Yoane 12

1Peŋka pakusyala-ko lukoso insiku sisanu nakamo ukufika kumpindi yamuciluko, lomba ŵaYesu ŵaliisile kuBetania, ukwali Lasalo, uyo ŵaŵusisye ŵaYesu muŵafwile. 2Naŵo ŵaliŵateyele ifyakulya ifyamulalilo kopele uko; naye Malita alukutaŵa-taŵa; sombi Lasalo epwali pali ŵaŵo aŵasamine ukulukulya pamo naŵo. 3Lomba Maliya aliŵulile impondo imo yamafuta anado aenenene, amakweŵo akosele, nekuŵasufya ŵaYesu kumakasa, nekwasumala' makasa aŵo kumisisi yakwe umwine; nao amafuta ayo nekupimbana muŋanda monse.

4Sombi Juda lsikaliote, umbi umusambile waŵo, uyo uŋgawalowela, alilaŵile ati: 5Aya-mafuta mbanindo taolilwe lukoso indalama imyanda itatu, nekupela awapeŋgele. 6Sombi ifyo taafilaŵilile ukutemwa awapeŋgele, koku; sombi nipakuti ye muno, ali nemukopa, nekulukufumya-mo ifyo ifyaŵicilwe-mo. 7Pakuti pali fyefyo ŵaYesu ati: Mulekeni! Alukukalamina akasuŵa akakusikwa kwanji. 8Pakuti awapeŋgele mulinawo insiku syonse: sombi tamukalukuli naneŵo insiku syonse, koku.

9Peŋka aŵantu lukoso pakati paŵaJuda ŵaliumfwile ati ŵali uko; popele ŵaliile-ko; sombi tawakoŋkele-po ŵaYesu weŋka, sombi ŵalukufwayo'kuŵona naLasalo, uyo ŵaŵusisye paŵafwile. 10Sombi aŵapapatilisi aŵakulu ŵalialicile ati naLasalo naye ŋgatumwipave: 11pakuti aŵaJuda aŵenji ŵalikumbulucile pakuti pali ye, nekuŵacetekela ŵaYesu.

12Ŋgamailo iŵumba lyaŵantu aŵenji aŵaisile kucitenje, ili ŵaumfwile ati ŵaYesu ŵalukwisa kuJelusalemi, 13ŵaliŵulile ifisako fyafincindu, nekuya mukuŵacinsya, nekulukuŵilicisya ati: Osana! Ŵalicindeme aŵa aŵalukwisa mwisina lyaŵaSikulu, eMfumu yaŵaIsilaeli! 14Peŋka'po ŵaYesu ŵalisanjile imboŋgolo iyanice, lomba nekwikala-po; koti nifyopele'fyo ifyalembelwe ati: 15Witina, wemwana umwanakasi uwakuSayoni: ŵona-ko, lmfumu yoŵe ilukwisa, ili iikele pamutule wamboŋgolo! 16Sombi ifintu ifyo aŵasambile ŵaŵo taŵafiisiŵile-po pakutaŋga: sombi pakuŵa neŵuleme ŵaYesu, naŵo eli waŋgalaŋguluka ati ifintu ifyo fyalilembelwe ifyakuli ŵo; kaŵili ati ŵalificitile'fyo kuli ŵo. 17Pakuti pali fyefyo iŵumbe'lyo ili ŵali nalyo ŵaYesu pakumwita Lasalo mucilende, nekumuŵusya paŵafwile, lyalukusimike'fyo. 18Kaŵili pakuti pali fifi amaŵumba aŵantu aliŵacinsisye, pakuti waliumfwile ati ŵalicitile akesiŵilo ako. 19Pakuti pali fyefyo aŵaFalisi ŵalukuŵulansyanya ati: Tamubwene-po ati tamwisi ukucita neli kantu; pakuti ŵoneni, aŵantu ŵonse ŵalukumulonda.

20Peŋka pali ŵaŵo aŵaile mukutembela kucitenje, pali neŵaEla ŵambi. 21Lomba ŵo ŵaliile kuli Filipo uwakuBesaida uwakuGalili, nekumulomba ati: Sikulu tulukufwayo'kuŵaŵona ŵaYesu. 22Filipo naye nekuya nekumuŵula Andaleya; peŋka Andaleya naFilipo ŵoŵilo ŵaliŵaŵulile ŵa Yesu. 23Sombi ŵaYesu ŵaliŵaasucile ati: Pano impindi yafika ati Umwana waMuntunsi aŵe neŵuleme. 24Cine cine, ndukumuŵuleni ati—Kani ulupeke lwatiligu taluponene peloŵa nekufwa, lulekala lweŋka; sombi kani lufwe, lulafyala imbuto isinji. 25Uyo uwakulukutemwa umweo wakwe akaulufya; sombi uwakufitilwa umweo wakwe uwamucalo cino icapansi, eukaulama mumweo uwamuyayaya. 26Umuntu uwakulukumpyunjila neŵo, ŋgaandonde; peŋka uko uku ŋkekala, uko kopele eko akekala nemupyunjisi wanji. Kani umuntu alukumpyunjila neŵo, uyo ŵaTata naŵo ŵakamulemya. 27Pano umutima wanji walemuka; peŋka ndaŵile syani? ati Tata mumpulusye kumpindi ino? A! sombi nipakuti paceŵo ici epo mficile kumpindi ino! 28Tata ŋgamulemye isina Iyenu!

