JOHAN 12

Jisu la Bethania Onang Naangkubü

(Mt 26.6-13; Mk 14.3-9)

1Püetbülem sühla chalou lak kian, Jisu, haoei haibü ka langngaitibou Lazar kishang Bethani to loukei. 2Haoenei hao la shausiyung lamlekukei hoba Marthaei nongnaekei; hoba Lazarkei hao yoa shaushanga setbü yoa che kiteikei. 3Mariei nam juong mubü ponlem onang thungshou che sungjung louan Jisueibü youa naangkukei hoba saoeibü khulouei haman apbukei. Chemmang pendou onang ponlemei shenkei. 4Judas Iskhariot, haoeibü eik yoa che, aoei hao khümbo kuan apla kiteikei, haoei laukei, 5“Aila kho ponlem onang kho sempak saongao sem lu yakan shalebü la aku?” 6Haoei kho shalebü shanga dambubü ka aying, lausikei hao namphot ikjai kikei hoba kokbü yingsije thanbü ka haoei kokshauko kikei. 7Jisuei laukei, “Sao khei ong phokushi; saoei ponlem kho ngo khünbü chalou shanga naphoa; 8aieilausi shalebü kan yoa ponpen kia, lausikei kan yoa ngo ponpenje akilabü.”

Lazar Khulimbo Huonbütakbü

9Jihudabü mütshang yaangei Jisu Bethania kia dogo ditletkei, hoba haoen kho shanga ong aying lausikei haoei haikhün ka langngaitibü Lazar to chühlakei dogo loukei. 10Thükkabü ungshedbü shuongei Lazarkei haitila huonkei, 11aieilausi hao hangshong Jihudabü juongei haoen wailetkei hoba Jisu to mailembei.

Jerusalem to Thük Hapbo Atbü

(Mt 21.1-11; Mk 11.1-11; Lk 19.28-40)

12Nyibounyet Lem to loubü mütshang yaangei Jisu Jerusalem to louada dogo ditkei; 13hoba haoenei hekyang pik pakkei hoba hao shuokla haukei. Haoenei hai ngekdang lekei,

“Hosana!

Bunyubou nyena ao louada hao haülabü yingshi!

Israel Choba haülabou ki!”

14Jisuei gadu shoushou che hapbei hoba kho thüka setkei, Laia lenan kibü tegü,

15“Tehüt, Zion Sangnyu;

chühashi, kaneibü Choba gadu shoushou chenei setan louada.”

16Haoeibü eikshuongei shaanglaje kho aditen, lausikei ladang Jisu soneikangkei, kheijinei haoenei ho hao shangabü Laia dobü, hoba mütshuongei hao shanga kheinyu kümbei dogo haoenei damenkei. 17Haoei Lazar heekhün ka ngaanko, haibü ka langngaikujinei hao yoa kibü mütshang pendouei aukabü kukei. 18Noknyühkei hao shuokla haukei aieilausi haoenei haoei kho sei kümbü ditkei. 19Farisibü shuong cheei che to laukei, “Kan ai hang along dogo kanei ngeakei. Chüha, kaodak pendouei hao phai sema!”

Grikbü atei Jisu Lambü

20Lem to lemla loubü shuong yoa Grikbü at yoan kikei. 21Haoenei Galil kabü Bethsaidabü Filip to hai sukojako phekei, “Yaangbou, künei Jisu hapmang sühda.” 22Filip loukei hoba Andria to lenkei. Andria si Filip louan Jisu to lenkei. 23Jisuei haoen to jongaikei, “Müteibü Shou soneikanglabü jih süha. 24Maimaitham ngühmaia ngei kan to lenda: Youli lang che kaoa shatan akhit longa, hao lansan kida; lausikei kho khitalonga, khoei mai juongnyu hekda. 25Aoei haoeibü langkei sanouda, kho mauda, lausikei aoei jembü langkei mangsenda kho phoenlabü hoba thon akibü langkei haplabü. 26Müt atei ngo khangensije, haoei kü phai semkai, hoba ngo lanei kilaje khünei ngo khangenboukei kilabü. Müt atei ngo khangensije, Bouei hao to soumo hatlabü.”

