŵanakasi. 15Fyopele'fyo lomba ŵalukuŵafumya aŵalwele ukuŵatwala mumisewo, nekuŵalalika pamalo napampasa, ati Petilo pakupita palya, neli cinsiŋgwa cakwe ciŵafimbe-po ŵambi. 16Nakaŵili lyaliwuŋgene iŵumba lyaŵantu ilyafumine kumisi lyasiŋgulucile kuJelusalemi, nekuleta aŵalwele neŵalukukatasiwa kumipasi iŵipile; naŵo ŵonse nekuŵusiwa.
17Sombi umupapatilisi umukulu aliimine, naŵaŵo ŵonse aŵo ali naŵo (ŵopele aŵamukoka waŵaSadukayo), nekuŵa necikani ukwakuti; 18nekwikata intanjisi, nekusiŵika mwikati lyaŵantu ŵonse. 19Lomba uŵusiku iŋkalamba yaŵaSikulu yaliiswile-po pamilyaŋgo yekati, nekusifumya, nekulaŵila ati: 20Kamuyeni kwitempuli, mukemakane muŵaŵule aŵantu amasiwi onse aMweo uno. 21Naŵo, ili ŵaumfwile'fyo, ŵaliinjile mwitempuli pakuca ulucelo, nekulukusambisya. Sombi umupapatilisi umukulu aliisile, naŵaŵo aŵo ali naŵo, nekuŵeta awamwiwuŋgano pamo neŵakulu ŵonse ŵaŵaIsilaeli, nekutuma aŵantu kwikati mukusileta intanjisi. 22Sombi ifita ifyaile tafyasibwene mwikati; nafyo fyalibwelele nekulaŵila 23ati: Mwikati twasaŋgana muliiselwe ukukosele, neŵalukulama ŵaliimakene pamilyaŋgo; sombi pakwisula-mo fweŵo, tatusanjile-mo aŵantu neli umo. 24Peŋka, pakumfwa amasiwi ayo, icilolo icamwitempuli neŵapapatilisi aŵakulu ŵalikaŋkamene lukoso ati: Mbakwisa fikapela? 25Peŋka nekwisa umuntu umbi, nekuŵaŵula ati: Ŵoneni, aŵantu aŵo mwaŵicile mwikati ŵaliimakene mwitempuli, ŵalukusambisya aŵantu. 26Popele icilolo ico caliile pamo nefita, nekuŵaleta bwino ukwakuŵula'makosa; pakuti fyalitinine aŵantu ati twiŋgafwa kumabwe. 27Popele pakuŵaleta, fyaliŵekalicile pacilye; naye umupapatilisi umukulu aliŵepwisye 28ati: Twalimukenyeni icine ati tekusambisya mwisine' li! Lomba ŵoneni, mwakumanya Jelusalemi uŵusambisi bwenu, nekufwaya ukutusumwina imilopa yamuntu uyu! 29Sombi Petilo nentanjisi syaliasucile ati: Ukutwelelwa ukumfwa ŵaLesa ukwakucila napakumfwa aŵantu. 30ŴaLesa ŵaŵawisifwe ŵaliŵaŵusisye ŵaYesu, aŵo mwaipeye ukuŵatalika pamuti. 31Ŵopele ŵaLesa eŵalemesye kukuŵoko kwaŵo ukwalwine ati ŵekale niMfumu, Ŵakupulusya, mukuŵapela aŵaIsilaeli ukwaluluka mumitima, nekufilekelela ifyakuŵifya fyaŵo. 32Kaŵili fweŵo tuli nimboni syafintu ifyo, neMupasi Uswetelele nawo fyopele'fyo, uyu ŵaLesa ŵaŵapele aŵo aŵalukuŵomfwa.
33Sombi aŵo, pakumfwe'fyo, ŵalisomenwe mumitima, ŵati ŵakaŵepaye. 34Popele umbi aliimine mucilye, umuFalisi, isina lyakwe niGamalyeli, uwamano amumafunde, uwali neŵuleme kuŵantu ŵonse, nekuŵafunda ati ŵafumisyeni pesonde impindi ice. 35Naye alilaŵile kuŵaŵyakwe ati: Mweŵantu ŵakuIsilaeli, cenjeleni kuŵantu aŵa ifi mwakucita; 36pakuti akale aliimine Tyuda, umuntu uwakulicindika ati enemwine; kuli ye aŵantu ŵambi eko ŵaloŋganine, ŵali koti myanda ine. Uyo ŵalimwipeye; naŵaŵo ŵonse aŵalukumumfwa ŵalipalaŋganisiwe, nekwaluka ŵalukoso. 37Popele panuma yamuntu uyo, nekwima Juda uwakuGalili, pansiku syakulembesya aŵantu, nekutwala aŵantu ukumulonda: uyo naye alifwile, naŵaŵo ŵonse aŵalukumumfwa ŵalipalaŋganisiwe. 38Lomba ŵukumo ndukulaŵila kuli mweŵo ati: Tekuŵacita'kantu aŵa-ŵantu, muŵaleke lukoso; pakuti kani ukufundo'ku nemilimo iyi yaŵantu, ikawa; 39sombi kani yaŵaLesa, mweŵo tamukesiŵa ukuŵawisya, mwikesa-kuŵoneka ati mulukulwa naŵaLesa. 40Peŋka ŵalimusuminine; nekusiita intanjisi, nekusipama, nekusicenjesya ati: Tekulawila amasiwi mwisina lyakwe Yesu! Eli ŵasilekele. 41Nasyo lomba syalifumine mucilye, ili sisaŋgalala pakuti syalieŵelwe ati tulielelwe ukumfwo'kupufiwa pakuti peSina. 42Popele insiku syonse tasyalekele ukulukusambisya nekutulisya mwitempuli nakwaŵo ati ŵaYesu niŵaKlistu.
Currently Selected:
Ifyacitilwe 5: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
