KAOBAK 19
19
Sodom Shedbü Shabü
1Hobaje khuthük hangangbü müt nyi kho chasem Sodom to loukei, hoba Lot Sodom bakhüna setan kikei. Hobaje Lotei haosi hapan haosi to haüyola lokei, hoba haoei haoeibü thenyek kao ae yeian hao lolo khüpetkei. 2Hobaje haoei laukei, “Tou chühashi, ngeibü Bunyubou shuong, kaneibü sambü chemto sepeiashi dogo ngei kasi to sudajada, hoba tao yepashi, hoba kaneibü you sakashi; hoba kasi tongde pian jembü lam to haushima.” Hobaje haosiei laukei, “Ü, kün langyang sünga khonga kilabü.”
3Hobaje haoei haosi to aeibou susije haosi hao yoa chem to atkei, hoba haoei haosi la lem che likuko tokai ajinbü wentek kangan haosi la okkei, hoba haosiei shaukei.
4Lausikei haosi ayeptoua sangnyubü, Sodombü shuong nashou chingbü pendou sangkhu sangyou pendou ka louan chem komlepbei. 5#Rom 1.24-27 Hobaje haoenei Lot ngaan laukei, “Ka jungto tao lotbü müt kho lanei ki? Künei haosi ngelabü lele haosi kün jungto leian kaiyanga.”
6Hobaje Lot haoen jungto khongto longan hao phai kou khinkei. 7Hobaje haoei laukei, “Ngeibü jaisinasi shuong, hai amaiko tejungei. 8Tou bousu angebü ngeibü nouyangshou nyi kia; ngei haosi kanla leilangtikho, hoba kan thea ai maikei kho haosi to jungeiashi; lausikei habü mütshuong to ong ai tejungei, aieilausi haosi ngeibü chemsophang to lotakei.”
9Lausikei haoenei laukei, “Kün la lam kukkubü.” Hobaje haoenei laukei, “Ho müt ho miet ong lousi hao matjembou yeikho lauda: tou künei haosi to jungeilabü toje ka to aei amaibou jungeilabü.” Hobaje haoenei müt khüto (kho Lot to), kaang aüan koutiko koukap leilulabü lele kikei. 10Lausikei müt nyi khoei ik shingan angtian Lot chem to senetngailangko kou kapbei. 11#Ykj 13.11 Hobaje haoen koukhün junga lobü hanbü yaangbü pendou la nyek thutiko ngümsi haoenei koukhün lambüei haoen lolo mangkei.
Lotei Sodom Apyobü
12 #
2 Pet 2.9 Hobaje müt khoei Lot to laukei, “Ka yoa hanei lubü müt kilao? Kaibü haishou kounyang, hoba kaibü jayang nouyangshou shuong hoba sangnyua aoyou kilaje khübü leisheiashi; 13aishanga künei ho sangnyu mautikulabü; aieilausi ho sang khulimbo ngekbü Bunyubou junga yaang yeia, hoba ho mautila Bunyubouei kün hautikei.”
14Hobaje Lotei hauan haoeibü nouyangshousi ngabü bousu shuong to joyoko laukei, “Haka hali meimeian longashi, aieilausi Bunyubouei ho sangnyu mautilabü.” Lausikei haoeibü lisi shuongei haoei eklenda dogo ong dambei.
15Hobaje ladang lang ngekei, kheijinei khuthük hangangbü nyiei Lot thungeiko laukei, “Hali meimeiashi, kayak hoba hanei kibü kaibü nouyangshou nyi leiashi, khei ayinglonga no ho sangnyueibü shedbü shabüa maulabü.” 16Lausikei hao sukeitemeiko kikei; hoba Bunyubouei hao to onouko damsi, müt nyi khoei haoeibü ik si haoyakeibü hoba hao shou nouyangnyu nyieibü ika senkei hoba haosiei haoen sangnyu ka leian angan phokukei. 17Hobaje ladang haosiei haoen sangnyu napheito leian loukei, haosi yoa cheei laukei, “Kaibü langkei shanga satashi, nyi sepeinyu techühngai, hoba pholi kaoakei tüot; no amaulabü lele shongh to satashi.”