Jisuei Hao Hailabü shangabü Laubü

27“Tou kü soushou to lamda, hoba ngei ai laula? Abou, ho jih ka ngo khümenkai dogo si? Lausikei ho shangabü ngo ho jih to loukei. 28Abou, ka nyen soneikangtishi. Khuthük ka ngüh che loukei, ‘Ngei ho soneikangtia, hoba ngei toukei ho nyibou soneikangtilabü.’” 29Khünei loan kibü noknyühei kho ditkei hoba kho langmak yingkei dogo laukei. Atei laukei, “Khuthük hangangbü cheei hao to joyoa.” 30Jisuei laukei, “Ho ngühlang kü shanga aying, lausikei kan shanga ki. 31Ho kaodak tou matjemda; ho kaodak songdakbou tou shian sattilabü. 32Hobaje ngo ladang kaodak ka tonenlaje, ngei müt pendou kü jungto senbalabü.” 33(Haoei kho hao aiei hailabü yingkeije kho lenla shanga lauan kiteikei.) 34#Isa 9.7 Noknyühei jongaikei, “Messiaje ponpen kida dogo künei Ngühkhüm ka dida; kholonga nyi laibü Müteibü Shou kho tonenlabü dogo lauda? Kho Müteibü Shou kho ao?” 35Jisuei haoen to laukei, “Tuisho shanga ngesakbü kho kan yoa kilabü. Nakthühei ala- phettila shanga kan ngesakbü kijinei paiashi; aishanga ao nakthüh phanga paida haoei hao lae haudaje angeda. 36Ladang kanei ngesakbü kida, kan ngesakbü shousi shuong la yeila shanga, ngesakbü to mailemashi.”

Jihudabü Maialemenbü Maangpon

Jisuei kho lauan phaia hao satkei hoba haoen la hukukei. 37Haoei haoen thedanga tetsida juongnyu kümasikei haoenei hao to maialem, 38khoei Isaia thuseibüei laubü ngüh ho loushadla kiteikei,

“Bunyubou, küneibü ngühlang aoei mailembei?

Hobaje ao to Bunyubou hau tang khitkei?”

39Haoenei maialemen, aishanga Isaiaei tokei lauakei,

40 # Isa 6.10 “Haoei haoeneibü nyek thutiakei,

hoba haoeneibü maangpon ngoutiakei.

Haoei kheinyu aküm tegüje haoenei

haoeneibü nyekei haplabü,

haoeneibü maangponei ditenlabü,

hoba sepeilabü,

hoba ngei haoen maitikulabü.”

41Isaiaei ho laukei aieilausi haoei Jisu soneikangbü hapbei hoba hao shanga lauko kikei. 42Khei yingasikei, leiyeibü yoan juongei hao to mailembei, lausikei sinagog ka shian sattisi amailabü dogo Farisibü to hatbü ka haoenei atheku; 43aishanga haoenei Mühghaü nyensang toje müteibü nyensang bouje sanoukei.

Jisueibü Ngühei Matjembü

44Jisuei ngekkei, “Aoei kü to mailemda, kü to mailemda aying lausikei ngo hautibou to mailemda; 45hoba ngo aoei hapda, haoei ngo hautibou hapda. 46Ngo ngesakbü ki, hoba kü to mailembüje aokei nakthüha akilabü shanga ngo kaodak to loukei. 47Müt atei kü ngüh ditan ajungei longa, ngei haomat ajemda; aishanga ngo kaodak matjemla aying, lausikei kaodak khümenla loukei. 48Aoei ngo asungletlaje hoba ngeibü ngüh asungletda haoei matjembou che kia. Ngei laubü ngühlang hoei hao thonbü chaloua mat jemlabü; 49aishanga ngei jembü hauei alau, lausikei ngo hautibou, Bouei, ngei ai laula hoba lenla kho ngühkhüm kukei. 50Haoeibü ngühkhüm tetlabü thon akibü langkei dogo ngei ngeakei. Bouei kü to lai lautila lenkei ngei kho ong lauda.”

Currently Selected:

JOHAN 12: CHANGBSI

Highlight

Copy