KAOBAK 24
24
Isak si Rebeka
1Tou Abraham baushi sina, hoba po juong yingan kikei, hoba hangsilam pendoua Bunyubouei Abraham haükukei. 2Hobaje haoeibü chema sambü jaishoubou, ao haoei kibü pendou thüka kikei, hao to Abrahamei laukei, “Kaibü ik ngeibü youshi kanglanga phoashi, 3hoba ngei kato Bunyubou khuthük hoba kaodak Mühghaü nyena thetilantikho. Nyi Kananbü aoyou yoa ngo kida, haoeneibü nouyangshou shuong ka küshou shanga yak tengaku. 4Lausikei nyi ngeibü kaodak hoba ngeibü phang jungto hauan küshou Isak shanga yak leibakujan.”
5Hobaje sambüei hao to laukei, “Aingenyu yaksanyuei küphai ho kaodak to semmang asühlep yingkou? Chühashi, ngei kashou laobou kaodak ka no loukei khüto nyibou leian ngailep sai?”
6Hobaje Abrahamei hao to laukei, “Nyi küshou nyibou kho kaodak to leian tengai: 7#Gal 3.16 Bunyubou khuthükbü Mühghaü aoei ngo kübou chem ka hoba ngo bukbü kao ka leian haukei, hoba aoei küto joyokei, hoba aoei theyolanyoko, ‘Kaibü thensilen la ngei ho kao kulabü’ dogo laukei, aoei haoeibü khuthük hangangbü ka jungto yantilabü, hoba nyi khüka küshou shanga yak leian loulabü. 8Hobaje yaksa khoei kaphai semla maang üanglonga kheijinei ngei kato theyolanyobü shanga aikei shedbü akilabü; nyi küshou khüto nyibou leian angaijan.” 9Hobaje sambü khoei haoeibü ik Abrahameibü youshi kanglang to attian ngüh kho shanga thekeilankei.
10Hobaje sambü khoei haoeibü bunyuboueibü ut an leian meimeijung haukei; aieilausi haoeibü bunyuboueibü peisilei pendou haoeibü ika kikei: hoba hao meimeijung Mesopotamia a kibü Nahor sangnyu to haukei. 11Hobaje chasemlamto yaksa dei khula haubü jiha haoei sangnyu napheinei deikhün nyangko ut khüpettikei. 12Hobaje haoei laukei, “O Bunyubou, ngeibü bunyubou Abraham Mühghaü, tat chalou kümsilei pendou haüthüktiashi, hoba ngeibü bunyubou Abraham to üeisanou lenshima. 13Chühashi, ngo dei nyangko loakei, hoba sangnyu kabü saoshuong dei khula louda. 14Hobaje ho longtiashi, laobou medei to ngei dei yungla shanga kaibü dei ilechak sanoudambo tonletashi dogo laulaje, hoba aoei yungashi hoba ngei kaibü ut lakei yungtikho dogo laulaje kho nyi kaibü sambü Isak shanga pienbü yingtishi. Hobaje khoei nyi ngeibü bunyubou to sanoua dogo ngelabü.”
15Hobaje haoei welaubü athontoua Rebeka, ao Abrahameibü na Nahoreibü yak Milkaeibü shou Bethuelei bukkei, saoei ilechak phaka tonan loukei. 16Hobaje medeinyu kho chühla sao maian kikei. Saosüngbü medei che, bousu aotokei ühüpyobü; saoei dei khula atan saoeibü ilechak shenko khuan longkei. 17Hobaje sambü khoei sao to joyola laangjung hauan laukei, “Sanoudambo kaibü ilechak ka dei shijo inbü.”
18 #
1 Pet 4.9 Hobaje saoei laukei, “Yungashi bunyubou,” hoba saoei panteiko saoeibü ilechak kho saoeibü phak ka tonletan hao la inkei. 19Hobaje saoei hao la yungtian laukei, “Ngei kaibü ut shangakei haoen maang anyem shongko dei khubakho.” 20Hobaje saoei panteiko saoeibü ilechak ka buphaua dei jinan, deikhün to nyibou laangjung hauan haoeibü ut pendou shanga dei khukei. 21Hobaje müt khoei Bunyubouei haoeibü wakou pendou haükudalaoje ngela shanga ngüh üangko sao to tangko chühko kikei.
