KAOBAK 31
31
Jakob Laban Jungka Satbü
1Hobaje Labaneibü shousi shuongei, “Jakobei seneibü boueibü ajanjan pendou langa hoba seneibü bou kibü danko haoei habü nyaksinam pendou hapbei,” dogo lenyoko Jakobei ditkei. 2Hobaje Jakobei Laban to chühsi hao shangiedbü thechüh tegü ayingko hapbei. 3Hobaje Bunyubouei Jakob to laukei, “Kabou habü kaodak to hoba ka chempen jungto sepeijung ngaiashi, hoba ngo ka yoa kilabü.”
4Hibü Jakobei haoeibü sanshuong kishang khongthu to Rachel si Lea ngaan sungkei. 5Hobaje haoei haosi to laukei, “Ngei kaboueibü thenyek shaanglabü thenyek tegü ayingko hapda; lausikei küboueibü Mühghaü küyoa kia. 6Hobaje ngei ngeibü hau pendouei kabou khangenkei dogo kanei kan lulu ngeakei. 7Lausikei kaneibü bouei ngo khüpettikei, hoba ngeibü mu annepenko jeileikukei. Khei yingasikei Mühghaüei haoei küto amaibü kümbü ka senetkei. 8‘Kapnakbü kaibü mu yinglabü,’ dogo ladang laulaje kheijinei sanlon pendouei kapnakbü shat; hoba ‘Panpan lanlanbü kaibü mu yinglabü,’ dogo haoei laualonga kheijinei san shuong pendouei panpan lanlanbü ong shatkei. 9Hibü Mühghaüei kaneibü boueibü sanshuong sungan kü la kukei.
10“Sanlon laangeibü jihsiphaia mangha ngei chühsi lon paang panpanlanlan, kapnakbü cheei laangeiko hapbei. 11Mangha Mühghaü khuthük hangangbüei kü to laukei, ‘Jakob,’ hoba ngei laukei, ‘Ngo hanei kia.’ 12Hobaje haoei laukei, ‘Kaibü nyekei chühashi, hoba chühko kisi laangeibü lon paang pendou kho panpan lanlanbü, hoba kapnakbü hoba jakjaklaklakbü kikei, aishanga ngei Labanei kato jungeibü pendou hapa. 13Ngo Bethel Mühghaü, laonei nyi laanga onang nangkukei, hoba kü to theletlanletbü che lekei. Toutham ho kaodak apyoashi hoba no bukbü kaodak to ngaiashi.’ ”
14Kheijinei Rachel si Lea hamei jongaiko laukei, “Kübou chema kün phejan ayingsi onat denche kilao? 15Haoei kün yenbou hima jungeida aying lo? Aishanga haoei kün yaakkei, hoba kün shangabü namkei haoei shauan apbua. 16Mühghaüei abou ka langbü nyaksinam kho seneibü hoba sen shousi shuong shangabü; hibü Mühghaüei ai ong kato lenkei kho jungeiashi.”
17Kheijinei Jakobei haoeibü shousi yaksi shuong pendou ut thüka settikei. 18Hobaje haoei, haoei Padan Arama thansheibü shatsinam si nyaksinam pendou haobou Isak jungto Kanan kaodak to haula shanga thedangto hauteitikei. 19Laban haoeibü san wi kipla hautoua Rachelei boueibü chemdang heangsho kokkei. 20Jakobei Arambü Laban la alenko huonan kokshoua satkukei. 21Hobaje hao haoei kibü pendou thonan satkei, hoba hao meimeijung Eufrates shumang kho danjung haukei; hoba haoei Gilead shongh ae haoeibü thenyek sepeikei.
Labanei Jakob Shibü
22Sembounyet Laban to Jakob kokshoua sada dogo lenkei. 23Hobaje haoei haoeibü jaisinasi hao yoa leian, haoei chalou nyetnyet lam to shijung hauan haoei Jakob Gilead shongha laphetkei. 24Hobaje Mühghaüei Arambü Laban jungto nangnak mangha longan hao to laukei, “Nyi Jakob to maibü yingasikei amaibü yingasikei aikei akümla no lolo maangsangashi.” 25Jakobei shongha haoeibü neichem dangan kijinei Labanei laphetkei; hoba Laban yoa haoeibü jaisinasi shuongei Gilead shongha neichem dangkei.
