KAOBAK 22
22
Abraham Takteibü
1 #
Jkb 1.12-13 Jihsiphai tuisho hauan phaia Mühghaüei Abraham takteikei hoba hao to laukei, “Abraham!” Hobaje Abrahamei jongaiko laukei, “Ngo hanei kia!”
2 #
Ibr 11.17-18 Kheijinei Mühghaüei laukei, “Kashou, kashou jayangshou Isak, laobou nyi sanouda, hao leian Moria kaodak to hauashi. Hobaje khünei ngei ka la shean lenlabü shongh chenei nyi hao kü la juokbü lembü kuashi.”
3Nyibounyet ngeyang enyu Abraham pian haoeibü gadua setshang jinan, hao yoa sambü müt nyi hoba haoshou Isak yoan leikei, hoba haoei juokbü lembü shanga bu shenan meimeijung Mühghaüei hao to lenbü kaoen che khüto haukei. 4Sembounyet Abrahamei saabü ka kaoen to chühangtikei. 5Haoei haoeibü sambü nyi to laukei, “Kasi gadu yoa hanei haiyeiko kiteishi, hoba küshou küsi thito haulabü hoba künei leman nyibou kasi jungto longeilabü.”
6Abrahamei juokbü lembü shanga bu sungan haoshou Isak la küntikei, hoba haoei wan si in jungkei; hoba haosi ham liko haukei. 7Isakei laukei, “Abou.” Hobaje haoei jongaikei, “Küshou, ai ma?” Hobaje haoei laukei, “Wan si bu kia, lausikei lembü kula sanlon shoushou lan ki?”
8Hobaje Abrahamei jongaikei, “Küshou, Mühghaüei juokbü lembü shanga san shoushou lamlekulabü.” Hibü haosi ham liko haukei.
9Ladang haosi Mühghaüei lenbü kaoen sühkei, Abrahamei khünei laangshongei lemshang yaükei, hoba bu shean jaan phokei. Hobaje haoshou Isak khühan haoeibü lemshang thüka peithetnyu yeptikei. 10Kheijinei Abrahamei haoeibü ikei jembü shou haitila in tonenkei. 11Lausikei Bunyuboueibü hangangbüei khuthük ka hao ngako laukei, “Abraham, Abraham!” Hobaje haoei jongaikei, “Ngo hanei kia.”
12Hobaje haoei laukei, “Na to ik tüt. Hobaje hao to ai teküm; Nyi Mühghaü to ngüha leda hoba hatda dogo ngei ngea; aishanga nyi kashou che ong kibü khokei aphokai.”
13Hobaje Abrahamei chühangtisi hao phainei sanlon paang che haoeibü laangei hama minetan hapbei, hoba yam to hauan sanlon paang kho sungan haoshou jeila juokbü lembü kukei. 14Hibü Abrahamei ho kaonyek la “Jihova-jire” dogo nyenkukei. Tat sühko lauyobü tegü, “Bunyuboueibü shongha kho kulabü.”
15Hobaje Bunyubou hangangbüei Abraham nyibou khuthük ka ngakei, 16#Ibr 6.13-14 hoba laukei, “Bunyubouei lauda: Nyi ho kümsilei kümsi hoba kashou che ong kibü aphokeisi ngei kü nyena thedalanda; 17#Ibr 6.14 hoba ngei no haükulabü hoba haabüyaangbüa ngei kaibü thensilen müha khanshoulitshou tegü hoba molo yungkoa kibü phetsen tegü haatilabü. Hobaje kaibü thensilenei haoeneibü dangbou koukhün kimlabü. 18#Gal 3.8-9 Hobaje kaibü thensilen danko kaonyu phang pendou haükulabü; aieilausi nyi kü ngüha lekei.” 19Hibü Abrahamei jembü sambü nyi jungto ngaian, haoen liko meimeijung Beersheba to haukei. Hobaje Abraham Beershebaa kikei.
Nahor Mütli
20Jih tuisho kian phaia Abraham to hai laukei, “Chühashi, kaibü na Nahor lakei Milkaei shousi bukkua.” 21Uz, shaang bukbü, Buz, haoeibü na, Kemuel (Arameibü bou) 22hoba Kesed, Hazo, Pildash, Jidlaf hoba Bethuel. 23Hobaje Bethuelei Rebeka hapbei. Habü müt set Milkaei Abrahameibü na Nahor la bukkukei. 24Hobaje haoeibü thangnyu nyenei Reuma, saoeikei Teba, Gaham, Tahash hoba Maaka, dogo bukkukei.
Currently Selected:
KAOBAK 22: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
