Luku 6

1Lomba akasuŵa kasabata kambi ŵalukwenda mumaŵala atiligu; neŵasambile ŵaŵo ŵalikonwene ifikola fyatiligu, nekulukulya, ili ŵanyokosa mumapi. 2Sombi aŵaFalisi ŵambi ŵalilaŵile ati: Mbanindo mulukucitile'fyo ifitafyelelwe ukucita pakasuŵa kasabata? 3NaŵaYesunaŵoŵaliŵaasucileati: Tamupendele nafifi ifi acitile Dafidi, ili aumfwile insala, naŵaŵo aŵo ali naŵo; 4ati aliinjile muŋanda yaŵaLesa, nekuŵula nekulukulya ŵasiŋkwa ŵaŵumboni, nekupela naŵaŵo aŵo ali naŵo; ifyo tafyelelwe ukufilya ŵo sombi ŵapapatilisi weŋka? 5Kaŵili ŵalilaŵile kuli ŵo ati: Umwana waMuntunsi eMwine wasabata!

6Peŋka pakasuŵa nakambi akasabata paliŵele ati ŵaliinjile mwisunagoge nekulukusambisya; kaŵili emwali nemuntu umbi uwali nekuŵoko kwalwine ukupapile. 7Lomba aŵalembesi neŵaFalisi ŵaliŵacetele, ati kani ŵakuŵusya pakasuŵa kasabata; ati tuŵone icakuŵasininina-ko. 8Sombi ŵaliisiŵile ukulaŋguluka kwaŵo; nekulaŵila kumuntu uwali nekuŵoko ukupapile ati: Ima, wiminine pakati! Naye aliimine nekwimakana. 9Peŋka ŵaYesu ŵalilaŵile kuli ŵo ati: Ndukumwipusyeni ati—Kani ukwelelwa pakasuŵa kasabata ukucite'fiweme, kani kucite'fiŵipile? Kani kupulusyo'mweo, kani kuwonala? 10Naŵo nekulaŋga-laŋga kuli ŵo ŵonse, nekulaŵila kuli ye ati: Tambiko'kuŵoko koŵe! Naye nekutambika; peŋka nekuŵoko kwakwe nekukosa. 11Sombi naŵo ŵaliŵele nekupuputwa; nekulukufundana ati-mbatucite'ndo kuli ŵaYesu?

12Lomba insiku isyo paliŵele ati ŵalifumine ukuya kulupili mukutembela; uŵusiku nekucela-mo umwakutembelela kuli ŵaLesa. 13Pakweŵa'ti bwaca ŵaliŵetile aŵasambile ŵaŵo, nekusalulula peŵumba lyaŵo ikumi naŵaŵili; ŵopele aŵo ŵaliŵelicile ati nintanjisi. 14Aŵo niSimoni, uyo uyu ŵailicile ati niPetilo, naAndaleya umukwaŵo, naJakobo, naYoane, naFilipo, naBatolomayo, 15naMatayo, naTomasi, najakobo umwana wakwe Alifayo, naSimoni uwailicilwe ati niSelote, 16naJuda umwana wakwe Jakobo, naJuda lsikaliote wopele uwaŵaalucile. 17Lomba ŵaliselucile pamo naŵo, nekwimakana apaseleŵele, pamo neŵasambile ŵaŵo iŵumba ilikulu, neŵantu aŵenji awafumine kucalo conse icaludiya nakuJelusalemi nakumbali yacisiŵa iyakuTulo naSidono, aŵaisile mukuŵomfwa, nekuŵusiwa kumalwele aŵo; 18naŵaŵo aŵakatasiwe kumipa si iŵipile ŵaliŵusiwe. 19Lomba aŵantu ŵonse iŵumbe'lyo ŵalukufwaya ukuŵakumako; pakuti amakosa alukufuma kuli ŵo, nekuŵaŵusya ŵonse.

20Peŋka ŵaliceŵucile paŵasambile ŵaŵo, nekulawila ati: Mulisyucile mwewapeŋgele, pakuti Uŵufumu bwaŵaLesa bwenu. 21Mulisyucile mwemulukumfwe'nsala ŵukumo, pakuti mukekuta. Mulisyucile mwemulukulila ŵukumo, pakuti mukalukuseka. 22Mulisyucile pakulukumufitilweni aŵantu, nekumuposyeni, nekulukumutoŋgaleni, nekutipisya amasina enu ati aŵipile, pakuti paMwana waMuntu nsi. 23Saŋgalaleni akokasuŵa, mulukusotoka pakuti paku temwa; pakuti, umfweni, ukulambulwa kwenu kwiulu kukulu: pakuti fyopele' fyo efi ŵacitile ŵawisiŵo kuŵakusimika!

24Sombi mweŵo mulisyeme, mweŵasambasi! pakuti mwapoka'kale ifyakusaŋgalasya fyenu. 25Mweŵo mulisyeme, mwemwikutile ŵukumo! pakuti mukalukumfwe'nsala. Mulisyeme, mwemulukuseka ŵukumo! pakuti mukalukulile'misowa. 26Mulisyeme mweŵo, pakulukumutemasyeni aŵantu ŵonse! pakuti fyopele'fyo efi ŵacitile ŵawisiŵo kuwakusimika aŵakutumpaika.

