Mak 4

U haharueina tara katuun te tsihasein a man ngal

(Matiu 13:1-9, Luk 8:4-8)

1E Iesu e tanian hihatuts ia i rehina Ramun a Perperere i Galili. U katuun u parpara koru ti gono hahiseien, ba nonei e osana turu bout me gumuna. U bout e agaia i ramun ba u katuun te tuol ria i mounsingmou. 2-3Nonei e hatuts raien a ka a parpara turu rangan haharuei. Na u töa u haharuei e markato uu teka:

“Hengoiam. A katuun ena tsihasein a man ngalin leba. 4Pöata te tsihasa naien a man ngal ba palaina a man ngal e pururuku ria i maroro bu apena e la rima memi nou hakape ren. 5Ba palaina a man ngal i pururuku ia turu tsiktsiki te ka mei u lapo ba nori e pusuku boroboro tunur, taraha u tsiktsiki ema para ii. 6Ba tara pöata te pirima a pitala, ba man kaan leba teka e magmagolona me langor, taraha e möa ta makum tega silaia u poloso. 7Ba palaina a man ngal e pururuku ria turu tsiktsiki te ka mei a kolits a hihitoka, bu kolits e panir me pil hohomier a man kaan leba teka, ba nori ema hua ri. 8A palair a man ngal i pururukuia turu tsiktsiki u niga be panir me hua hobotor. A palai ima hua balai, na palai i hua haniga, na palai i hua hapara koru.”

9Be Iesu e poeiena, “A katuun te atein hengona ega hengo haniga.”

A mouna a man haharuei tere Iesu

(Matiu 13:10-17, Luk 8:9-10)

10Tara pöata te ka pepeisaia e Iesu ba maloto na huol a katunun tsitsilo i tanen na palair u katuun ti ka gono meien e larima, memi rangate rien tego ranga hatarare menaien a mouna a man haharuei. 11Ba nonei e ranga palis ranen me poeiena, “E Sunahan e haröto ranei limiou a ka tema hatara raien u katuun i manasa. Alimiou e atei silemiou ime temar pepeito kap uanen. Kaba u katuun tema atei sileri ime temar pepeito kap uana e Sunahan, nori e hengo las ria turu rangan haharuei tuun. 12E Aisaia a propet tere Sunahan e kolotein a ka teka i manasa me poeiena,

‘Nori e tara riou bate tara tuun talasir, kaba nori ema tara hamana koru roi.

Na nori e hahengo riou bate hengo tuun talasir, kaba ema atei hamana koru roi.

Taraha, nori e raman habirits pouts uaier i tar tego luba menai lia a man markato a man omi i taren.’”

E Iesu e ranga hatararein u haharuei

(Matiu 13:18-23, Luk 8:11-15)

13Be Iesu e ranga lel meranen me poeiena, “Alimiou ema atei sile mi temar mouna uana u haharuei teka? Ga ime temar atei sil mena moi limiou a man taina man haharuei? 14A katuun te tsihasa nena a man ngal e hahusena u raranga tere Sunahan. 15A man ngal te pururukuia i maroro e here ri u katuun te hengoer u raranga batema pina nei be Satan temi gulena u raranga te lu menarien i toriren. 16U tsiktsiki te ka mena u lapo e here nei u katuun te hengoer u raranga tere Sunahan bate sasaala meren. 17Kaba ema tasu hatsiruku bala nei ba pöata te butu nama a pöata a omi, u nihamana i taren tere Sunahan e taia ba ranen.

18“U tsiktsiki te ka mena u kolits u hihitoka e here nei a palair u katuun te hengoer u raranga. 19Kaba nori e hakats koru ner a mamanakana i puta bate ngilin lu ner ta moni pan, bate matesil koruer tegi lu menai ta palaina ta ka. Na mamanaka teka e butu talana bate pil kap nena u raranga tere Sunahan, bu raranga i tanen tema habutu talenei ta markato ta niga turu katuun teka. 20Na u tsiktsiki u niga e here nei a palair u katuun te hengoeier u raranga tere Sunahan bate pile kap naren, ba u raranga i tanen te kato haniga rena u katuun teka. A palair u katuun e nigar, na palai e niga korur, na palai e niga bala korur.”

