Luku 16
16
1Kaŵili ŵalilaŵile nakuŵasambile ati: Ekwali umbi umuntu umuŵile, uwali necilolo; copele'co calisenselwe kuli ye ati, cilukuposaila amaŵoni enu. 2Naye aliciitile, nekulaŵila kuli co ati: Mbe'fi ifi ndukumfwa ifyakuli weŵo findo? Ŋgompele-po ifyakupenda ifyaŵucilolo ŵoŵe; pakuti tawisi ukwikala ŵucilolo ŵukumo. 3Peŋka icilolo ico calilaŵile mumutima ati: Ŋkacite'ndo, pakuti ŵasikulu ŵanji ŵalukuŵufumya ŵucilolo kuli neŵo? Nsikwete-makosa akulima; ndi nensoni, nsiisi ukulomba-lomba. 4Naisiŵa ifyafyefyo ifi ŋkacita, ati, pakutamfiwa neŵo kuli ŵucilolo, ŵakampokelele mumananda aŵo. 5Peŋka caliŵetile ŵonse aŵali nemyapu kuli ŵawisikulu, nekulaŵila kuwakutaŋga ati: Mbamwapu-wasyani uli nawo kuli ŵasikulu? 6Naye ati: Fyakwesya ifyamafuta umwanda. Naco calilaŵile kuli ye ati: Ŵule'ŋkalata yoŵe, wikale bwaŋgu, ulembe amakumi asa nu. 7Eli calaŵile nakuli umbi ati: Mbamwapu-wasyani uli nawo weŵo? Naye ati: Fyakwesya ifyatiligu umwanda. Naco calilaŵile kuli ye ati: Ŵule'ŋkalata yoŵe, ulembe amakumi asanu naatatu. 8Lomba ŵawisikulu ŵalicitotele icilolo ico icisendeme, pakuti calicitile ifyamano; pakuti kucitentekwa caŵo aŵana ŵampindi ino ŵali nemano akucila napaŵana ŵakutuŵa. 9Kaŵili ndukulaŵila kuli mweŵo ati: Mulileŋgele ifiŵusa fyenu kumaŵoni asendeme, ati, pakusila o, fikamupokeleleni mumitanda yamuyayaya. 10Uyo utekenye kufintu ifice alitekenye nakufinji; uyo naye utaatekenye kufice lukoso, taatekenye nakufinji. 11Peŋka kani tamwatekenye kumaŵoni asendeme, mba ninani ukamusisyeni amaŵoni acine? 12Nakaŵili kani tamwatekenye kuli fyefyo ifyamuntu umbi, mbaninani ukamupeleni ifyo fyenu? 13Papo'mupyunjisi uwisi ukuŵapyunjila ŵawisikulu ŵaŵili; pakuti neli akamufitilwa umo, umbi nekumutemwa: neli akalukwikatisya naumo, uyo umbi nekumupufya. Tamwisi ukupyunjila naŵaLesa nemaŵoni.
14Peŋka aŵaFalisi, aŵalukutemwa indalama, ŵaliumfwile'fyo fyonse, nekulukuŵaseka. 15Naŵo ŵalilaŵile kuli ŵo ati: Mweŵo muli ŵaŵo aŵalukulilunjika pamenso aŵantu; sombi ŵaLesa ŵaliisi imitima yenu; pakuti ico icicindicilwe kuŵantu, pamenso aŵaLesa cilikanaminwe. 16Amafunde neŵakusimika ŵalukwikala ukufika kumpindi yakwe Yoane; ukufuma kumpindi iyo leeŵo Iciweme icaŴufumu bwaŵaLesa cilukuŵulisisiwa; neŵantu ŵonse naŵo ŵalukwinjila-mo nemakosa. 17Sombi icapepi ati iulu necalo capansi cikasila ukucila napakupona akasiwi kamo akamumafunde. 18Aŵantu ŵonse uwakukana umukasi wakwe, peŋka nekuupa naumbi, alukucito'wucende: nawoyo uwakumuupa umbi ukenwe kumulume wakwe, uyo naye alukucito'ŵucende.
19Lomba ekwali umuntu umbi umuŵile, uwafwite ifikasicile neŋguwo inacile, uwalukulya ifilumbulucile insiku syonse. 20Lomba umbi umuŵusu, isina lyakwe niLasalo, alilalicilwe pamulyaŋgo pakwe, umuŵili wakwe fyeŋke'filonda, 21uwalukufwayo'kulya ulunsekentwa ulwalukuponaila kwitebulu lyamuŵile; icine, nembwa nasyo syaliisile, nekulukumumyaŋga pafilonda.
22Lomba paliŵele ati uyo-muŵusu walifwile, nekutwalwa kuŋkalamba kuntiŵi yakwe Ablaamu; nemuŵile naye alifwile nekusikwa. 23Peŋka kuSyeoli, ili alukukululuka, alilakamine mwiulu, nekuŵona nikuli Ablaamu ali ukutali naLasalo ali muntiŵi yakwe. 24Naye aliŵilicisye ati: MweŵaTata Ablaamu, muncitile'ŋkumbu, mumutume Lasalo ati asumpule umunwe mumenda antantisye palumini; pakuti ndukusomenwo'kwakuti mu mulilo uyu.
25Sombi Ablaamu ati: Wemwana, ulaŋguluke ati pampindi yamweo woŵe walukupoka ifintu fyoŵe ifiweme, naLasa lo fyopele'fyo ifintu ifiŵipile: sombi ŵukumo, alukusaŋgalala kuno, naweŵo uli nekusomenwa. 26Nakaŵili, pakati pali fweŵo naweŵo pali nemukolo ukulu, ati aŵo, aŵalukufwayo'kupita ukufuma kuno nekuya kuli weŵo, tekwisiŵa-po ukupita; nakaŵili ati aŵantu tekwisiŵa neli umo ukwaŵuka ukufuma kulya nekwisa kuli fweŵo. 27Eli alaŵile naye ati: MweŵaTata, napapata ati mumutume kunanda yaŵatata, 28pakuti ndi neŵakwasu ŵasanu; ati akasimike kuli ŵo, weŋgesa naŵaŵo mukwinjila muno umwakupensya. 29Sombi Ablaamu ati: Aŵo ŵali naMose neŵakusimika, ŋgawawomfwe ŵo. 30Naye ati: Koku, mweŵaTata Ablaamu; sombi kani umuntu uwakufuma kuŵafwile akaye kuli ŵo, ŵakalapila. 31Naye alilaŵile kuli ye ati: Kani taŵomfwa-po Mose neli ŵakusimika, tesi ŵakatekenesiwe, naŋgawa ati umbi akaŵuke pakati kaŵafwile.
Currently Selected:
Luku 16: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