22Hobaje ladang utei dei yungkhümbei, müt khoei shekel thoche takbü hon kungsaü hoba saoeibü ik shanga hon jikhap penyi shekel an thüngeibü sungenkei. 23Hobaje haoei laukei, “No aoeibü shou? Küla lenbü. Kaibü bou chema kün sühshang kiasaoma?”
24“Ngo Milka shou, Bethueleibü shou, ao saoei Nahor la bukkukei.” 25Saoei tokei hao to laukei, “Künei youho si nyem souko kia, hoba sühshang kia.” 26Hobaje müt khoei khu küpjung kouan Bunyubou to lembei. 27Hobaje haoei laukei, “Bunyubou, ngeibü bunyu Abraham Mühghaü sangashi, aoei ngeibü bunyu ao haoeibü sanou hoba onouei üpyo, kü shangakei Bunyubouei ngeibü bunyu chempen chem lamnyu aeto ngo leian loukei.”
28Hobaje medeinyu kho laangjung hauan saoeibü nyueibü chempen la habü ngühli pendou lenkei. 29Tou Rebekaeibü jai che nyenei Laban kikei; hoba hao müt khüto haüyola deikhün sühko laangjung haukei. 30Hobaje haoei kungsaü hapbei, hoba haonaeibü ika jikhap hapbei, hoba ladang haoei na Rebekaeibü ngüh müt khoei küto hai joyokei dogo laubü ditkei, kheijinei hao kho müt jungto haukei. Hobaje chühashi, hao ut yoa deikhün nyangko loan hapbei. 31Hobaje haoei laukei, “Kaiya, no Bunyubouei haükubou, ailaibü no hanei loda? Ngei ka shanga chem hoba ut shanga nyaishang kaoen lamlekuakei.”
32Hibü müt kho chem to atkei hoba Labanei ut onkünbü setshang sengkukei hoba haoei hao la ut shanga youho si nyem sungbakei, hoba hao hoba hao yoa loubü shuong shanga yousakla dei sungbakei. 33Hobaje hao la hao thedanga shausiyung phokukei, lausikei haoei laukei, “Ngei ngeibü ngühlang alenshongko teshaukho.” Hobaje Labanei laukei, “Kholonga künla lenbü.”
34Hobaje haoei laukei, “Ngo Abrahameibü sambü. 35Bunyubouei ngeibü bunyubou aeibou haükua, hoba hao aeibou keian yeia. Hobaje haoei hao la sanshuong hoba masu shuong, chandinam si hon, sambü shuong si sambüsao shuong hoba ut si gadu dogo kukei. 36Sara, ngeibü bunyuboueibü yakei ngeibü bunyu la, sao nou lean bousushou che bukkukei; hoba haoei hao la haoei kibü pendou kua. 37Hobaje ngeibü bunyubouei küto thetilantiko laukei, ‘Nyi küshou shanga Kanan saoshuong, aoyou yoa ngo kida khüka yak tengaku; 38lausikei no kübou chem to hoba ngeibü phang jungto hauan ngeibü shou shanga yak leiba.’ 39Hobaje ngei ngeibü bunyubou to laukei, ‘Aingenyu yaksanyuei küphai semmang asühlep yingkou?’ 40Hobaje haoei küto laukei, ‘Bunyubou ao thedanga ngo paida, haoei haoeibü khuthük hangangbü kayoa hautian kaibü wakou thüksimin haptilabü, hoba nyi küshou shanga ngeibü kaodak ka hoba kübou kaodak ka yak leian loulabü. 41Kheijinei no ladang kü kaodak to loulaje, nyi küto thebülanbü shanga aikei shedbü akilabü, hoba haoenei kala sao akulonga, no ngeibü thebülanbü shanga shedbü akilabü.’
