YOUKOIKJAI 14
14
Ikoniaa
1Ikoniaa kei haoen Jihudabü sinagog to atkei hoba Jihudabü si Grikbü shuong yaangbü che mailembü la yeilabü lele lauenkei. 2Lausikei maialembü Jihudabü shuongei Küksithang maangpon pühnyinkei hoba jaisinasi shuong khulimbo khüjin khaüjintikei. 3Haoenei khünei Bunyubou to maanglem phoan hau kiko ngüh lauko chalou lounyu dantikei, hoba onoubü ngühlang kho Bunyubouei haoen la sei hoba maangpanglabü hau kuko sungletkei. 4Touje sangnyu kabü mütshuong kho Jihudabü ae hoba at eikshuong ae yeiko janyinkei. 5Ladang Jihudabü si Küksithang ham yoa leiyeibü dan yoan haoen amaiko jungeiko laangei tetla huonkei, 6haoenei kho lapenkei hoba haoen Lukonia kabü Lustra si Derbi sangnyu hoba lepsanga sühko satkei. 7Khüneikei haoenei Ngühlang Maibü songlenkei.
Lustra si Derbea
8Lustraa ladangkei haoeibü you jungeian achühbü müt che kikei. Hao bukjineithama sokebü hoba ladangkei apai. 9Hao Paulei laubü ditko setkei. Paulei hao to tangko chühkei, hoba kho mailabü lele hao to mailem kibü chühenan 10haoei ngüh yaangbüei laukei, “Kaibü youei tangshaitham loashi.”
Müt khoei saikolakko loenan paikei. 11Ladang mütshuongei Paulei kümbü kho hapbei, haoenei Lukonia ngühyema ngekkei, “Mühghaü shuong mütmai la yeian sen jungto lotakei.” 12Haoenei Barnaba la Zea nyenkukei hoba Paul la Herme, aieilausi kongnyubou ngühlaubou kho hao kiteikei. 13Sangnyu bakhün aenei lemshang kibou Zea ungshedbou shuongei noknyüh thedanga lembü kumang sühko bakhün to masu pongsu si chipen yak sungbakei. 14Ladang eik nyi, Barnaba si Paulei kho ditkei haosiei maangshatei nei jitnyinkei hoba shuong yoto hai 15#NC 33.6 phangko tomjung atkei, “Mütshuong, kanei aila hai jungeida? Künkei kan tegübü ong, khuthük si kaodak hoba yungnyu hoba khonei kibü pendou kümbou langkeibü Mühghaü jungto ho tegübü jim akibü hangsilam ka kan nasepeia dogo künei kan la Ngühlang Maibü songlenda. 16Danbü meten haoei phangshuong pendou jembü lam to haula sakkua. 17Khei yingasikei haoei mütshuong kho haoeibü aukabü ayoko üpyo. Haoei khuthük ka lang yantiko hoba shusiphon jihsiphai hautiko haoeibü sanou kan to lenkei, hoba haoei kan shaueiyungei senyühshemtida hoba kaneibü maangpon olinbüei shentida.” 18Kheinyu lenkokei haosi to lemla loubü shuong kho haosiei ushaleko ong shingekkei. 19Lausikei Pisidia kabü Antiok si Ikonia ka Jihudabü shuong lousühkei. Haoenei shuong kho phokthetan Paul to laangei sonkei hoba haia dogo daman sangnyu aiko senlangkei. 20Lausikei ladang eikshuongei kaijembei kheijinei hao laksepbei hoba sangnyu to atkei. Nyibounyet hao Barnaba yoa Derbe to haukei.
Siriaa Antiok to Longeibü
21Haosiei kho sangnyubü to Ngühlang Maibü lenkei, hoba eik juong haatian phaia haoen Lustra, Ikonia hoba Pisidia kabü Antiok to ngaikei. 22Haoenei eikshuong hau kitikei hoba mailema ngühmaang lanko khüpla shanga hai laukei, “Khonku juongnyu danthetko ong sen Mühghaü Sangle to atjan ki.”
23Haoenei lashong wekoa jaishou shuong heenkukei, hoba mühei nyengko welauan phaia haoenei mailembü Bunyubou la haoen khümbo nongtian phokukei. 24Haoen Pisidia danko hauan phaia Pamfilia to loukei, 25hoba haoenei Pergaa songlenan phaia haoen Atalia to loukei. 26Khüka haoen, laobou kaoena Mühghaü onoua kümlaleila nongkubü tou khümtia, kho Antiok to longa haukei.
27Sühlangan phaia lashongbü chela kamtian Mühghaüei haoen jungeibü hoba haoei ailai Küksithang shuong la mailem koukhün ipbukei kho ngühlang lenkei. 28Hobaje haoen eikshuong yoa chalou lounyu thüngkei.
Currently Selected:
YOUKOIKJAI 14: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
