Aposel 20
20
Pol nafe' etap hiagoma Masedonia esis Grik sapoma
1Esis sa'i basef awanami, Pol nofalai esis Kristen safi'mai anan, na'ipasa anom basef nanda' opalef asasimi mataga la'ifim. Ea' nanda'masa nemaf bu'unai esis nakwahis nafe' etap hiagoma Masedonia. 2Anan nafe' anama hiagoma nawalipasa basef hiami esis Kristen nanda' opalef asasimi mataga la'ifim. Ea' nafe' nataga etap hiagoma esis Grik sapoma. 3Anan nape aomb wanom etap anama. Na'i nofa' sip nefe etap hiagoma Siria ea' nogawa esis Juda sa'i basef sandame'mama sohana noga'. Ea' nanindifa okom ananinai na'i notanima nefe' nuwis etap hiagoma Masedonia la'afen. 4Sopater Beriainai, Pirus nogalomana nafe' nalomana. Ea' amam biam Tesalonaikaimi Aristarkus naloma Sekundus naloma Gaius Derbeinai. Naloma Timoti maloma amam biam Esiaimi Tikikus naloma Trofimus, amam amama mafe' maloma Pol. 5Amam mali'afa mafe' mape mohafafa Troas. 6Nimeguf amama esis Juda sagwa' gwa'aimi saloma bret owa' niatifi, yis a'anai. Nimeguf amama mafe'ma hi'alam, afa' walata anona sip wakwaha Filipai ea' wafe'. Wafe', nimeguf wanom biam mafe' hi'alam watagama amam mali' mafi'i Troas mape wik si'ina.
Pol nafela Yutikus Troasinai nohafel nape namunai wapoti'
7Nemaf Sarere owamb afa' wandakolas waloma esis Kristen ma' gwa'aimi atogon ea' mofa' komunion gwa'aimi Jisasi. Naman Pol na'i nefe'. Na'ama nawalipasa basef nafe' nafe' akita amanota. 8Rum anama lamifah hiami motaol anama ape' mandatama etifigin mapoma ilif.
9Ea' anona aman so'unai agilinama Yutikus natoma windoa. Pol ata' na'i basef mafe' etin, Yutikus ambeh mahana naep ma'i mose'ana na'oh ea' na'oh nelola endilisi. Rum anama wenifina nape ilifi la'afen, anan nowai gani ilif laogoma nafe' etap. Ea' esis sisila' safe' sofa'anai ea' sati afuna endilisi. 10Ea' Pol nisila' nasisil nowa natoma aman anama so'unai nahapila lagel ananinai na'iam na'i, “Ipe' ina pehafel gegelalasipa ukup aom, owa'. Ambal ata' napaina.”
11Ea' Pol nao'was sotanima salata ipat ilif wapoti', nawala bret sa'ana. Ea' Pol na'i basef laumi wapoti' nalomas nafe' nataga lala. Ea' Pol nakwahis nafe'. 12Aman anama so'unai nape namunai ambal napaina ea' sofa'ana safe' sambe'ana ipat ananinai, opalef asasimi ambo'om wapoti'.
Pol nakwaha Troas nafe' Miletus
13Afa' wali' wafe' walata sip ea' wafe' wataga Asos. Afa' wa'i ogolopa Pol Asos ofa'ana ofe' sip. Dei' main, do'ok Pol nali' na'ipafa basef na'i nili' nefe' etap notaga Asos. 14Ea' Pol nafi'i natolofa wambel anama Asos ea' ofa'ana wafe' sip wafe' Mitilini. 15Ea' sip nofa'afa wakwaha Mitilini wa'oh ama lala wataga felefele'ma anona ailan Kios. Ea' wa'oh lala wafe' wataga anona ailan Samos. Ea' wa'oh lala wafe' wataga Miletus. 16Pol nanindifa okom ananinai la'ifina na'i amam mikila' Efesus. Anan nandaiwa'ma nope etin anom nimeguf etap hiagoma Esia, owa'. Na'i nefe' ulal Jerusalem nemaf anama sa'i Pentikos.
Pol na'i basef bu'wami naloma agufumi mumafi esis Kristen sape Efesusi
17Afa' wataga Miletus, Pol nasapa' basef mafe' Efesus nofala amam agufumi esis Kristeni mufi'mai anan. 18Ea' mafi'i matagamana na'ipam na'i,
“Ipe' pegawa ma waf ae' ali' anda'ana nemaf nali'i dambadamba anama ae' ataga etap hiagoma Esia la'ela'ef ape alomepa. 19Ipe' pegawa nimeguf hiami la'ela'ef esis Juda sa'i basef sa'i sogolope sehe ega'. Amama atom ae' efa' nimanimi magwamba ae'. Owa'. Ae' anda' agel ae'anai nafe' owin endilisi, efa' nimanimi ea' embif maluwi naep ma anda' maol Dembinai. 20Ea' ae' ina umbamahe ma awalapa basef hiami ma agiambamepa, owa'. Anama ipe' pandakolas awalipipa ea' awalipipa ifagw ipe'imi nomon wapoti'. Amama ipe' pegawam. 21Ae' a'i basef la'ifimi ma esis Juda saloma isima owa' Judaisi wapoti' ma sowa' alafugaha waf aonai somboma opalef sefe'ma God, sombale'efa dembinai ape'inai Jisas.