26Kheijinei Labanei Jakob to laukei, “Ngei angeko nyi huphanga ngeibü nouyangshousi shuong, wapyoa langsenbü hima langbü kho nyi ai kümbei? 27Ailaibü ka nyi küka hukoshepbo satkei? Tegüje ngei lemlemtham hoba langh langhko no hangan hautikhoulabü, nyi aila küla alen? 28Ailaibü nyi küla küshisi hoba nouyangshousi shuong to sembung ashepti? Nyi ngoualoua küma. 29Kato amaiko jungeila küto hau kia, lausikei kabou Mühghaüei miou küto joyoko lenkei, ‘Nyi Jakob to maibü yingasikei amaibü yingasikei aikei ajoyola maangsangashi.’ 30Tou nyi kabou chem waangko no ngaila khambeilonga, aila nyi ngeibü mühghaü shuong kokkei?”
31Hobaje Jakobei Laban to jongaiko laukei, “Aieilausi nyi kaibü nouyangshou nyi küka sungngailep yingkao dogo hatkei. 32Lausikei aoyoa nyi kaibü mühghaü shuong haplaje, hao langkei akilabü. Hobaje kün chemdanga kü yoa kaibü ai ki nyi lolo shean lenshi hoba hapoualonga kho nyi leshi.” Tou Rachelei kho kokkei dogo Jakobei ange.
33Hibü Laban Jakobeibü neichem hoba Leaeibü neichem hoba samnyu nyieibü neichem to atkei, lausikei haoei khübü kho ühüp. Hao Leaeibü neichem ka longan Racheleibü neichem to atkei. 34Tou Rachelei chemdang heangsho kho sungan ut setshanga jinkei, hoba khübü thüka setkei. Labanei neichem pendou aeto sepeisaiko chühsikei ühüp. 35Hobaje saoei bou to laukei, “Ngo ka thedanga lola amaibü küto temangpokma; aishanga yaksa haangei küto sühakei.” Kho tegü haoei lambei lausikei chemdang heangsho kho ühüp.
36Kheijinei Jakob khauangkei, hoba laukei, “Ngeibü shedbü ai? Nyi ngo hainyu khausakko shieilabü lele ngeibü shabü ai? 37Nyi ngeibü peisilei pendou to peman chühsikei nyi kaibü chembabü peisilei pendou ka ai hapbei? Kho haoei ngeibü jaisinasi shuong si kaibü jaisinasi shuong thedanga phoashi, hoba haoenei seti kanglanga mat najema.
38“Ngo ka yoa po saoche kikei. Kaibü sanlon pi hoba lon piei jembü shou aleilu, ayingsi kaibü sanshuong ka sanlon paang yoka ngei ashau. 39Laobou yamyangei taketnyu shaukei kho kajungto asungba; ngei lolo shembei. Chaloua kokbü yingsikei nangnak kokbü yingasikei kho nyi kü la shemtikei. 40Küthu hainyu kikei: Chaloua ngo aubüei hoba nangnak khamei khonkukei, hoba ngo nyeket alou. 41Ngo ka chemdanga po saoche kikei. Ngei kashou nouyangnyi shanga po anthüklei hoba kaibü sanshuong shanga po lak dogo kümbeileikei, khei yingankei nyi ngeibü mu annepenko jeileikei. 42Kübou Mühghaü, Abraham Mühghaü, hoba Isakei Souhatbü kü yoa aki tegüje, maimaitham nyi ngo toukei mütkong sattian kikhoulabü. Ngo khonsakbü hoba ikküm iklei Mühghaüei hapbei, hoba haoei miou kato lenkei.”
Laban si Jakob Ditenyobü
43Labanei Jakob to jongaiko laukei, “Sao nyi ho ngeibü nouyangshou hoba shousi shuong khokei ngeibü hoba sanshuong hokei ngeibü. Nyi hapbü pendou kho ngeibü. Lankei tat chaloua ngei ngeibü nouyangnyi hoba sao nyiei bukbü shousi shuong shanga ai kümla? 44Hibü kaiya, senei ngüh linyokho; ngo hoba no, hoba seti kanglanga ho aukabü kishi.”
