Luku 17

1Naŵo ŵaYesu ŵalilaŵile kuŵasambile ŵaŵo ati: Tekwisiŵa ukufikanyo'kwisa ifyakuŵatutula aŵantu: sombi akasyama uyo ukafileta! 2Ukumwelelwa uyo ati ibwe ilyakupela-po likakakwe kumukosi wakwe, naye nekuposwa mucisiŵa, ukucila napakumututwisya umbi umwanice uwakuŵe'fi. 3Kamulukulicentanya! Kani umukwanu aŵifye, umukanye; peŋka kani alapile, umufitulucile. 4Nakaŵili kani akuŵifisye lisanu naliŵili akasuŵa kamo, nekwalucila kuli weŵo lisanu naliŵili, nekulaŵila ati: Nalapila! umufitulucile.

5Lomba intanjisi syalilaŵile kuli ŵaSikulu ati: Mukukusye ukucetekela kwesu. 6Naŵo ŵaSikulu ŵalilaŵile ati: Kani muli nekucetekela koti lusaŋgu lumo lwasinapi, mwakulaŵila kumukuyu uyu ati: Usyuluke, ulimbikwe mucisiŵa! kale wamumfweni.

7Sombi apa pali mweŵo mbaninani uli nemupyunjisi ulukulima neli kwembela imbelele, ukalaŵila kuli ye, kani ainjila ukufuma kumaŵala, ati: Kawisa bwaŋgu, wikale, ulukulya! 8sombi utaakalaŵila tanje cine kuli ye ati: Kawansika ifyo ifi nakulya neŵo, ufwale, ulukuntaŵataŵila, ili nsiŋgalya nekunwa; telyo pantanjile naweŵo wakulya nekunwa. 9Kani alamutota umupyunjisi, pakuti alicitile'fyo-fintu ifyafundilwe? 10Fyopele'fyo namweŵo, ili mukasila ifintu fyonse ifyafundilwe kuli mweŵo, mukalaŵile ati: Tuli ŵapyunjisi lukoso; twacita fyeŋke'fyo ifyelelwe fweŵo ukucita.

11Lomba, ili ŵalukuya kuJelusalemi, paliŵele ati ŵalipitile pakati pafyalo fyaŵaSamalya neŵaGalili. 12Peŋka, pakwinjila mumusi umbi, ŵalikumene naŵo aŵantu ikumi aŵamanata, aŵaimakene ukutali: 13naŵo ŵaliŵilicisye ati: Mwewa Yesu, mweŵaSikulu, mutucitile' ŋkumbu! 14Ili ŵaŵabwene, ŵalilaŵile kuli ŵo ati: Kamuyeni, mulibwenesye kuŵapapatilisi. Lomba, ili ŵalukuya, paliŵele ati fyalipolele. 15Peŋka umbi, ili abwene ati fyapola, alialulucile, ili aŵalemya ŵaLesa nesiwi'likulu; 16naye aliifuneme muceni caŵaYesu, ukuŵatota; uyo muSamalya. 17Naŵo ŵaYesu ŵaliasucile ati: Kansi taŵali ikumi aŵaposiŵa? Sombi mbaaŵo ŵasanu naŵane, ŵali kulipi? 18Tapabwenekele aŵakubwela mukuŵapela ŵaLesa uwuteme, sombi eŋko'yu-mwensu? 19Kaŵili ŵalilaŵile kuli ye ati: Ima, ulukuya! Ukucetekela koŵe kwakukosya weŵo!

20Lomba aŵaFalisi ŵaliŵepwisye ifyampindi yakwisa Uŵufumu bwaŵaLesa, naŵo ŵaliŵaasucile ati: Uŵufumu bwaŵaLesa taŵukesa-po apabwenekele. 21Kaŵili taŵakalaŵila ati: Uŵu wule! neli ati: Ŵulya wule! pakuti ŵoneni, Uŵufumu bwaŵaLesa ŵuli pakati pali mweŵo.

22Kaŵili ŵalilaŵile kuŵasambile ati: Insiku sikesa, isi mukafwayo'kuŵona akasuŵa kamo akaMwana waMuntunsi, sombi tamukakaŵona-po. 23Lomba ŵakalaŵila kuli mweŵo ati: Ŵoneni kulya! Ŵoneni kuno! peŋka tekuya neli kuŵalonda, koku. 24Pakuti, koti kampesimpesi ili kaŵyata kuluŵali lumbi lweulu, kalapena ukufika kuluŵali lumbi Iweulu: fyopele'fyo neMwana waMuntunsi efi akawa pakasuŵa kakwe. 25Sombi ukumwelelwa ati akataŋge akasomenwe kufintu ifinji, nekukanwa kucitentekwa cino. 26Lomba koti nifyopele' fyo ifi fyacitilwe pansiku syakwe Noa, fyopele'fyo fikaŵa napansiku syaMwana waMuntunsi. 27Ŵalukulya nekulukunwa, ŵalukuupa nekuupwa, ukuficila akasuŵa ako ainjile Noa mubwato, nekwisa uŵuloŵe, nekuŵonala ŵonse.

28Koti nifyopele'fyo ifyacitilwe pansiku syakwe Loti; ŵalukulya nekulukunwa, ŵalukuula nekuulisya, ŵalukuŵyala nekwiŵaka; 29sombi akasuŵa ako afumine-mo Loti muSodoma, lomba umulilo nemabwe amulilo alilokele ukufuma kwiulu, nekuŵonala ŵonse: 30koti nifyopele'fyo fikaŵa pakasuŵa ako aka Umwana waMuntunsi akaŵoneka. 31Akasuŵa ako, uyo ukalukuli peulu pananda, uli nemaŵoni akwe mukati muŋanda, tekuseluka-po mukwafumya; nawoyo naye, ukalukuli mwiŵala, fyopele' fyo tekubwelela-ko. 32Mulaŋguluke umukasi wakwe Loti. 33Aŵantu wonse ukesya ukubwena-po umweo wakwe, akaulufya: sombi aŵantu ŵonse ukaulufya, uyo eukaupulusya. 34Ndukumuŵuleni ati, uŵusiku uŵo pakalukuli ŵaŵili paŵulo ŵumo; umo akapokwa, umuŵyakwe akasiwa. 35Aŵanakasi ŵaŵili ŵakalukupelela pamo; umo akapokwa, umuŵyakwe akasiwa. 36Aŵantu ŵaŵili ŵakalukuli kumaŵala; umo akapokwa, umuŵyakwe akasiwa. 37Naŵo ŵaliŵaasucile ati: Mbanikulipi, mweŵaSikulu? Naŵo ŵalilaŵile kuli ŵo ati: Apo apali icitumbi, peŋka'po nemoni nao akawuŋgana.

Currently Selected:

Luku 17: AAL59

Highlight

Copy