KAOBAK 23
23
Sara Haibü hoba Abrahamei Khünshang Kao Phoubü
1Sara salang po saongaoto saotonyet kikei. 2Hobaje Sara Kanan kaodak Kiriat Arba (kho Hebron) a haikei, hoba Abraham Sara shanga mang haapla atkei.
3Hobaje Abrahamei haibü mang apyoan meimeijung haukei, hoba Hitbü shousi shuong to laukei, 4“Ngo kan yoa yenbou hoba küksithang ki, ngei ngeibü haibü mang khünla thüklabü lele kanei küla mang khünshang kaoen che yakbü.”#Ibr 11.8-13
5Hitbü shuongei Abraham to jongaiko laukei, 6“Küneibü ngüha lebü, bunyubou. No kün yoa yaangenbou che ki, küneibü hee maiboua kaibü haibü mang khünashi. Nyi kaibü haibü mang akhünlabü lele kün aoeikei haoeibü hee asenetlabü.”
7 #
Rom 13.7 Abraham loenkei hoba kho kaodak kabü mütshuong thedanga khüpetkei (kho Hitbü). 8Hobaje haoei haoen to joyoko laukei, “Ngei ngeibü haibü mang khünla kanei maanganga longa, kü to ngüha lekai, hoba Zoar shou Efron to, 9haoei haoeibü kao thonbüa kibü Makpela laangpob laobou haoeibü ki, kho kü la yakkula phekushi. Mu muko haoei ngeibü khünshang yingla kan thedanga kho kü la kutiashi.”
10Kheijinei Hit shousi shuong yoa Efron setan kiteikei, hoba Efronei Hit shousi shuong thedanga haoeibü sangnyu bakhün danjung angbü pendou thedanga Abraham to jongaiko laukei, 11“Aying, bunyubou, kü ngüha lebü; kao kho ngei kala kuda, hoba khünei kibü laangpob ngei ngeibü eikshuong shousi shuong thedanga ngei kho kala kuda; kaibü haibü khünashi.”
12Hobaje Abrahamei kho kaodak mütshuong thedanga khüpetkei. 13Hobaje haoei kaonyek kabü mütshuong thedanga Efron to joyoko laukei, “Lausikei nyi maang angalonga kü to ngüha lekai, ngei ho kao munam kala kukho; ho küka leashi, hoba khünei ngeibü haibü khünkho.”
14Hobaje Efronei Abraham to jongaiko laukei, 15“Ngeibü Bunyubou, kü to ngüha lekai, kao che chandinam shekel saongao lei den seti kanglanga kho ai yingla? Hibü kaibü haibü khünashi.” 16Hobaje Abrahamei Efron ngüha lekei; hoba Abrahamei Efron la haoei Hitbü shousi shuong thedanga laubü tegü chandinam shekel saongao lei namseibü shuongei jungeibü hima kukei.
17Hibü Efronei ai kao Makpelaa kikei, laobou Mamre thedanga kikei, kao khünei kibü laangpob hoba kho kaijembo laobou ki, leilanga sühko kibü busidei pendou Abrahameibü la yeikei. 18Habü Hitbü thedanga haoeibü sangnyu danjung angbü müt pendou thedanga Abrahameibü yingla aukabü kukei.
19Kho phaia, Abrahamei Mamre thedanga kibü Makpela kao laangpoba Sara khünkei, ho Mamre Kanan kaodaka kibü Hebron to jetei. 20Hibü kao kho hoba khünei kibü laangjakbü heekhün kho Abraham la khünshang shanga Hitbü shuongei aukabü leko kukei.
Currently Selected:
KAOBAK 23: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
