KAOBAK 21
21
Isak Bukbü
1Tou Bunyubouei haoei laubü tegü Sara to onoukei hoba Bunyubouei haoei thekubü tegü kümbei. 2#Gal 4.22 Hobaje Sara mangakongko apan Abraham la, hao baushi sinan apan Mühghaüei haoei takletkubü chaloua bousushou che bukkukei. 3Hobaje Abrahamei hao la Saraei bukkubü jayangshou la Isak nyenkukei. 4#Ykj 7.8 Ladang Isak chalou set onkei Mühghaüei haola sakkubü tegü Abrahamei kipbukei. 5Haoshou Isak haola bukkujinei Abraham po saongao jai lean kiteikei. 6Hobaje Saraei laukei, “Mühghaüei ngo nyitikei; hoba ho shangabü ditbü shuong pendouei kü yoa nyilabü.” 7Hobaje saoei laukei, “Aoei Abraham to Saraei na yopbulabü dogo laula? Lausikei ngei hao jai lean hao la bousushou che bukkua.”
8Hobaje nashou kho chingko sen apyokei, hoba Abrahamei Isakei sen apyonyet lem yaangbü che kümbukei.
Hagar si Ishmael Sattibü
9Hobaje Ijep sao Hagareibü shou laobou saoei Abraham la bukkukei, Saraei saoeibü shou to hatlenko hapbei. 10Hibü saoei Abraham to laukei, “Ho aaosao si saoeibü shou shian sattiashi; aieilausi ho aao saoeibü shou kü shou Isak to phetphana ühamlabü.” 11Khoei haoshou Ishmael laüa Abraham aeibou maanga amaiko kikei. 12#Rom 9.7 Lausikei Mühghaüei Abraham to laukei, “Nashou si kaibü sambüsao shangabü no aolinko teki; Saraei ka to lenbü pendoua sao to ngüha leashi; aieilausi Isak danko kaibü lilabü weeilabü. 13Ngei sambü aaoeibü shou kakei phang che yeitikulabü, aieilausi hao kaibü lilabü ki.”
14Nyibounyet ngeyang enyu Abrahamei wentek si phekhun shongmok che deiei shenko jinan Hagar la kukei. Haoei kho saoeibü phaka tonan jinkukei hoba sao la na kho kuan hangan hautikei. Hobaje sao bangjung satan Beersheba phetsen kaodaka shoongeikei. 15Ladang phekhun shongmok kabü dei kho khümbei, saoei na kho buham phang chenei apyokei. 16Hobaje saoei hao thedang ka longche hauan, phak saosem thüng saan setkei; aishanga saoei lolo laukei, “Ngei na haibü to techühkho.” Hobaje sao khonei setan ngüh angko haapbei.
17Hobaje Mühghaüei nashou haapbü kho ditkei, hoba Mühghaü khuthük hangangbüei khuthük ka Hagar ngako laukei, “No ai kümda, Hagar? Tehüt, aieilausi Mühghaüei nashoubou hao kishanga haapbü dida. 18Meimeiashi, nashou kho phonan kaibü ikei jenan sungashi, aieilausi ngei hao ka phang yaangbü che yeitilabü.” 19Hobaje Mühghaüei saoeibü nyek ipbukei hoba dei kibü kaoen che hapbei; hoba saoei hauan phekhun shongmok kho deiei shenko khuan na la yungtikei. 20Hobaje Mühghaü nashou yoa kikei, hoba hao chingkei; hoba yama kikei, hoba hao chingko lau jungbü müt che la yeikei. 21Hao Paran yama thüngkei, hoba haonyuei hao shanga Ijepsao che ngakukei.
Abraham si Abimelek Theyolanyobü
22Kho jihsiphaia Abimelek si Lajamleibou Fikolei Abraham to laukei, “Nyi kümbü ajanjan pendoua Mühghaü ka yoa kia 23Hibü tou kü to Mühghaü nyen phongko khei nyi kü to hoba ngeibü shousi shuongto hoba ngeibü thensilen to akhüp alanglabü; lausikei ngei ka to jungeibü sanou tegü, nyi kü to, hoba ai kaodaka ong no thüngkei khüto jungeilabü dogo thekuashi.”
24Abrahamei laukei, “Ngei thedalanda.”
25Kheijinei Abrahamei Abimelek to deikhün laobou Abimelekeibü sambü shuongei sokei kho shanga ngühphe kikei. 26Lausikei Abimelekei laukei, “Ho aoei kümbeije ngei angekei, nyikei kü to alen, tat ong ditda.” 27Kheijinei Abrahamei san hoba masu pongsu sungbaan Abimelek la kukei, hoba haosi ham ngüh lanyokei. 28Abrahamei sanlon saoen nyet sanshuong yoka pinyinan phokei. 29Hobaje Abimelekei Abraham to laukei, “Habü sanlon saoen nyet pinyinan phobü kho tetlabü ai?”
30Abrahamei jongaikei, “Ho deikhün ngei thukei dogo aukabü lela shanga sanlon shoushou nyet ho ngeibü ik ka sungletashi.” 31Hibü kho kaodak la Beersheba#BEERSHEBA: tetlabü Theletlanletbü Deikhün ayingsi Deikhün Nyet dogo nyenkukei, aieilausi haosi ham khünei theyolanyokei.
32Kho tegü haoen Beershebaa theyolanyokei, hoba Abimelek si haoeibü Lajamleibou Fikol meimeijung Filistia kaodak to ngaikei. 33Hobaje Abrahamei tamarisk bu che Beershebaa kekei, hoba Thonakibü Mühghaü Bunyubou nyena lembei. 34Hobaje Abraham Filistia kaodaka chalou lounyu thüngkei.
Currently Selected:
KAOBAK 21: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