45Hibü Jakobei laang che sungjung louan, kho laangthaonyu shanga kean phokei. 46Hobaje Jakobei haoeibü jaisina to laukei, “Laang yoshaiashi.” Hibü haoenei laang yoshaikei hoba laangshang kümbei; hoba haoen laangshang nyangko shaukei yungkei. 47Hobaje Labanei hoto Jegar Sahadutha dogo laukei, lausikei Jakobei hoto Galeed dogo laukei. 48Hobaje Labanei laukei, “Laangshang ho tat seti kanglanga aukabü ki.” Khoei hoeibü nyen Galeed dogo laukei. 49Hobaje laangthaonyu to Mizpa dogo laukei, aishanga haoei laukei, “Bunyubouei seti bangan kijinei lombo kishima. 50Nyi ngeibü nouyangnyu nyi khonsaktia longa ayingsi ngeibü nouyangnyu nyi khulimbo lubü yaksa ngaalonga, sen yoa müt ao akisi dogokei seti kanglanga Mühghaü aukabü kia.” 51Labanei toukei Jakob to laukei, “Ho laangshang to chühashi, hoba laangthaonyu to chühshi, laobou seti kanglanga ngei phokukei. 52Laangshang ho aukabü yingshi hoba laangthaonyu ho aukabü yingshi; khei amaibü kümla shanga ngo ho laangshang danko kajungto aloulabü, hoba nokei ho laangshang hoba laangthaunyu danko kü jungto amaibü kümla aloulabü. 53Abraham Mühghaü, Nahor Mühghaü, hoba haoeneibü bou Mühghaüei seti kanglanga matjemshi.” Hibü Jakobei haobou Isak to Souhatbü nyena thekeilankei. 54Jakobei shongha juokbülembü kukei hoba haoei hao chempen shuong oknyinla ngakei. Haoenei shauan yungan langyang sünga shongha khüpbei. 55Hobaje nyibounyet ngeyang enyu Labanei shisi shuong hoba haoeibü nouyangshou nyi to sembung shepbo haükukei; hoba khüka hao kishang to ngaikei.
Currently Selected:
KAOBAK 31: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
KAOBAK 31
31
Jakob Laban Jungka Satbü
1Hobaje Labaneibü shousi shuongei, “Jakobei seneibü boueibü ajanjan pendou langa hoba seneibü bou kibü danko haoei habü nyaksinam pendou hapbei,” dogo lenyoko Jakobei ditkei. 2Hobaje Jakobei Laban to chühsi hao shangiedbü thechüh tegü ayingko hapbei. 3Hobaje Bunyubouei Jakob to laukei, “Kabou habü kaodak to hoba ka chempen jungto sepeijung ngaiashi, hoba ngo ka yoa kilabü.”
4Hibü Jakobei haoeibü sanshuong kishang khongthu to Rachel si Lea ngaan sungkei. 5Hobaje haoei haosi to laukei, “Ngei kaboueibü thenyek shaanglabü thenyek tegü ayingko hapda; lausikei küboueibü Mühghaü küyoa kia. 6Hobaje ngei ngeibü hau pendouei kabou khangenkei dogo kanei kan lulu ngeakei. 7Lausikei kaneibü bouei ngo khüpettikei, hoba ngeibü mu annepenko jeileikukei. Khei yingasikei Mühghaüei haoei küto amaibü kümbü ka senetkei. 8‘Kapnakbü kaibü mu yinglabü,’ dogo ladang laulaje kheijinei sanlon pendouei kapnakbü shat; hoba ‘Panpan lanlanbü kaibü mu yinglabü,’ dogo haoei laualonga kheijinei san shuong pendouei panpan lanlanbü ong shatkei. 9Hibü Mühghaüei kaneibü boueibü sanshuong sungan kü la kukei.
