YOUKOIKJAI 10
10
Peter si Kornilia
1Kaisariaa müt che Kornilia dogo nyenan Itali sepai san chenei saongao thüka leiyeibü che kikei. 2Hao hoba haoeibü chemdang kho khümbo kubü hoba Mühghaü to hatbü chemdang che kiteikei, haoei Jihuda mütshuong maila yaangla shanga maangmai onou kümsilei juong kümbei hoba Mühghaü to athakko welaukei. 3Nyetche chasemlamto angh sem thünga haoei mangsanga shangashatko Mühghaëibü khuthük hangangbü che hao jungto louko hapbei, hoba hao to laukei, “Kornilia.” 4Korniliaei hao to laukei, “Yaangbou, aiche sai?” Khuthük hangangbüei hao to laukei, “Kaibü welau hoba maangmai kümsilei khübü khoei Mühghaü junga lousüha, hoba haoei no damena. 5Hibü touje Joppa to müt hautiashi, hoba Peter dogokei nyenbou Simon ngala hautiashi. 6Hao kho yungkoa kibou Simon dogo nyenan phekhun shibou chema sühakei.” 7Ladang hao to joyobou khuthük hangangbü kho satkei, haoeibü chembabü sambü müt nyi hoba hao khangenbü yo ka khümbo kubü langkei sepai che dogo ngabakei. 8Haoei haoen la pendou wanan lenkei hoba Joppa to hautikei.
9Nyibounyet ladang haoen sangnyu sühlamto lamoua hauko kikei, kheijinei Peter chajihboua welaula chemdak to nguikei. 10Hao mühei haikei hoba shaumang sühkei. Haoenei nongeikuko kitoua hao haileleko nyeket shikei, 11hoba haoei müh ipan denche neinyu yaangbü che tegü louyenko hapbei. Kho neithon lei pendoua yaüan kao to lottikei, 12hoba khünei you lei yembü hoba kaoa shanbü meisiau hoba sengbü ausiyuk pendou kiteikei.
13Kheijinei hao jungto ngüh che hai loukei, “Meimeiashi Peter, haitiashi hoba shauashi.” 14Peterei laukei, “Lakabü, Bunyubou, aishanga ngei ladangkei asaüenbü ayingsi asaopobü shauan achühkei.” 15Toukei nyiboukei hao jungto ngüh che loukei, “Mühghaüei ai saopotia, kho nyi asaüenbü dogo telau.” 16Kho semnei sühko haüthükkei hoba insing chenei ong neilop tegübü kho khuthük to anlangkei.
17Ladang Peter haoei hapbü mangsang tetlabü shanga phen- yembo kikei, kheijinei Korniliaei hautibü mütshuong koukhüna lousühkei, hoba Simoneibü chem phekei, 18hoba haoenei Peter dogokei nyenbou Simon kho khünei sühkeilaoje dogo phekei. 19Ladang Peter kho mangsang shangabü mangan apan dameiko kikei, kheijinei Soushouei laukei, “Müt semei no lamda. 20Pienan yanashi; hoba ai ajemtenko haoen yoa hauashi, aieilausi haoen hautibou kho ngo yingkei.” 21Peter haoen jungto yanan laukei, “Kanei lameibü müt kho ngo yingkei. Kan aila loubü?” 22Haoenei laukei, “Saongao thüka leiyeibou Kornilia, ao tangshaibü hoba Mühghaü to soumo hatbü müt hoba Jihuda mütli pendouei aukabü kuenbü müt ki, hao to Saopobü khuthük hangangbü danko no hao chemto ngabaan nyi ai ong lenlaje kho ditashi dogo hao la lenkei.” 23Kheijinei haoei haoen kho hao yenbou la lean leiyetkei.
Nyibounyet kho hao haoen yoa meimeian haukei hoba Joppa ka jaisina atei hao hangkei. 24Nyibounyet kho haoenei Kaisariaa sühlangkei. Kheijinei Korniliaei chempen shuong si jenabou shuong ngashaian hao haiyeiko kikei. 25Ladang Peter atkei Korniliaei hao to shuokyokei hoba haoeibü you junga khüpetan hao to lembei. 26Lausikei Peterei hao phonenko laukei, “Loenashi, ngokei müt ong yingkei.”
