YOUKOIKJAI 15
15
Jerusalema Kambü
1Jihuda ka müt at yanan jaisina shuong to haoenkei Mosa songa kakbü tegü akiplonga khümenla athüklabü dogo lenkei. 2Paul si Barnabaei haoen to ngühthang ayenko kaang wetyoko lemenkei, hibü haoenei kho lemenbü ngüh kho shanga Paul si Barnaba yo to haoen ka at yoan Jerusalem to hangangbü shuong si jaishou shuong jungto haula lamlekei.
3Haoen lama lashongbüei thuiyoko hautikei, hoba haoen Foenika si Samaria danko Küksithang shuong maangpon sepeibü lenko haukei; hoba haoenei jaisinasi shuong pendou la olinbü yaang kukei. 4Ladang haoenei Jerusalem sühkei, lashong hoba hangangbü shuong hoba jaishou shuong pendouei haoen olinko sungletkei, hoba haoenei Mühghaüei haoen lai jungeikei kho lenkei. 5Lausikei Farisibü dan yoa mailembü atei loenan, Küksithang shuong kipjan hoba Mosa ngühkhüm jungeila lenjan dogo laukei.
6Kheijinei youkoikjai si jaishou shuong kho ngüh daman chühla shanga kambei. 7Ngüh juong wetyoan phaia Peter loenkei hoba haoen to laukei, “Jaisinasi shuong, ngo danko Küksithang shuongei Ngühlang Maibü ditlabü hoba mailemlabü shanga shangieda ngo kan yo ka pienkei dogo kanei ngeakei. 8Hobaje maangpon ngebou Mühghaüei, sen la kubü tegü haoenlakei Soushou Saopobü kuko haoen sungletbü aukabü lekei. 9Haoei sen si hao aoa ai abangnyin, aishanga mailemei haoei haoeneibü maangpon asaüenkukei. 10Laobou buleng seneibü pisibou ayingsi senei asüh kho mailembü shuongeibü ngüma jinkuko kanei aila Mühghaü takteida? 11Khei aying, Bunyubou Jisueibü onou danko sen si haoen jetei khümenkei dogo senei mailemda.”
12Shuong pendou küpjembei hoba Barnaba si Paulei haoen danko Mühghaüei Küksithang yoa sei hoba maangpanglabü kümbü pendou thenan lenbü to ditko setkei. 13Ladang haosiei laukhümbei Jakobei thenkei, “Jaisinasi shuong, kü to ditkai. 14Küksithang ka hao shanga phangshuong che longtila shanga Mühghaüei shaanglathama lai thounoukei kho tou Simonei thenan lena. 15Ho thuseibü ngüh to jiakei; Laishibaei lenda,
16-18 #
Amo 9.11 ‘Kho phaia joubü khunak shousi,
hoba ngei lela ngabü Küksithang pendouei
Bunyubou lamlabü lele ngo longeilabü
hoba ngei Dawid kishang tuongbü kümetlabü.
Ngei kho leilubü kümetlabühoba ho nyibou phonngailabü dogo,
shangiednyu habü ngetibou Bunyubouei lauda.’ #Amo 9.12
19“Hibü, senei Küksithang shuong aoyou Mühghaü jungto sepeia haoen la khonsak akujan, 20lausikei silip jabü shausiyung, asangalanbü, nyatettibü shausi- yung, hoba sii ka bangenan kila shanga senei haoen to le dojan dogo damda. 21Aishanga Mosaei shangiedbü chalou ka thama hao shanga phinthonla phojung loua. Haoeibü ngühkhüm Nounyet weko sinagoga wekei.”
Mailembü Küksithang jungto Dobü Le
22Kheijinei youkoikjai si jaishou shuong yoa kambü shuong pendou yoan, Paul si Barnaba to dangan Antiok to hautilabü müt pienkei. Haoen mailembü yoa leiyeibü shuong Barsaba dogo nyenbou Juda si Sila pienkei. 23Haoenei ngühlang hai dobü hautikei: “Antiok, Siria hoba Kilikia pendoua Küksithang jaisinasi shuong to youkoikjai hoba jaishou jaisinasi shuongei salem küntida. 24Kün yo kabü müt atei, kün to ai apheshuokko louan kaneibü maangpon phenyemtiko ngüh laua dogo künei dida. 25Hibü künei shuong yoka müt at pienan küneibü sanoubü Barnaba si Paul, 26aoyou langkei seneibü Bunyubou Jisu Khrista nyena khümbo kua, haosi yoto hautilabü dogo janenkei. 27Hibü kanei haoen lolo kan la sembungei lenlabü lele Juda si Sila hautida. 28Habü kongnyu phai to liman kan thükto lubü onat ajinyokulabü shanga ho Soushou Saopobü hoba künei janenbü kikei: 29silip jabü shausiyung ka, sii ka, nyatettibü shausiyung pendou ka, hoba asangalanbü ka bangenan kilabü. Kan lolo khüka satenan kialonga aeibou mailabü. Bangmai.”
30Hibü haoen khüka linan phaia Antiok to yankei. Haoenei shuong pendou takshattikei hoba le kho kukei. 31Le kho wean lenkei hoba khoei haoen thungeijangeibü shanga kambü shuong olinyokei. 32Juda si Sila, thuseibü yingsije, ngüh lounyu lauko jaisinasi shuong thungeijangeikei hoba hau kingeitikei. 33Haoen khünei longche thüngkei. Kheijinei jaisinasi shuongei haoen hautibü shuongla haoeneibü salem lenngaila shanga haoen to phean phaia haoen ungtikei. 34(Lausikei Silaeije khün setngaila janenkei.)
35Paul si Barnaba, lubü juong yoan Bunyubou Ngühlang Maibü songlenko Antioka setkei.
Paul si Barnaba Bangbü
36Chalou shijo kian phaia Paulei Barnaba to, “Setije ngaian setiei Bunyubou ngühlang phinthonshang sangnyu weko to hauan jaisinasi shuong lai ong kije pean chühakho,” dogo laukei.
37Barnabaei Mark dogo laubou Johan haosi yoto leimang sühkei; 38lausikei aoei haosi Pamfiliaa apyoan haosi yoa kümtoleito ayang, kheibü müt leilaje Paul la amaikuko dambei. 39Khünei lem aseyobü yaang longan haosi bangkei, hoba Barnabaei Mark leian Kupra to longa haukei. 40Paulei Sila heenkei hoba jaisinasi shuongei Bunyubou onoubü la nongtian phokukei. 41Hao Siria si Kilikia danko lashong dan hau kitiko haukei.
Currently Selected:
YOUKOIKJAI 15: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
