KAOBAK 17
17
Kipbü kho Thesilan Tetsida
1Hobaje ladang Abram po anjinngao to gü onkei, Bunyubou hao jungto longan laukei, “Ngo pendou Thükenbou Mühghaü, kü thedanga paiashi, hoba ashedko kishi. 2Hobaje ngei ngeibü thesilan seti kanglanga phokho, hoba no juongnyu haatiyaangtilabü.” 3Hobaje Abramei haoeibü the khüman khüpetkei, hoba Mühghaüei hao to laukei, 4“Chühashi, ngeibü thesilan ka yoa kia, hoba ho phang juongeibü bou la yeilabü. 5#Rom 4.17 Touje kaibü nyen Abram anyenlabü, lausikei Abraham#ABRAHAM: tetlabü Phang juongnyueibü pisibou dogo nyenlabü, aieilausi phang juongeibü bou ngei no yeitia. 6Hobaje ngei no lang juong hekbü yeitilabü, hoba ka ka ngei phang shuong longtikulabü hoba ka ka choba shuong longlabü.
7 #
Gal 3.16 “Hobaje ka shanga hoba ka phainei kaibü thensilen shanga Mühghaü kila shanga seti kanglanga hoba ka phainei kaibü thensilen ham kanglanga meten pendoua thon akibü theyolanyobü kila shanga ngeibü thesilan kümlabü. 8Hobaje ngei ka la hoba ka phainei kaibü thensilen la, no paishang kaodak, Kanan kaodak pendou, ponpen kaneibü yingla kulabü, hoba ngo haoeneibü Mühghaü kilabü.”
9Hobaje Mühghaüei Abraham to laukei, “Nyije, no hoba kaphainei kaibü thensilen haoen meten pendoua ngeibü thesilan jungeijan. 10Ngeibü thesilan, laobou seti hoba kaphainei kaibü thensilen kanglanga kanei pholabü, khei kan yoa bousu pendou kipan apjan. 11#Rom 4.11 Kan kiplabü, hoba ho ngo hoba kan kanglanga thebülanbü tetsida kilabü. 12Loulabü metena kan yo kabü chalou set onbü bousushou, kan chema bukbü ayingsi yenbou ka namei jekbü, kaibü thensilen ayingsikei, haoen pendou kiplabü. 13Kaibü chema bukbü yingasikei, kaibü namei jekbü yingasikei pendou kiplabü. Hobaje ngeibü thebülanbü kaibü phea thon akibü thesilan shanga kilabü. 14Hobaje akipbü bousu, ao tangkabü phe akip, hao jembü mütli ka wapan aplabü; haoei ngeibü thesilan lulima.”
15Hobaje Mühghaüei Abraham to laukei, “Kayak Sarai shangakei saoeibü nyen Sarai dogo tenyen, lausikei sao Sara#SARA: tetlabü Chobasao dogo kilabü. 16Hobaje ngei sao haükulabü, hoba tokei aei ngei sao danko ka la bousushou che kulabü, haü, ngei sao haükulabü, hoba sao phangshuongeibü nyu la yeilabü; phangeibü choba shuong sao ka longlabü.”
17Kheijinei Abraham the khüman nyikei hoba haoeibü maanga laukei, “Müt che bukan po saongao onan bousushou buklep lo? Hobaje Sara po anjinngao onan saoei shou buklep lo?” 18Kheijinei Abrahamei Mühghaü to laukei, “Ishmael ka thea kia yingma!”
19Hobaje Mühghaüei laukei, “Aying, kayak Saraei ka la jayangshou che bukkulabü, hoba nyi hao nyen Isak#ISAK: tetlabü Hao nyida dogo nyenkulabü; hoba hao phainei haoeibü lilabü shanga thon akibü theyolanyobü kilabü lele ngei hao yoa ngeibü thebülanbü kümlabü. 20Hobaje Ishmael shangabü nyi laubü ngei dida; chühashi, ngei hao haükua, hoba ngei hao lang hekbü yeitikulabü, hoba hao juong haatikulabü; hao choba anthüknyieibü bou la yeilabü, hoba ngei hao phangyaang yeitikulabü. 21Lausikei Isak, ao Saraei ngiempo ho jih tükdea buklabü ki, hao yoa ngeibü thesilan kümlabü.” 22Hobaje haoei hao to joyobü nangkei, hoba Mühghaü Abraham jungka angkei.
23Hobaje Abrahamei haoshou Ishmael hoba hao chema bukbü pendou hoba haoeibü namei jekbü pendou, haoeibü chema kibü müt yoka bousu pendou leijung louan, Mühghaüei hao to lenbü tegütham haoen phea tangkabü khop khünyettham kipan apbukei. 24Hobaje Abrahamei haoeibü tangkabü khop kipan apjinei hao po anjinngaoto gü kikei. 25Hobaje hao shou Ishmael, hao jembü tangkabü khop kipjinei po anthüksem kikei. 26Khünyettham Abraham hoba haoshou Ishmael haosi ham kipbei. 27Hobaje haoeibü chema kibü bousu pendou hoba chema bukbü si yenbou ka namei jekbü yoan hao yoa kipan apbei.
Currently Selected:
KAOBAK 17: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
