Yoane 13

1Lomba ili taciŋgafika icitenje camuciluko, ŵa Yesu ŵaliisiŵile ati impindi yanji yaisa iyakufuma-mo neŵo mucalo capansi nekuya kuli ŵaTata; kaŵili pakuti ŵo ŵalukuŵatemwa aŵantu ŵaŵo aŵali mucalo capansi, ŵaliŵatemenwe ukufika nakumpindi iyakupela-ko. 2Peŋka pakulukulya umulalilo, lomba umusensesi kale ainjisye mumutima wakwe Juda lsikaliote, umwana wakwe Simoni, ukufwaya ukwakuŵaloŵela ŵaYesu. 3Naŵo ŵaYesu ŵaliisiŵile ati ŵaTata ŵampela muminwe yanji ifintu fyonse; kaŵili ati ndifumine kuli ŵaLesa, nakuli ŵaLesa nako ndukuya; 4lomba ŵaliimine apo ŵalukulya, nekufula neminjila yaŵo; peŋka ŵaliŵulile netaŵulu, nekulikaka paluŵunda.

5Eli waitile amenda mumusambilo, nekutatiko'kusamfya aŵasambile kumakasa, nekwasumala kwitaŵulu ilyo ŵakacile muluŵunda. 6Fyopele'fyo ŵalificile nakuli Simoni Petilo; sombi alilaŵile kuti ŵo ati: MweŵaSikulu, mweŵo emwe mwakunsamfya kumakasa neŵo? 7ŴaYesu ŵalimwasucile ati: Ifi ifi ndukucita taufiisi ŵukumo, sombi ukafiisiŵa pantanjile. 8Kumfwa Petilo kaaŵeŵa ati: Nensiku syonse tamukansamfya-po kumakasa anji neŵo! ŴaYesu kaŵamwasuka ati: Kani tesi ŋkusamtye-po, ifyo taukwete-po kantu kuli neŵo. 9Simoni Petilo nekulaŵila kuli ŵo ati: MweŵaSikulu, mwinsamfya neŵo kumakasa kweŋka: sombi nakumawoko, nakumutwi musamfye. 10ŴaYesu nekulaŵila kuli ye ati: Uwasamba'kale pamuŵili ponse, taalukufwaya fimbi, sembi kusamba kumakasa kweŋka, pakuti aliswetele limo; namweŵo muliswetele; sombi tamuswetele mwense. 11Pakuti ŵaliisiŵile uyo uwakuŵaloŵela; pakuti pali fyefyo epo ŵalaŵile ati—Tamuswetele mwense.

12Lomba, ili ŵaŵasamfisye kumakasa, nekuŵule'minjila yakwe, nekusamina liŵili, ŵalilaŵile kuli ŵo ati: Mulukwisiŵe'fyo ifi nacita kuli mweŵo? 13Mulaŋgewa ati nimweŵaSambisi, pambi ati niŵaSikulu; ifyo mulukulaŵila bwino, pakuti ifyo efi ndi. 14Peŋka kani neŵo, neSikulu nemuSambisi, namusamfyeni kumakasa, ukumwelelweni namweŵo ukulukusamfyansyanya kumakasa. 15Pakuti namupeleni icakutuntulula-ko, ati namweŵo muŋgacita koti nifyopele'fyo ifi namuciteni. 16Cine cine, ndukumuŵuleni ati, umupyunjisi taacilo'wukulu napali ŵawisikulu; neli niŋkalamba taicila-po uŵukulu napaŵaitumine, koku. 17Kani mulukwisiŵe'fyofintu, mulisyucile kani mulukuficita.

18Nsilukumweŵeni mwense; ndiŵesi aŵo nasalulwile; sombi ati fikapelelwe pamo nemalembo, ati: Uyo ulukulya pamo naneŵo siŋkwa wanji aimisya pali neŵo akasisilo kakwe. 19Ukufuma kumpindi ino, nakulukumuŵuleni ifintu ili tafiŋgacitwa, ati pakucitwa mukacetekele ati NDI. 20Cine cine, ndukumuŵuleni ati—Ulukumupokelela uyu natuma, eulukumpokelela neŵo; kaŵili uyo ulukumpokelela neŵo, eulukuŵapokelela naŵaŵo aŵantumine.

