KAOBAK 14
14
Abramei Lot Püetbü
1Kho jihsiphaia Shinarbü choba Amrafel hoba Elesarbü choba Ariok hoba Elambü choba Kedorlaomer hoba Goimbü choba Tidal haanga, 2haoenei Sodombü choba Bera hoba Gomorabü choba Birsha hoba Admabü choba Shinab hoba Zeboimbü choba Shemeber hoba Belabü choba (kho Zoar) yoa wapyo khangkei. 3Habü pendou Sidim pholi (Jem Yungnyu) a yoshaikei. 4Haoenei po anthüknyi sühko Kedorlaomer khangenkei, hoba po anthüksem boubüa haoenei hao khulimbo meimeikei. 5Hobaje po anthüklei boubüa Kedorlaomer hoba hao to thipbü choba shuongei Ashtoreth Karnaima Refaimbü, Hama Zuminbü, Shave-Kiriathima Emimbü 6hoba Horbü, haoen Edom shongh sangliphang nyangko kibü Elparan sühko shikei. 7Kheijinei haoen sepeijung En Mishpat (kho Kadesh) to louan Amalekbü kaodak hoba Hazaron Tamara kibü Amorbü kaodak khümbo shikei.
8Hobaje pendou haoen khulimbo Sodom choba, Gomora choba, Adma choba, Zeboim choba hoba Bela choba (kho Zoar) meimeikei hoba haoenei lason jaman Sidim pholi to wapyola haukei. 9Elam choba Kedorlaomer hoba Goim choba Tidal, hoba Shinar choba Amrafel hoba Elasar choba Ariok; haoen choba ngao khulimbo choba lei kho wapyokei. 10Tou Sidim pholia naipüngkhün thukukei hoba Sodom si Gomora choba satkei, hoba atje khüto atetkei, hoba haoen joubü shuong shongh to satetlangkei. 11Hobaje choba leiei Sodom si Gomora nyaksinam pendou hoba haoeneibü shausiyung khümbo soan satkei. 12Hobaje haoenei Abrameibü shoumo Lot, ao Sodoma kikei, hao hoba haoeibü nyaksinam soan satkei.
13Hobaje satenbü che louan Ibribü Abram to ho shangabü lenkei. Hao Eshkol jaisina hoba Aner jaisina Amorbü Mamre saopobü bulong nyangko kikei; habü ho Abram to jiyomaiyobü shuong kikei. 14Hobaje ladang Abramei hao chempen langsena dogo ditkei, haoeibü chema bukbü haoei leiyenbü sambü müt 318 leian Dan sühko shijung haukei. 15Hobaje haoen khulimbo nangnak hao hoba haoeibü sambü shuong haoei janyinkei, hoba haoen kho thükkei; hoba Damaska yungküka kibü Hob sühko shijung haukei. 16Hobaje haoei peisilei pendou hoba haoeibü chempen Lotkei haoeibü peisilei yoa, yaksa shuong hoba lubü shuongkei langsenbü ka sepeinyu leian longeikei.
Melkhizedekei Abram Haükubü
17Ladang Abramei Kedorlaomer si hao to thipbü choba shuong thükan longeikei, Sodom choba, Shave Yo (kho choba Yo) to hao shuokla loukei. 18#Ibr 7.2 Hobaje Salem choba Melkhizedekei wentek si ih sungbakei. Hao Thükkabou Mühghaüeibü Ungshedbou kikei. 19Hobaje haoei hao haükuko laukei, “Müh si kao kümbou Bunyubou Mühghaüeibü haübü Abram to kishi; 20#Ibr 7.4 hoba aoei kaibü dangboulabou ka ikto kukei, hao Thükkabou Mühghaü to haübü yingshi!” Hobaje Abramei hao la pendou ka an phejan kukei.
21Hobaje Sodom Chobaei Abram to laukei, “Kü la mütshuong kho labü lausikei peisilei nyi leshima.”
22“Lausikei Abramei Sodom choba to laukei, Bunyubou Mühghaü Thükkabou, müh si kao kümbou Bunyubou thedanga ngeibü ik tuokan lauda, 23khei ngei leipem che ong yingsikei, ngoklüh che ong yingsikei nyi kibü aikei alelabü; aingenyu nyi, ‘Ngei Abram keitikei’ dogo laulabü. 24Kü yoa haubü mütshuongeibü phejan hoba heshou shuongei ai shaukei kho to liman ngei ai alelabü: Aner, Eshkol hoba Mamre, haoenje haoen phejan letiashi.”
Currently Selected:
KAOBAK 14: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