Pakuti pali fyefyo isiwi lyalifumine kwiulu ati: Ndililemesye akale, kaŵili ŋkalilemya liŵili. 29Peŋka iŵumba lyawantu aŵaiminine apepi nekufiumfwa lyalilaŵile ati: Cilulumo! sombi ŵambi ati: Niŋkalamba yalaŵila nakwe, 30Kumfwa ŵaYesu kaŵaasuka ati: Isiwi ili taliisile pakuti pali neŵo, sombi nipakuti pali mweŵo epo liisile. 31Lomba ŵukumo epo kuli ukusololola kwacalo capansi; epano imfumu yacalo capansi ikaposwa kwisonde; 32naneŵo kani ŋkasuntulwa peulu pacalo ŋkawaloŵa ŵonse neŵo nemwine. 33Sombi ŵalilaŵilile'fyo mukulanjisya amekalilo amfwa iyo ŵakafwa. 34Pakuti pali fyefyo iŵumba lyaŵantu lyaliŵaasucile ati: Twaliumfwile kumafunde ati ŵaKlistu eŵakwikalilila. Mbefyo fyasyani mulukweŵa ati Umwana waMuntunsi aŋgasuntulwa? Mboyo-Mwana waMuntunsi ninani? 35Pakuti pali fyefyo ŵa Yesu ŵalilaŵile kuli ŵo ati: Yasyala-ko impindi ice iyakwikala nenu ukutuŵa. Ŋgamwende ili mucili nekutuŵa, iŋgela imfinsi kuli mweŵo; nawoyo ulukwenda pamfinsi tesi-ko nakoko ukwalukuya. 36Ili mucili nekutuŵa, mupeme-mo mukutuŵa, ati mukaŵe ŵana ŵakutuŵa.

Ifintu ifyo ŵaYesu ŵalifilaŵile; lomba ŵalikumbulucile, nekuŵafisamina. 37Sombi naŋgawa ati ŵalicitile utwisiŵilo utwinji utwakuŵe'fyo pamenso aŵo, taŵacetekele muli ŵo; 38ati fikapelelwe pamo nemasiwi aalaŵile Yisaya uwakusimika ati:

MweŵaSikulu, mbaniŵani aŵalukucetekela ifyo ifi twasimicile?

Nikuli ŵani kubwenekele ukuŵoko kwa ŵaSikulu?

39Sombi pakuti pali fifi taŵaisiŵile ŵo ukucetekela, pakuti Yisaya alilaŵile kaŵili ati:

40Aŵapofwesya amenso aŵo, nekuumya nemitima yaŵo;

Ŵeŋgaŵona nemenso, neli kwisiŵisya nemitima,

Neli kwaluluka,

Naneŵo niŋgawawusya.

41Yisaya alilaŵile ifintu ifyo, pakuti alibwene uŵuleme bwaŵo, nekufisimike' fyaŵo. 42Sombi naŋgawa nifyefyo, nempemba isinji syalicetekele muli ŵo; sombi tasyaŵasuminine apaswetele pakuti paŵaFalisi, siŋgesa-kutamfiwa-mo mwisunagoge. 43Pakuti syo syalukutemwa ukutotwa kuŵantu, ukucila napakutotwa kuli ŵaLesa.

44Naŵo ŵaYesu ŵaliŵilicisye ati: Ulukucetekela muli neŵo, taalukucetekela muli neŵo neŋka, sombi alukucetekela namuli ŵaŵo aŵantumine; 45nawoyo ulukumbona, alukuŵona naŵaŵo aŵantumine. 46Ndiisile ndi kutuŵa mucalo capansi, ati awantu ŵonse uwakucetekela muli neŵo tekulukwikele mumfinsi. 47Kani umuntu omfwe amasiwi anji nekuŵulo'kwacetekela, nsilukumusinina neŵo; pakuti nsiisile mukusinina icalo capansi, sombi nimukucipulusya, emo njiisile. 48Uwakuŋkaninina neŵo, nekuŵulo'kwapokelela amasiwi anji, kuli ye ekuli ukumusinina: isiwi ilyo nalaŵile, lyopele'lyo elikamusinina pakasuŵa ako akakupela-ko. 49Pakuti nsinalaŵile ifyakufuma kuli neŵo neŋka; sombi ŵaTata aŵantumine ŵalimfundile'fyo ifi niŋgewa, nafvefyo ifi niŋgalawila fyonse. 50Kaŵili ndiisi ati amafunde aŵo Mweo uwamuyayaya. Pakuti pali fyefyo, ifintu ifyo ifi ndukulaŵila, efyefyo ifi ŵambulile Ŵatata, efi ndukulaŵila.

Currently Selected:

Yoane 12: AAL59

Highlight

Copy