YOUKOIKJAI 11
11
Jerusalem kabü Lashong to Peter Ngühlang
1Küksithang shuongeikei Mühghaü ngühlang sungleda dogo youkoikjai hoba Jihudaa kibü jaisina shuongei ditkei. 2Ladang Peter Jerusalem to loukei, kipbü danshuongei hao to oyokei. 3Haoenei laukei, “Nyi akipbü mütshuong pean chühkei hoba haoen yoa shauayunga.” 4Hibü Peterei khangbü ka thenei thenko haoen la lenko laukei, 5“Ngo Joppa sangnyua welauko kikei, hoba ngei yemphama mangsang che hapbei. Ngei khuthük ka neinyu yaangbü che phatko neithon leia yaüan lottiko hapbei hoba kü junga shatkei. 6Ngei khüto maangsangko hoba haüko chühkei hoba khünei you lei yembü meisiau, kaoa shanbü meisiau hoba seengbü ausiyuk pendou hapbei. 7Tokei ngei kü to hai lauko ditkei, ‘Meimeiashi Peter, haitiashi hoba shauashi.’ 8Lausikei ngei laukei, ‘Lakabü, Bunyubou, aishanga asaüenbü ayingsi asaopobü aikei kü sembung to atan achühkei.’ 9Khuthük ka ngüh cheei nyibou jongaikei ‘Mühghaüei ai saopotia, kho nyi asaüenbü dogo telau.’ 10Kho semnei sühko haüthükkei, hoba pendou kho khuthük to nyibou tuan langkei. 11Mangde müt sem ngo sühshang to loukei. Haoen kho Kaisaria ka kü jungto hautibü kiteikei. 12Soushouei ngo ai asukatembo haoen yoa haula lenkei. Habü jaisina müt lakkei kü yoto loukei, hoba kün khoeibü chem to atkei. 13Haoei lai küman khuthük hangangbü hao chema loan hao to, ‘Joppa to müt hautiashi, hoba Peter dogokei nyenbou Simon ngala hautishi, 14hoba haoei no hoba ka chemdang pendou lai khümenla kho lenlabü,’ dogo lenko lokei kho kün la lenkei. 15Ngei lau khangan phaia, khangla sen thükto lotbü tegütham Soushou Saopobü haoen thükto lotkei. 16Ngei Johanei laubü kho damenkei, ‘Johanei deia baptikukei; lausikei kan Soushou Saopobüa baptikulabü.’
17“Hibü, sen Bunyubou Jisu Khrista to mailembü yeijinei kubü tegütham Mühghaüei haoenlakei jeteibü jongsak kukei yingalonga, Mühghaü shingeklabü lele ngo tokei ao yingbü?” 18Ladang haoenei kho ditkei haoen lemenbü thakkei; hoba haoenei Mühghaü la soneikangbü kuko laukei, “Touje Mühghaüei Küksithang lakei langkei haplabü lele maangpon sepeibü kua.”
Antiok kabü Lashong
19Tou aoyou Stefen laüa shieikoejinei satyokei haoen Foenika hoba Kupra hoba Antiok sühko aakei, hoba haoenei ngühlang kho Jihudabü la ong lenkei. 20Haoen yoa atje Kupra hoba Kurinibü, ladang haoen Antiok to atkei Küksithang lakei Bunyubou Jisu Khrista Ngühlangmaibü songlenko joyola khangkei. 21Bunyubou ik haoen yoa kikei hoba juongnyu mailembü la yeiko Bunyubou jungto sepeikei. 22Haoen shangabü ngühlangei Jerusalem kabü lashong sühlangkei, hoba haoenei Antiok to Barnaba hautikei. 23Ladang hao sühlangkei hoba Mühghaü onou kibü aukabü hapbei hao olinkei hoba Bunyubou to maangnyu angko kaangkhühtham hatyoan kila shanga haoei haoen pendou thungeikei; 24aishanga hao müt maibü, Soushou Saopobü hoba mailemei shenan kikei. Hobaje mütshang yaang Bunyubou jungto sungbakei. 25Barnaba Tarsas to Saul lamla haukei, 26hoba ladang hao haüyokei haoei hao Antiok to leibakei. Po che sünga haosi lashong to phenyoan kikei hoba mütshang yaang la songlenkei. Eikshuong to Antioka shaang Khristan shuong dogo ngakei.
27Khübü chaloua thuseibü shuong Jerusalem ka Antiok to yankei. 28Haoen yoa Agaba dogo nyenan müt che loenkei hoba kaonyudak pendoua mühsinou yaang loulabü dogo Soushouei tetenko lenkei.
Kho Klaudia jihsiphaia haüthükkei. 29Eikshuong luluei thükbüei Jihuda kabü jaisina shuong la thuibü hautila maangangenkei. 30Haoenei khei kümbei hoba Barnaba si Paul ik danko jaishou shuong la hautikukei.
Currently Selected:
YOUKOIKJAI 11: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