27Sombi ndukulaŵila kuli mweŵo, mwemulukumfwa, ati: Mulukutemwa utupondo twenu, nekulukuŵacitile'fiweme aŵo aŵalukumufitilweni. 28Mulukuŵacindika aŵo awalukumufiŋgeni; mulukuŵatembelela kuli ŵaLesa aŵo aŵalukumukululusyeni. 29Kuli woyo uwakukupama palutoŵo, koteya-ko nalumbi nalo; nawoyo uwakupokolola iŋguwo yoŵe, tekumukanya ukupoka nemwinjila woŵe. 30Mulukupela aŵantu ŵonse aŵakumulombeni; nawoyo uwakupokolola ifintu fyenu, tekufilomba liŵili. 31Kaŵili koti nifyopele'fyo ifi mulukufwaya ati aŵantu ŵamucitileni, kamuŵacitila namweŵo fyopele'fyo. 32Pakuti kani mulaŵatemwa aŵo aŵamutemweni, mbafisa-fyakutotwa muli nafyo? pakuti nembifi nasyo silaŵatemwa aŵo aŵasitemwa. 33Kaŵili kani mulaŵacitila ifiweme aŵo aŵamucitileni ifiweme, mbafisa-fyakutotwa muli nafyo? pakuti nembifi nasyo silacita fyopele'fyo. 34Nakaŵili kani mulaapwisya kuli ŵaŵo, aŵa mucetekela ati tukapoka, mbafisa-fyakutotwa muli nafyo? imbifi nasyo silaapwisya kumbifi, nekulukupoka liŵili fyopele'fyo.

35Sombi mulukutemwa utupondo twenu, nekulukucite'fiweme, nekulukwapwisya ukwakuŵulo'kulikutumika; lomba ukulambulwa kwenu kukalukuli kukulu, mweŵo mukaŵa ŵana ŵaŴaŵo Aŵacilile; pakuti ŵo ŵali neŋkumbu kuli ŵaŵo aŵakuŵulo'kutota, nakuŵakuŵifya. 36Mweŵo muŵe neŋkumbu koti nifyopele'fyo ifi ŵaWisinwe ŵali neŋkumbu. 37Nakaŵili tekulukuŵeŵa' ŵantu, eli tamukebwa namweŵo; kaŵili tekulukuŵasinina, eli tamukasininwa namweŵo: kamukakulula, lomba namweŵo mukakakululwa; 38kamupela, popele fikapelwa nakuli mweŵo; ifyakwesya ifiweme, ifisindailwe, ifisunsilwe nefyakusempaka ŵakamupeleni pantiŵi yenu. Pakuti necakwesya ico ici mwesya, copele'co cikesiwa kuli mweŵo liŵili.

39Nakaŵili ŵalilaŵile kuli ŵo ukupalanya ati: Kani impofu iliisi ukukulika impofu iŵyakwe? Kansi syoŵilo tasikaponena-mo mucilindi? 40Umusambile taacila-po pamusambisi wakwe: sombi ŵonse, ukakonsiwa aka ŵa koti musambisi wakwe. 41Mbanindo ulukutontomekela uwuŋgululu bwamulinso lyamuŵyoŵe, nekuwulo'kulaŋguluka iciti icamulinso lyowe wemwine? 42Neli, mbasyani uŋgalawila kumuŵyoŵe ati—Wemwame, nsiŵule-mo uwuŋgululu ubwamulinso lyoŵe! ili taulukuŵona wemwine iciti icamulinso lyoŵe? Wewakutumpaika, utaŋge usiŵule-mo iciti mulinso lyoŵe wemwine, eli wakuŵona bwino ukusiŵula uwuŋgululu ubwamulinso lyamuŵyoŵe.

43Pakuti tapali-po umuti uweme uwikate'fisepo ifiŵipile, neli muti uŵipile uwikate'fisepo ifiweme. 44Pakuti imiti yonse, ŵalawisiŵila kufisepo fyauo. Pakuti kumyuŋga aŵantu taŵaswa-ko iŋkuyu, neli nikucinsokela camvuŋga taŵaswa-ko imfaina. 45Umuntu uweme kuŵuŵoni uŵuweme ubwamumutima wakwe alabwenesya ifiweme, nawoyo uŵipile naye kuŵuŵipile alabwenesya ifiŵipile; pakuti kukufula kwamumutima akanwa kakwe ekalaŵila.

46Kaŵili, mbanindo munjitila ati: MweŵaSikulu! MweŵaSikulu! nekuŵuloʼkucita ifintu ifyo ifi ndaŵila? 47Aŵantu wonse uwakwisa kuli neŵo, nekulukumfwa amasiwi anji, nekulukwacita, nakumubwenesyeni uyo uapalile. 48Ali koti muntu uwaiŵeke iŋanda, uwatulile pansi apatali, nekuŵumba icakwiŵacilapo pacibwe: lomba ili bwaŵucile uŵuloŵe, amenda alilikuncile-ko kunanda iyo, sombi taesiŵile ukwiteŋkanya; pakuti yaliiŵekwe bwino. 49Sombi uyo uwakumfwa nekuŵulo'kucita ali koti muntu uwaiŵeke iŋanda peloŵa apakuŵula icakwiŵacila-po pansi; kuli yeyo amenda alilikuncile-ko; peŋka yalipulilile ukukulaka; nekufwa kwananda iyo kwali kukulu.

Currently Selected:

Luku 6: AAL59

Highlight

Copy