27Peterei hao to joyoko chem to atkei hoba müt juong chela shaian hapbei. 28Haoei haoen to laukei, “Kan pendouei ngeakei, Jihudabü che kho küksithang che to jamlayangla ayingsi joyola kho asakkukei. Lausikei ngei aotoche ongkei asaüenbü ayingsi asaopobü dogo alautila shanga Mühghaüei kü la shangashattia. 29Khoei ladang nyi ngo ngala hautikei, kheijinei ngei manga ai ashuko loukei. Hibü ngei pheda, kanei ngo ailache ngada sai?”
30Korniliaei laukei, “Chalou lei dana, ngo angh sem jiha kü chema welauko kikei, kheijinei kü thedanga thupaibü neisimei lean müt che lokei. 31Haoei laukei, ‘Kornilia, kaibü welau dida, hoba kaibü maangmai kümsilei kho Mühghaü thedanga damena. 32Hibü Joppa to hautiashi, hoba Simon, aoto Peter dogokei lauda, hao ngashi. Hao yungkoa kibü Simon, phekhun shibou chema sühakei.’ 33Hibü khoyam ngei no ngala hautikei hoba no hai lousühsi aeibou maikei. Hobaje tou kün pendou Bunyubouei ka la ai lentilaje kho ditla shanga Mühghaü thedanga yoshaiakei.”
Petereibü Songlen
34Kheijinei Peterei haoen to hai lauko lenkei, “Ngühmaia ngei damenda, Mühghaüei the to achühda, 35lausikei phangshuong wekoa aoei Mühghaü to soumo hatda hoba tangshaitham kümda hao khoje haoei sungletda. 36Kho haoei Israelbü shuong jungto Ngühlang Maibü sangmai, pendou thüka Bunyubou Jisu Khrista shanga ngetiko hautibü Ngühlangmaibü kho ki.
37“Baptibü shanga Johanei lenbü ka jaüan Galil ka khangan Jihuda pendoua ai ong haüthükkei kho kanei ngeakei. 38Soushou Saopobü hoba sei yoan Mühghaüei lai Nazaretbü Jisu naangenkei kho kanei ngeakei. Hao maibü kümbo hoba Satanei khonkutibü maitikuko paikei, aishanga Mühghaü hao yoa kikei. 39Hobaje Jihudabü kaonyek hoba Jerusalema kümbü pendou shanga kün aukabü shuong kikei. Haoenei hao peiseia thüngetnyu haitikei. 40Lausikei Mühghaüei hao sembounyeta langngaitikei, hoba hao, 41mütshuong pendou la aying, lausikei kün aoyou Mühghaüei thedangto thama piensapan phokei hoba aoyou hao haibü ka langngaian phaiakei hao yoa liko shaukei yungkei, khübü aukabü shuong la ong haptikei. 42Mütshuong to songlenla hoba langkeibü si haibü ham matjemla Mühghaüei pienbou kho hao ki dogo aukabü kula haoei kün la sakkukei. 43Hao to mailembü wekoei hao nyen danko shabü ap hapda dogo thuseibü shuong pendouei aukabü kuko phinthonbü kho hao ki.”
Küksithang shuongei Soushou Saopobü Sungletbü
44Ladang Peterei kho lauko kikei kheijinei Ngühlang to ditko kibü shuong pendou thükto Soushou Saopobü lotkei. 45Peter yoa loubü Jihudabü mailembü shuong maangpangkei, aishanga küksithang shuong thüktokei Soushou Saopobü khüpan jinkukei, 46aishanga haoenei haoen kho lubü ngühyemakei lauyoko hoba Mühghaü nyen sangko ditkei. Kheijinei Peterei laukei, 47“Habü ho baptikula shanga müt ateije deikei shingekla thükkei sai? Haoeneikei künei tegü Soushou Saopobü sungleda.” 48Hobaje haoei haoen Jisu Khrista nyena baptila shanga maisho lenkei. Kheijinei haoenei hao chalou shijo setngaila shanga sukeijakei.
Currently Selected:
YOUKOIKJAI 10: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