10“Sanlon laangeibü jihsiphaia mangha ngei chühsi lon paang panpanlanlan, kapnakbü cheei laangeiko hapbei. 11Mangha Mühghaü khuthük hangangbüei kü to laukei, ‘Jakob,’ hoba ngei laukei, ‘Ngo hanei kia.’ 12Hobaje haoei laukei, ‘Kaibü nyekei chühashi, hoba chühko kisi laangeibü lon paang pendou kho panpan lanlanbü, hoba kapnakbü hoba jakjaklaklakbü kikei, aishanga ngei Labanei kato jungeibü pendou hapa. 13Ngo Bethel Mühghaü, laonei nyi laanga onang nangkukei, hoba kü to theletlanletbü che lekei. Toutham ho kaodak apyoashi hoba no bukbü kaodak to ngaiashi.’ ”
14Kheijinei Rachel si Lea hamei jongaiko laukei, “Kübou chema kün phejan ayingsi onat denche kilao? 15Haoei kün yenbou hima jungeida aying lo? Aishanga haoei kün yaakkei, hoba kün shangabü namkei haoei shauan apbua. 16Mühghaüei abou ka langbü nyaksinam kho seneibü hoba sen shousi shuong shangabü; hibü Mühghaüei ai ong kato lenkei kho jungeiashi.”
17Kheijinei Jakobei haoeibü shousi yaksi shuong pendou ut thüka settikei. 18Hobaje haoei, haoei Padan Arama thansheibü shatsinam si nyaksinam pendou haobou Isak jungto Kanan kaodak to haula shanga thedangto hauteitikei. 19Laban haoeibü san wi kipla hautoua Rachelei boueibü chemdang heangsho kokkei. 20Jakobei Arambü Laban la alenko huonan kokshoua satkukei. 21Hobaje hao haoei kibü pendou thonan satkei, hoba hao meimeijung Eufrates shumang kho danjung haukei; hoba haoei Gilead shongh ae haoeibü thenyek sepeikei.
Labanei Jakob Shibü
22Sembounyet Laban to Jakob kokshoua sada dogo lenkei. 23Hobaje haoei haoeibü jaisinasi hao yoa leian, haoei chalou nyetnyet lam to shijung hauan haoei Jakob Gilead shongha laphetkei. 24Hobaje Mühghaüei Arambü Laban jungto nangnak mangha longan hao to laukei, “Nyi Jakob to maibü yingasikei amaibü yingasikei aikei akümla no lolo maangsangashi.” 25Jakobei shongha haoeibü neichem dangan kijinei Labanei laphetkei; hoba Laban yoa haoeibü jaisinasi shuongei Gilead shongha neichem dangkei.
26Kheijinei Labanei Jakob to laukei, “Ngei angeko nyi huphanga ngeibü nouyangshousi shuong, wapyoa langsenbü hima langbü kho nyi ai kümbei? 27Ailaibü ka nyi küka hukoshepbo satkei? Tegüje ngei lemlemtham hoba langh langhko no hangan hautikhoulabü, nyi aila küla alen? 28Ailaibü nyi küla küshisi hoba nouyangshousi shuong to sembung ashepti? Nyi ngoualoua küma. 29Kato amaiko jungeila küto hau kia, lausikei kabou Mühghaüei miou küto joyoko lenkei, ‘Nyi Jakob to maibü yingasikei amaibü yingasikei aikei ajoyola maangsangashi.’ 30Tou nyi kabou chem waangko no ngaila khambeilonga, aila nyi ngeibü mühghaü shuong kokkei?”
31Hobaje Jakobei Laban to jongaiko laukei, “Aieilausi nyi kaibü nouyangshou nyi küka sungngailep yingkao dogo hatkei. 32Lausikei aoyoa nyi kaibü mühghaü shuong haplaje, hao langkei akilabü. Hobaje kün chemdanga kü yoa kaibü ai ki nyi lolo shean lenshi hoba hapoualonga kho nyi leshi.” Tou Rachelei kho kokkei dogo Jakobei ange.
33Hibü Laban Jakobeibü neichem hoba Leaeibü neichem hoba samnyu nyieibü neichem to atkei, lausikei haoei khübü kho ühüp. Hao Leaeibü neichem ka longan Racheleibü neichem to atkei. 34Tou Rachelei chemdang heangsho kho sungan ut setshanga jinkei, hoba khübü thüka setkei. Labanei neichem pendou aeto sepeisaiko chühsikei ühüp. 35Hobaje saoei bou to laukei, “Ngo ka thedanga lola amaibü küto temangpokma; aishanga yaksa haangei küto sühakei.” Kho tegü haoei lambei lausikei chemdang heangsho kho ühüp.