18Hobaje Lotei haosi to laukei, “O kho khei aying, ngeibü bunyu shuong! 19Tou chühashi, kaibü sambü ka thea onou yaang hapa, hoba nyi kaibü onou yaangbü la yeiko haatia, laobou nyi kü langkei püetbüei tang khittikei; lausikei ngo shongh to satla athük, aingenyu kü to denche thushed longan ngo hailabü. 20Tou chühashi, nyangetnyu laangjung hauan sühlabü sangnyu che kia, kho hanbüshou, O, ngo khünei satentiashi (ho hanbüshou ayingsi?) hoba ngeibü langkei kilabü.”
21Hobaje haoei hao to laukei, “Chühashi, ngei ho shangakei no sungletda, khei nyi laobou sang shanga laukei kho ngei amautikulabü. 22Hali khünei satetlangashi; aieilausi no khüto aloushongko ngei ai akümen.” Hibü ho sang to Zoar dogo laukei.
Sodom si Gomora Maubü
23Lotei ZoarmMOAB: ‘tetlabü Kü Bou ka’ sühjinei kaonyua chanyu phaman kiteikei. 24#Lk 17.29 Kheijinei Bunyubou ka Sodom si Gomora to wanküh laang hoba wan laang tegü Bunyubouei khuthük ka lottikei; 25hoba haoei khübü sangnyu si pholi pendou, hoba sangnyua kibü pendou hoba kaoa kibü pendou shemtikei. 26#Lk 17.28 Lausikei hao phainei Loteibü yakei phai chühngaikei, hoba sao jem on thaonyu che la yeikei.
27Nyibounyet ngeyang enyu Abraham pian hao Bunyubou thedanga loshang to angkei, 28#Tk 18.9 hoba haoei Sodom si Gomora ae pholi kaodak to chühyantikei, hoba haoei kho kao ka wankhük kho wanang ka wankhük longbü phatko hapbei. 29Lausikei ladang Mühghaüei pholi kaodaka kibü sangnyu shuong mautikei, haoei Lot kibü sangnyu shuong mautijinei Mühghaüei Abraham damenko, maulabü yo ka Lot satentikei.
Amonbü si Moabbü Bakshang
30Hobaje Lotei Zoar ka haoeibü nouyangshou nyi yoa shongh to angkei; aieilausi haoei Zoara kila hatkei. Hao hoba hao shou yaksashou müt nyi kho laangpoba kikei. 31Hobaje noushounyuei nashounyu to laukei, “Abou jai lea, kaodak haang tegü seti to jamlabü nyangbüa ao aki; 32kaiya, seneibü bou lilabü phola shanga setiei abou la ih yungtikho, hoba seti hao to yepakho. 33Hobaje khüyou haosiei haosieibü bou la ih yungtikei, hoba noushounyu atan bou yoa yepbei. Sao ladang yepkei hoba ladang pienkei bouei ange.”
34Nyibounyet noushounyuei nashounyu to laukei, “Miou ngo kübou yoa yepbei; senei aboueibü lilabü phola shanga taokei setiei hao la ih inkho, no atan hao yoa yepshi.” 35Hobaje khüyoukei haosiei bou la ih inkei, hoba nashounyu hauan hao yoa yepbei, hoba sao ladang yepkei hoba ladang pienkei bouei ange. 36Kho khei Loteibü nouyangshou müt nyi ham haosieibü bouei mangakongko apbei. 37Hobaje nouyangnyuei bousushou che bukkei, hoba hao nyen Moab#MOAB: tetlabü Kü Bou ka dogo nyenkei, hoba hao tat sühko Moabbü bou ki. 38Hobaje nashounyuei bousushou che bukkei hoba hao nyen Ben-ammi dogo nyenkei, hao kho tat sühko Amon shousi shuongeibü bou ki.
Currently Selected:
KAOBAK 19: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
