JOHAN 13

Jisuei Haoeibü Eikshuong You Sakkubü

1Ho Püetbü Lem thedangto kikei. Jisuei haoeibü langkei ho kaodak ka Bou jungto banglabü jih lousüha dogo ngekei. Haoei kaodaka kibü haoeibü dan to sanoukei, hoba haoei haoen thonbüa sühko sanoukei. 2Simon Iskhariot shou, Judasei hao khümbomeiko kuan aplabü dogo Sataneije janenan kiteikei. Nyak shaujinei 3Jisuei, Bouei ajanjan pendou haoeibü ikmanga kuan apa, hoba hao Mühghaü ka loukei hoba Mühghaü jungto hauda dogo ngean, 4nyakshaushang ka loenkei, haoeibü neisimei saüan phokei, hoba lemhamnei che sungbaan haoeibü manga shenkei; 5kheijinei haoei deithunga dei yeikei hoba eikshuongeibü you sakkuan, haoei shenjanga shenan kibü lem- hamneiei haman apbula khangkei. 6Hao Simon Peter junga sühlangkei. Peterei hao to laukei, “Bunyubou, nyi kü you sakkula kümda si?” 7Jisuei hao to jongaikei, “Ngei ai kümda kho nyi touje angekei; lausikei nyi haphaia ditenlabü.” 8Peterei hao to laukei, “Nyi kü you ladangkei asakkulabü!” Jisuei hao to jongaikei, “Ngei no asakku longa, no kü yoa ai phejan aki.” 9Simon Peterei hao to laukei, “Bunyubou, kü you ong ayingko kü ik si kü khukei sakbüma.”

10Jisuei hao to laukei, “Aoei mang yua, you to limanje aikei saklabü aki, lausikei hao mang khümbo saopoakei; hoba kan sao- poakei, lankei kan pendou thamje ji;” 11aishanga haoei hao khümbo yaakshaulabü müt kho ngean kiteikei. Khoei haoei laukei, “Kan pendouje asaopokei.”

12Ladang haoei haoeneibü you sakkhümbuan haoeibü neisimei lekei hoba nyibou setkei, haoei haoen to laukei, “Ngei kan to ai kümbei kho kanei ditena lo? 13Kanei kü to Lenbou hoba Bunyubou dogo ngada, hoba kho kanei laujana lauda, aishanga ngo kho ki. 14Kholongaje, ngo kaneibü Bunyubou si Lenbouei kaneibü you sakkukei longa, kaneikei cheei cheeibü you sakkujan. 15Aieilausi ngei kan shanga kümbü tegü, kaneikei khei kümjan dogo ngei kan la tetsida lena. 16Maimaitham ngühmaia ngei kan to lenda, aao che kho haoeibü bunyu to yaangbou ayingsi hautibü kho hautibou to yaangbou aying. 17Kanei ho ngean kanei jungeia longa, kan olinbou. 18#NC 41.9 Ngei kan pendou shangabü alauda. Ngei ao pienkeije ngei ngeakei. Lausikei Lai ngüh ho naloushad, ‘Aoei kü shausiyung shauda haoei khü- peian kü khu limbei.’ 19Ladang ho loushadlaje kheijinei kanei ngo kho hao dogo mailemtila shanga, ho ühaüthükjinei ngei kan la tou lenteida. 20Maimaitham ngühmaia ngei kan la lenda, aoei ngei hautibou sungletlaje haoei ngo sungletda, hoba aoei ngo sungletda, haoei ngo hautibou sungletda.”

Jisuei Hao Hailabü shangabü Lenteibü

(Mt 26.20-25; Mk 14.17-21; Lk 22.21-23)

21Jisuei kho lauan phaia hao to maangto shatbü lilitham loukei hoba tang khitko laukei, “Maimaitham ngühmaia ngei kan to lenda, kan yo kabü cheei ngo khümbomeiko kuan aplabü.” 22Eikshuongei cheei che to chühyo khüpbei, aieilausi haoei ao to laudaje haoenei ashuoken. 23Haoeibü eikshuong yoa che, Jisuei ao to sanouda, hao kho nongyoan Jisu thena setan kiteikei. 24Simon Peterei hao to nyek sheman lenko, haoei ao shangabü laudaje kho phela shanga laukei. 25Aüan setbü yam, haoei Jisueibü khukua nongngailangan hao to laukei, “Bunyubou, kho ao?” 26Jisuei jongaikei, “Ngei ho wentek phaua haman aola kulaje kho müt yinglabü.” Kheijinei haoei wentek che phaua haman sungenkei hoba Simon Iskhariot shou Judas la kukei. 27Ladang haoei kho shaukei, Satan hao to atkei. Jisuei hao to laukei, “Nyi ai kümlaje, tongde kümashi.” 28Haoei aila hao to khei laukeije khün setbü shuong aoeikei ange. 29“Senei Lem shanga ai khamdaje jekashi,” ayingsi haoei “Shalebü la aicheje kujan,” dogo lauda lembo ateije dambei. 30Hibü haoei wentek kho shauan phaia hao wenjung satkei. Kho nangnak kikei.

Ngühkhüm Haanbü

31Judas satan phaia Jisuei laukei, “Tou Müteibü Shou soneikanga, hoba hao to Mühghaü soneikanga, 32Mühghaü hao to soneikanga, Mühghaüeikei hao jembü yoa soneikangtilabü, hoba haoei kho toutham kümlabü. 33Kü shousi shuong, touje ngo kan yoa tuisho ong kilabü. ‘Kanei ngo lameilabü, hoba ngo laeto haulaje kan alouenlabü’, dogo ngei Jihudabü to laukubü tegü, toukei ngei kanlakei lenda. 34Ngei kan la ngühkhüm haanbü che kuda: Kan cheei che to sanouyoashi; ngei kan to sanoubü tegü, cheei che to sanoushi. 35Kan cheei che to sanoubü danko kan ngeibü eikshuong dogo pendouei ngelabü.”

Peterei Athekulabü shangabü Jisuei Lenteibü

(Mt 26.31-35; Mk 14.27-31; Lk 22.31-34)

36Simon Peterei hao to laukei, “Bunyubou, no lato hauda?” Jisuei jongaikei, “Ngo laeto haudaje nyi tou kü phai semla athükkei, lausikei nyi phaia semenlabü.” 37Peterei hao to laukei, “Bunyubou, ngei aiei ka phai tou asemenla? Ngei ka shanga kü langkei phoyokulabü.” 38Jisuei jongaikei, “Nyi kü shanga kaibü langkei phokulep si? Maimaitham ngühmaia ngei kato lenda, Nyi ngo angekei dogo semnei alau shongko aunakei akoulabü.”

Currently Selected:

JOHAN 13: CHANGBSI

Highlight

Copy