36Kheijinei Jakob khauangkei, hoba laukei, “Ngeibü shedbü ai? Nyi ngo hainyu khausakko shieilabü lele ngeibü shabü ai? 37Nyi ngeibü peisilei pendou to peman chühsikei nyi kaibü chembabü peisilei pendou ka ai hapbei? Kho haoei ngeibü jaisinasi shuong si kaibü jaisinasi shuong thedanga phoashi, hoba haoenei seti kanglanga mat najema.
38“Ngo ka yoa po saoche kikei. Kaibü sanlon pi hoba lon piei jembü shou aleilu, ayingsi kaibü sanshuong ka sanlon paang yoka ngei ashau. 39Laobou yamyangei taketnyu shaukei kho kajungto asungba; ngei lolo shembei. Chaloua kokbü yingsikei nangnak kokbü yingasikei kho nyi kü la shemtikei. 40Küthu hainyu kikei: Chaloua ngo aubüei hoba nangnak khamei khonkukei, hoba ngo nyeket alou. 41Ngo ka chemdanga po saoche kikei. Ngei kashou nouyangnyi shanga po anthüklei hoba kaibü sanshuong shanga po lak dogo kümbeileikei, khei yingankei nyi ngeibü mu annepenko jeileikei. 42Kübou Mühghaü, Abraham Mühghaü, hoba Isakei Souhatbü kü yoa aki tegüje, maimaitham nyi ngo toukei mütkong sattian kikhoulabü. Ngo khonsakbü hoba ikküm iklei Mühghaüei hapbei, hoba haoei miou kato lenkei.”
Laban si Jakob Ditenyobü
43Labanei Jakob to jongaiko laukei, “Sao nyi ho ngeibü nouyangshou hoba shousi shuong khokei ngeibü hoba sanshuong hokei ngeibü. Nyi hapbü pendou kho ngeibü. Lankei tat chaloua ngei ngeibü nouyangnyi hoba sao nyiei bukbü shousi shuong shanga ai kümla? 44Hibü kaiya, senei ngüh linyokho; ngo hoba no, hoba seti kanglanga ho aukabü kishi.”
45Hibü Jakobei laang che sungjung louan, kho laangthaonyu shanga kean phokei. 46Hobaje Jakobei haoeibü jaisina to laukei, “Laang yoshaiashi.” Hibü haoenei laang yoshaikei hoba laangshang kümbei; hoba haoen laangshang nyangko shaukei yungkei. 47Hobaje Labanei hoto Jegar Sahadutha dogo laukei, lausikei Jakobei hoto Galeed dogo laukei. 48Hobaje Labanei laukei, “Laangshang ho tat seti kanglanga aukabü ki.” Khoei hoeibü nyen Galeed dogo laukei. 49Hobaje laangthaonyu to Mizpa dogo laukei, aishanga haoei laukei, “Bunyubouei seti bangan kijinei lombo kishima. 50Nyi ngeibü nouyangnyu nyi khonsaktia longa ayingsi ngeibü nouyangnyu nyi khulimbo lubü yaksa ngaalonga, sen yoa müt ao akisi dogokei seti kanglanga Mühghaü aukabü kia.” 51Labanei toukei Jakob to laukei, “Ho laangshang to chühashi, hoba laangthaonyu to chühshi, laobou seti kanglanga ngei phokukei. 52Laangshang ho aukabü yingshi hoba laangthaonyu ho aukabü yingshi; khei amaibü kümla shanga ngo ho laangshang danko kajungto aloulabü, hoba nokei ho laangshang hoba laangthaunyu danko kü jungto amaibü kümla aloulabü. 53Abraham Mühghaü, Nahor Mühghaü, hoba haoeneibü bou Mühghaüei seti kanglanga matjemshi.” Hibü Jakobei haobou Isak to Souhatbü nyena thekeilankei. 54Jakobei shongha juokbülembü kukei hoba haoei hao chempen shuong oknyinla ngakei. Haoenei shauan yungan langyang sünga shongha khüpbei. 55Hobaje nyibounyet ngeyang enyu Labanei shisi shuong hoba haoeibü nouyangshou nyi to sembung shepbo haükukei; hoba khüka hao kishang to ngaikei.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.