KAOBAK 18
18
Abraham la Shou che Thekubü
1 #
Ykj 7.2 Abraham chaloua aeibou sanglam jiha neichem koukhüna setan kijinei Bunyubou Mamre saopobü bulong nyangko hao jungto longan lenkei. 2#Ibr 13.2 Hobaje haoei tangko chühkei, hoba chühashi, müt sem hao thedanga lokei. Hobaje haoei haoen hapjinei hao neichem koukhün ka haoen to haüyola laangjung hauan kaoa sühko khüpetan laukei. 3“Ngeibü Bunyubou dan, ngei kan thea onou hapalonga kaibü sambü chema asühko tedan. 4Tou dei shisho sungbakho, hoba kan you makan bunyu long phanga haksoashi. 5Hobaje ngei wentek shisho sungbakukho, hoba kan haksoashi; kho phaia ong haushi; aieilausi kan kaneibü sambü jungto loukei.” Hobaje haoenei laukei, “Maiakei, nyi laubü tegü yingshi.”
6Hibü Abraham neichem to aeibou panteiko atan Sara to laukei, “Hali, wen inyaibü angsok sem jinan lamleashi, hoba kho nyatyoan wentek kümashi.” 7Hobaje Abrahamkei tongde masu shuong yoto haukei hoba masu shoushou netthembü che sungjung longeian haoeibü sambü shuong la kukei hoba haoei kho lamlekei. 8Hobaje haoei makon hoba sendei hoba masu shoushou laobou haoei lamlean kikei kho sungjung hauan haoen thedanga phokukei. Hobaje haoen shauji yungjinei hao haoen nyangko bunyu jungthema lokei.
9Kheijinei haoenei hao to laukei, “Kayak Sara lan ki?” hoba haoei jongaikei, “Sao neichema kia.”
10 #
Rom 9.9 Hobaje haoen yoa cheei laukei, “Ladang ngiempo ho jihsiphai longeilaje, maimaitham ngo ka jungto loungailabü, hoba chühashi, kayak Saraei bousushou che buklabü.”
Hobaje haoeibü phaidak ka Saraei ditkei. 11#Rom 4.19 Tou Abraham si Sara sinan kikei, hoba po danan kikei, hoba Sara to yaksaeibü haang thonan apan kikei. 12#1 Pet 3.6 Saraei jembü maanga nyiko laukei, “Tou ngo nou lean ngei olinbü haplep lo?”
13Kheijinei Bunyubouei Abraham to laukei, “Ngo noushou la yeian apan maimaitham ngei na buklepsai dogo aila Saraei nyiko laukei? 14#Mt 3.9 Bunyubouei athükaminlabü lele denche kia si? Ladang ngiempo ho jihsiphai longeilaje takletbü jiha ngo ka jungto loungailabü hoba Saraei bousushou che buklabü.”
15Kheijinei Sara hatkei, khoei sao yepeikei hoba laukei, “Ngo anyi.” Lausikei haoei laukei, “Maimaitham no nyia.”
Abrahamei Sodom shanga Sukujakubü
16Hobaje mütshuong khüka meimeian Sodom aeto chühyantikei, hoba Abrahamei haoen hangan hautikei. 17Kheijinei Bunyubouei laukei, “Ngei ai kümla ki kho ngei Abraham ka huletlep lo? 18Maimaitham Abraham phangyaang yeilabü hoba hau kibü yeilabü, hoba kaodak phang pendou hao danko haülabü. 19Aishanga hao shousi hoba hao phainei haoeibü thensilen to ai saopobü janbü hoba ngühmai ki kho jungeiko Bunyubou lamnyua paiashi dogo sakkula shanga hoba haoenei ong kho kümalonga ngei Abraham to theletbü loushedtila ngei hao pienkei.”
20Kheijinei Bunyubouei laukei, “Sodom si Gomora ngühbü yaang, hoba haoeneibü shabü yongko yaangsije, 21ngo tou yanan, kü jungto loubü ngühyobü tegü haoenei pendou aenei jungeilaoje chühkho; khei ayinglonga, ngei ngelabü.”
22Hobaje mütshuong kho khüka sepeinyu Sodom aeto haukei, lausikei Abrahamje tokei Bunyubou thedanga lokei. 23Hobaje Abrahamei nyangko louan laukei, “Nyi saopobü müt shabü shuong yoa mautilep lo? 24Sangnyu khünei saopobü müt anjinsem kialonga nyi khünei kibü saopobü müt anjinsem nyena sangnyu kho asenetko mautilep lo? 25Kho tegü jungeila ka jungka lounyu bang an kia; shedbü shabü müt yoa saopobü mautisi saopobü mütshuong shedbü shabü tegü yeilabü; kho ka jungka lounyu bangakei! Kaodak pendou matjembouei ngühmai ajungeilep lo?”
26 Bunyubouei jongaikei, “Ngei Sodom sangnyua saopobü müt anjinsem hapalonga haoen laüa sangnyu kho senetlabü.”
27Hobaje Abrahamei jongaiko laukei, “Chühashi, thamngu si tapei Bunyubou to joyola maangpon yaangda; 28saopobü müt anjinsem kho ngaoei apensi ngaoei abenbü shanga sangnyu kho mautilep sai?” Hobaje haoei laukei, “Ngei khünei saonyi to ngao hapalonga kho amautikulabü.”
29Hobaje toukei haoei hao to joyoko laukei, “Khünei saonyi hapsi lai?” Hobaje haoei laukei, “Ngei saonyi shangakei kho ajungeilabü.”
30Hobaje haoei laukei, “O Bunyubou khau tüangma, toukei ngei laukho, khünei müt khujin hapsi lai?” Hobaje haoei laukei, “Ngei khünei khujin hapalonga ajungeilabü.”
31Abrahamei laukei, “Tou chühashi, ngei Bunyubou to joyola maangpon yaangda; khünei saoche hapsi lai?” Hobaje haoei laukei, “Ngei saoche shanga kho amautilabü.”
32Kheijinei haoei laukei, “O Bunyubou, khau tüangma, touje ngei che ong joyokho; khünei an hapsi lai?” Hobaje haoei laukei, “An shangakei ngei kho amautikulabü.” 33Hobaje Bunyubouei Abraham to joyokhümbüyam satan apbei, hoba Abraham hao kishang to sepeian ngaikei.
Currently Selected:
KAOBAK 18: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