42“Hobaje ngo tat deikhün to louan laukei: O Bunyubou, ngeibü bunyu Abraham Mühghaü, nyi ong ngeibü wakou thüksimin haptialonga, 43chühashi, ngo deikhün nyangko loakei, hoba medei ao deikhula loulaje hoba aoto ngei, ‘Kaibü ilechak ka küla yungla labü,’ dogo laula, 44hoba saoei kü to, ‘Nyi yungashi, hoba ngei kaibü ut shangakei dei khubakho,’ dogo laulaje kho Bunyubouei ngeibü bunyu shanga pienkubü yingtishi. 45Hobaje ngei kü maangpona alaukhümtoua, chühashi, Rebeka jembü phaka ilechak tonan loukei, hoba deikhün to hauan dei khukei. Hobaje ngei sao to laukei, ‘Küla dei inbü dogo ngei kato sudajada.’ 46Hobaje saoei panteiko ilechak phak ka tonletko laukei, ‘Yungashi, hoba kaibü ut lakei yungtikho.’ Hibü ngei yungkei hoba saoei ut lakei yungtikei. 47Hobaje ngei sao to phekei, ‘No aoeibü shou?’ Hobaje saoei laukei, ‘Nahor shou Bethuel la Milkaei bukkubü nouyangshou.’ Kheijinei ngei chimen kho saoeibü kunga jinkukei, hoba sao la ikngüma jikhap khapbukei. 48Hobaje ngei ngeibü khu khüpjung atkei hoba Bunyubou to lembei, hoba ngeibü bunyubou Abrahameibü Mühghaü Bunyubou nyen sangkei, aoei ngeibü bunyuboueibü jaieibü shi shanga ngo lamnyu tükdea leikei. 49Hobaje tou kanei ngeibü bunyubou sanouko hoba tükde jungeimang sühalonga kü la lenbüma; hoba tejungeikho lausi küla lenbüma; ngo maiaeto ayingsi nanaeto sepeilabü.”
50Kheijinei Laban si Bethuelei jongaiko laukei, “Ho Bunyubou ka longda, künei kato maibükei amaibükei alauenda. 51Chühashi, Rebeka kathedanga kia, sao leian hauashi, hoba Bunyubouei laubü tegü sao kaibü bunyuboueibü shoueibü yak la yeitiashi.”
52Kheijinei Abrahameibü sambüei haoeneibü ngüh kho ditan haoei hao lolo Bunyubou thedanga khüpetan lembei. 53Hobaje sambü khoei hon, chandinam, hoba peisilei sungjung louan Rebeka la kukei; hoba haoei saoeibü jai la hoba saoeibü nyu la namsek peisilei kukei.
54Kheijinei hao hoba hao yoa kibü mütshuongei shauan yungan khüyou khünei dantikei, hoba nyibounyet haoen pienan haoei laukei, “Ngo ngeibü bunyubou jungto hautikai.”
55Lausikei Rebekaeibü jai si haonyuei laukei, “Sao kün yoa chalou shisho, khei annyet ongkei phokushi hoba kho phaia sao haula thükkei.”
56Lausikei haoei haoen to laukei, “Bunyubouei ngeibü wakou thüksimin haptibü hapan, ngo teshiletma, ngo ngeibü bunyubou jungto hautishima.”
57Kheijinei haoenei laukei, “Künei sao ngaan phekho.” 58Hibü haoenei Rebeka ngaan phekei, “No ho müt yoa haumang sühdalao?” Saoei laukei, “Ngo haulabü.”
59Hibü haoenei haoeneibü na Rebeka hoba saoeibü sambüsao hoba Abrahameibü sambü hoba haoen mütshuong hautikei. 60Hobaje haoenei haoeneibü na Rebeka haüyoan phaia laukei,
“Nashounyu, no hajar hajar lauko juong thükkabü nyu yeishi!
Kaibü lilabü haoeneibü dangbou shuongeibü bakhün la leshi.”
61Kheijinei Rebeka si saoeibü sambüsao shuong lamlekei hoba Abraham sambü yoa haula ut to pükkei. Hobaje sambüei Rebeka leian jembü lam to haukei.
62Isak Beer Lahai Roi ka loukei, aieilausi hao yungthang aenei kikei. 63Hobaje Isak damanchühla chasemlamto sek aeto haukei, hoba haoei limchühsi ut louko hapbei. 64Hobaje Rebekaeikei chühangtisi Isak hapbei, hoba saoei Isak hapsi sao ut ka louyenkei. 65Hobaje saoei sambü to phekei, “Sen shuokla sek aeto louko kibou kho ao?” Sambüei laukei, “Hao ngeibü bunyubou.” Hobaje Rebekaei jembü thenyek yukbü nei sungan neikhu yukkei.
66Hobaje sambü khoei Isak la haoei kümbü pendou lenkei. 67Hobaje Isakei haonyu Saraeibü neichem to sao leiyetan Rebeka lekei, hoba haoei sao sanoukei, hoba haoeibü nyu haian phaia hao maang haksokei.
Currently Selected:
KAOBAK 24: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
