Ifyacitilwe 6
6
1Peŋka'po pansiku isyo, pakufula aŵasambile, aŵaEla aŵaalucile ŵaJuda ŵalitaticile ukulinwinwisisya aŵaEbeya, pakuti ŵamukakusyala ŵaŵo ŵalukuŵaluŵa-ko pakupyuŋga kwansiku syonse. 2Popele aŵo ikumi naŵaŵili ŵaliliitile iŵumba lyaŵasambile, nekulaŵila ati: Tekwelelwa fweŵo ukuleka lsiwi lyaŵaLesa, nekucite'milimo yakuteŵeta. 3Pakuti pali fyefyo, mweŵakwasu, salululeni peŵumba lyenu aŵantu ŵasanu naŵaŵili aŵampupo isiweme, aŵeswile Umupasi nemano, ati tuŵatume imilimo iyi. 4Sombi fweŵo twakulukukosa ukutembela, nekucite'milimo yeSiwi. 5Peŋka amasiwi ayo alitemwesye iŵumba lyonse; naŵo ŵalisalulwile Stefano, umuntu uwaiswile ukucetekela neMupasi Uswetelele, pamo naFilipo, naPolokolo, naNikano, naTimoni naPamena, naNikola, umuntu wakuAntioke uwaalucile muJuda; 6nekuŵekalika pamenso antanjisi. Lomba, ili syatembele, syaliŵatintile i minwe.
7Popele apo Isiwi lyaŵaLesa lyalifulile, neŵasambile naŵo nekufulo'kwakuti muJelusalemi; nakaŵili neŵapapatilisi iŵumba ilikulu ŵalisumine ukucetekela.
8Lomba Stefano, uwaiswile uluse nemakosa, walukucite'fimpelampela netwisiŵilo utukulu pakati paŵantu. 9Sombi ŵaliimine ŵambi aŵamwisunagoge ilyailicilwe ati lyaŵafumine muli ŵukalume, pamo neŵaKulene, neŵakuAlecisandala, neŵakufyalo fyaCilica naAsya, ili ŵapicisya nakwe Stefano. 10Sombi taŵaisiŵile ukwacicila amano neMupasi uyu alukulaŵila nawo. 11Peŋka ŵalitekenesye aŵantu ŵambi; aŵo nekulaŵila ati: Twalimumfwile alukucoŵola Mose naŵaLesa. 12Naŵo ŵalimusuŋgwilile aŵantu neŵakulu neŵalembesi; nekumuficila ukumwikata, nekumwinjisya mwiwuŋgano. 13Peŋka ŵalisiikalicile imboni syakuŵepa; isyo nekulaŵila ati: Uyu-muntu insiku syonse taaleka-po ukupufya Inanda iyi iswetelele nemafunde. 14Pakuti twalimumfwile alukulaŵila ati: Uyu-Yesu wakuNasaleti akonala iŋanda ino, nekwalula ukwisiŵila uko atuŵulile Mose. 15Peŋka ŵonse aŵaikele mwiwuŋgano, ŵalimutontomekele, nekuŵona pamenso akwe koti nipamenso aŋkalamba yaŵaLesa.
Currently Selected:
Ifyacitilwe 6: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