A kalobaka e kopo kap nena u lam

(Luk 8:16-18)

21Be Iesu e rangana i taren me poeiena, “Aha te katoena a katuun te tasu menama u lam? Nonei emi kopo kap naneien a tabeli, tsi emi hakei nen i kopina a inana? E möa. Nonei ega hakaseien iasa. 22Ba mamanaka hoboto te mousuna, te atei sile riou i murimuri. Na u mamana u ranga i tar tema atei sile ri u katuun i romana, nori e atei sile rouen i murimuri. 23A katuun te kamena u talinga ega hengo haniga.”

24Ba nonei e poeiena i taren, “A manka te hengoe milimiou alimiou go hengo hanige men. E Sunahan e hala hantuna nanou a niatei i tamölö temar hengo haniga has uamölö, ba lö te lu lel noahas mou. 25A katuun te ateina, e Sunahan e hala lel noahase noien a niatei. Na katuun te raman ateina, e Sunahan e luba nanou a tsitabubun niatei te ka menen.”

U haharuei tara ngal te pusukuna

26Be Iesu e ranga lenina me poeiena, “U haharuei teka e haröto ranei limiou temar butu uana a Nipepeito tere Sunahan. A katuun ena tsihasa nena u ngalin wit turu tsiktsiki. 27Ba nonei te sohona tara bong ba lan ba man ngal te bututuna bate panina, kaba a katuun ema atei silenei ime temar pusuku uanen. 28U tsiktsiki peisa te habututena a kaan leba bate huana, a gohus te butu mamina ba holaka te töan butuna ba hua a tangoho te töan butuna. 29Kaba a pöata te tangoho hakapana a hua turu wit ba katuun te kete mena u kilata u köela batena kotsena a hua turu wit, taraha a pöata tega tangohomei u wit e butu hakapa.”

U haharuei turu ngalin mastet

(Matiu 13:31-32,34, Luk 13:18-19)

30Be Iesu e ranga lenina me poeiena, “Ara e tatei poeiera a Nipepeito tere Sunahan e here nei a saha ka? Na u saha u haharuei te tatei hatarare ranera temar pepeito kap uana e Sunahan? 31Nonei e here nei a ngalin mastet te tetenei koruna tara man ngal hoboto. Ba katuun te lue nen batena sapul nanen turu tsiktsiki. 32Ba nonei te pusukuna bate pan bala nena man taiana man kaan leba. Bate taholakana bate kamena a man hikalan pan bu apena temi tö ria i taren bate kuieier a man suhana i taren turu uoho i tanen. Na Nipepeito tere Sunahan e tania hatetenei hasina bate pan susuluna.”

33E Iesu e habulungana nena u raranga i tanen turu katuun, e hihinatue gono has mei a man taina man haharuei. Nonei e haharuei hapopo has ia timar atei hantuna uaien. 34Nonei e roron ranga tuun las meraien turu haharuei. Kaba te ka pepeisa gono meraia e Iesu u katunun tsitsilo i tanen, ba nonei te ranga hatarare mera neien a mamanaka hoboto.

E Iesu e haselohi a lomolomo

(Matiu 8:23-27, Luk 8:22-25)

35Turu lan teka te katsin bong ma a ka be Iesu e poeiena turu katunun tsitsilo i tanen, “Aragi aroho uu i hapalana a ramun.” 36Ba nori e laba raier u katuun u parpara koru, ba nori ena osa ria turu bout te gum ia e Iesu, ba nori e la gono meren. Na palaina a man bout i ka has. 37Ba u pan nen u ualupu e takei nama bu ramun e posa hongo uana iahana u bout, ba u bout e katsin saputena u ramun. 38E Iesu e kaia i pal murimuri turu bout te sohoien bate ha oulanena a bakunen turu pilo. Ba u katunun tsitsilo e gulie ren me poeier, “O Tson Hihatuts, alö ma taatagi rami lam? Ara e katsin taia talara.”

39Be Iesu e takeina me hasalohena a lomolomo me abisena u keikei me poeiena, “Opö hakakamoto.” Ba lomolomo na u keikei e kapa nitöana ba pan nen a seloho e butu poutsuna. 40Be Iesu e rangana i taren me poeiena, “E hana ba limiou te matout korumiou? Alimiou ema hamana mi?”

41Kaba nori i matout koru me hiarangrangatar, “A saha koru a mar katuun teka? Ba lomolomo na u keikei te hengoe nen.”

Currently Selected:

Mak 4: HLA 2020

Highlight

Copy