22Ea' ipe' peme', dei' Ambal Bu'unai Godi nafela okom ae'anai aila anan atona. Amama atom dei' ae' efe' Jerusalem. Nambimb maim motagame ganima, ae' ina egawa amamaga amama, owa'. 23Ae' egawa amama atom. Anama ae' afe'ma, wambel hiagoma Ambal Godi nihi'ambe basef la'ifimi na'ama na'i, ‘Ine' nambimb niti esis sese'ena nimanimi ea' sonda'ena nenda' kalabus.’
24Ea' ae' ina okom napoma ambal ae'anai atona nope, owa'. Ea' ina la'ifiwi ma ihapila ambal ae'anai la'ifina, owa'. Ae' a'i ila eaf anama ilana efe' embefana. Ae' a'i enda'ana hi'ilana andeande' maol anama Dembinai Jisas nasi'ianai. Maol anama ewalapa basef bu'wami Godi nagiambamapa na'a nofa'apa motanimani.
25Ea' ipe' peme'. Fowa' ae' afe' la'afena ipe' hipei awalapa basefa epes hiesi siowis nomona wambota Godi numafias. Ea' dei' egawa, namanani ipe' hipei ina piti amaga ae'anai wapoti', owa'. 26Ea' dei' ae' a'ipipa. I'i enin epen ipe'ini awen higililan, amama ina ofagema ae'ami, owa'. Ofagema ipe'imi atom. 27Dei' main, ae' ina umbamahe ma a'ipipa basefa okom hianai Godi, owa'. A'ipipam hi'alam. 28Ipe' pimafi ipe' andeande' ea' pimafi esis amam nematawa isima Ambal Bu'unai Godi nandandepepa ea' ma pimafiasi. Ipe' pindumafuma andeande' ma pimafi esis Kristen sios Godi andeande' si'i sanda' maoli sumafi sipsip andeande'. God natala esis Kristen ea' ma esimbel ananimi atom. 29Ae' egawa atuwasi ikwahipa efe', nambimb anom amam awami si'i nombagw wandafumi mufi'i motaga la'afena ipe' ea' mohambombaga esis Kristen si'i nombagw maha sipsip. 30Ea' enis epes ipe'isi etis sohafel si'i basef baso'maimi atoma somboma ukup esis Kristeni sefe' silas. 31Ipe' dei' pindumafuma andeande' la'ela'ef. Ipe' ukup mopoma amama afagof amama wanom la'ela'ef owamb alip ae' ina apoma noma'w ma awalipipa afela ukup ipe' hipei atona etin, owa'. Awalipipa aloma embif maluwi naep ae'ami.
32Dei' anda'epa ukup mopoma God noloma basef ananimi. Basef amama ma'ipipa Anan okom nainailipa ma nagiambamepa etin. Amama la'ifima monda'epa petaga la'ifipa mose'epa amamaga bu'wami atom God nase'asam amam nematawa anan nanda'as bo'wes ea' Ananisi etis. 33Ae' ina kowalema otamba siliwa gol luwaguf maim enin epeni, owa'. 34Ipe' etipa pegawa ae' atowe anda' maol agiambama ae' aloma amam mape malumai ma anom amamaga a'afa. 35Maol hianai ae'anai, ae' ahi'ambepa ma ape' monda' maol la'ifipa migiambama isima emi egafis owa' la'ifisa sigiambama esesi. Ea' ape' ukup mopoma basef amama Dembinai Jisas na'iami. Anan na'i na'ama na'i, ‘Danifel enin epen nese'as amamaga anasi nikila' danifel epen inima nefa'ami. God nofalo'ma epen inima nikila' inima nefa'asi.’ ”
36Pol nanda' basef amama ma ea', nindiwa nembawa nanda' beten naloma agufumi amama. 37Amam hiami malef kwapete'am mandalulupatanima ea' mombalo' Pol masisi'amana dalogw. 38Doko' Pol nali' na'i basef na'i, “Atuwasi ipe' ina piti amaga ae'anai wapoti', owa'.”
Amam mame' basef ananimi hiami hi'alam. Ea' basef amama tu'wanim atom manda' opalef amamumi nimanim endilisi. Ea' maitumana nafe' nalata sip.
Currently Selected:
Aposel 20: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