21Ili ŵalaŵile'fyo ŵaYesu nemutima nekulemuka, peŋka ŵalisimicile ati: Cine cine, ndukumuŵuleni ati apa apo muli mweŵo umbi akundoŵela. 22Lomba aŵasambile ŵalukulolansyanya ili ŵapalakanya ati mbaninani ŵalukweŵa? 23Naumbi umusambile waŵo, uyu ŵatemenwe ŵaYesu, alukweyamina muntiŵi yaŵaYesu. 24Lomba Simoni Petilo alimucebwile, nekulaŵila ati: Tuŵule ninani ŵalukweŵa. 25Naye, ili eyamine muntiŵi yaŵaYesu, alilaŵile kuli ŵo ati: MweŵaSikulu, mboyo ninani mwaeŵa? 26Kumfwa ŵaYesu kaŵaasuka lomba ati: Niwoyo unakutantila-mo umukusu nekupela. Elyo ŵatantile-mo umukusu, nekuuŵula, nekumupela Juda, umwana wakwe Simoni Isikaliote. 27Peŋka panuma yamukusu epo ainjile Satana muli ye. Pakuti pali fyefyo ŵaYesu ŵalilaŵile kuli ye ati: Ifi wakucita, uficite bwaŋgu, 28Sombi pali ŵaŵo aŵasamine-po petebulu tapali-po neli umo uwaisiŵile iceŵo ici ŵalukumweŵa. 29Pakuti ŵambi ŵalukulaŋguluka ati—Pakuti Juda euli nemukopa, lino ŵaYesu ŵalukumweŵa ati, ufiule ifintu ifyo ifi twakufwaya pakuti pacitenje; neli ati, upele simbi kuwapeŋgele. 30Naye, pakuupoko'mukusu, alipulilile ukufuma; lomba newusiku kale bwaila.

31Popele apo, ili afumine-mo, ŵaYesu ŵalilaŵile ati: Ŵukumo Umwana waMuntunsi acindikwa, naŵaLesa naŵo ŵacindicilwa muli ye; 32kaŵili ŵaLesa ŵakamucindika ye muŵene, eŵakapulilila ukumucindika. 33Mwetwana twanji, ncili namweŵo imbi impindi inini; mweŵo mukamfwaya-fwaya, sombi koti nifyopele'fyo ifi nalaŵile kuŵaJuda ati, uko uku ŋkaya neŵo, tamukesiŵa mweŵo ukwisa-ko; fyopele'fyo efi ndukumuŵuleni namweŵo ŵukumo. 34Ifunde lyaŵukumo ndukumupeleni, ati mulukutemwansyanya; koti nifyopele'fyo ifi nalukumutemweni neŵo, efi mulukutemwansyanya namweŵo. 35Pakuti pali kuku aŵantu ŵonse ŵakesiŵa ati muli ŵasambile ŵanji, kani mukalukwikele nekutemwansyanya.

36Simoni Petilo alilaŵile kuli ŵo ati: MweŵaSikulu, mbamulukuya-pi? Kumfwa ŵaYesu ati: Uko uku ndukuya, tawisi ukundonda ŵukumo, sombi ukandonda pantanjile. 37Petilo naye nekuŵeŵa ati: MweŵaSikulu, mbanindo nsiisi ukumulondeni naŵukumo? Nasumina neŵo ukuuposa umweo wanji pakuti pali mweŵo! 38ŴaYesu nekwasuka ati: Kani cine ulukusumina ukuposo' mweo woŵe pakuti pali neŵo? Cine cine, ndukukuŵula weŵo ati kombolwe taakalila, ili tauŋgaŋkana litatu.

Currently Selected:

Yoane 13: AAL59

Highlight

Copy