KAOBAK 15
15
Abram to Mühghaüeibü Thesilan
1Kho phaia Bunyubouei mangsanga Abram jungto louan laukei, “Tehüt, Abram, ngo kaibü aih hoba kaibü pailetbü yinglabü.”
2 #
Ykj 7.5 Lausikei Abramei laukei, “O Bunyubou Mühghaü, ngei shousi aki, hoba ngeibü chem phet phanlabü Damaskabü Eliezer kia; khei yingsije nyi kü la ai kula?” 3Hobaje Abramei laukei, “Chühashi, nyi kü la lilabü aikei aku; hoba chühashi, kü sambü che ngeibü phet phanlabü kia.”
4Hobaje chühashi, nyibou Bunyubouei hai lauko loukei, “Ho müt ho kaibü phetphanbou ayinglabü.” 5#Ibr 11.12 Hobaje haoei khong to leijung angan laukei, “Tou müh to chühashi, hoba kho weenalonga khanshoulitshou shuong wean chühashi.” Hobaje haoei hao to laukei, “Kho tegü kaibü lilabü kilabü.” 6#Gal 3.6 Hobaje Abramei Bunyubou to mailembei; hoba kho danko Mühghaüei hao kho saopobü dogo weeikei.
7Hobaje haoei hao to laukei, “Ngo Bunyubou ki, aoei ka la ho kaonyu phet phantila Khaldi kaodak Ur ka leian loukei.”
8Lausikei Abramei laukei, “O Bunyubou Mühghaü, ngei ho phet phanlabü dogo ngei aiei ngela?”
9Hobaje haoei hao to jongaikei, “Kü shanga masu saoen che shatan po sem, hoba lonpaang che shatan po sem, sanlon paang che shatan po sem, hoba shujem dukutuk che hoba dukutuk che sungba.” 10Hobaje haoei khübü pendou sungbaan phei pheia nyangyoko phokei, aieilausi auje apheinyin. 11Hobaje phe shaubü aushuong haibü mang thükto louyenkei, lausikei Abramei haoen shian sattikei.
12Hobaje chanyu nepbo kian Abram nyeket maiko yepbei; hoba hatlamoklabü nakthüh yaang hao thükto loukei. 13#Ykj 7.6-17 Hobaje Bunyubouei Abram to laukei, “Shangashatko ngeashi, kaibü thensilen haoeneibü ayingbü kaodak chenei kilabü hoba haoen khangenlabü; hoba haoenei haoen po saongao lei khonsaktilabü. 14#Ykj 7.7 Hobaje haoenei khangenbü phang ngei matjemlabü, hoba kho phaia haoen nyaksinam juong yoa longlabü. 15Lausikei no sangmaia kaibü bousishuong jungto haulabü; no tükde jailean khünlabü. 16Hobaje meten leiboubüa kaibü thensilen hato nyibou loungailabü; aieilausi Amorbü shieikoela haoenei shedbü akümphemkei.”
17Hobaje ladang chanyu nepbei, chühashi, wankhük longbü wanthep che hoba wanlongbü hantin che phejan kanglang to dankei. 18Kheijinei Bunyubouei Abram to thebülanbü che leko laukei, “Kaibü lilabü la ho kao kua. Ijep shumang ka shumang yaangbou Eufrates shumang sühko - 19Kenbü, Kenizbü hoba Kadmanbü, 20Hitbü, Perizbü, Refaimbü, 21Amorbü, Kananbü, Girgashbü hoba Jebusbü kaodak pendou ngei kua.”
Currently Selected:
KAOBAK 15: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
