JOHAN 11

Lazar Haibü

1Mari si Martha habü sang Bethani kabü Lazar nyenbü shatbü müt che kiteikei. 2Kho Bunyubou la ponlem onang naangkuan saoeibü khulouei haman apbunyu Mari, saoeibü na Lazar shatko kiteikei. 3Hibü nounyiei hao jungto hai lauko hautikei, “Bunyubou, kathangbou kho shatda.” 4Ladang Jisuei kho ditkei haoei laukei, “Kho shatbü kho haibüa thonlabü aying, lausikei ho danko Mühghaü Shou soneikangtila shanga ki.” 5Jisuei Martha hoba saoeibü na hoba Lazar to sanoukei. 6Ladang haoei hao shatda dogo ditkei, haoei tokei hao lan kiteikei khünei chalou nyi thüngkei; 7hoba kho phaia haoei haoeibü eikshuong to laukei, “Sen Jihuda to han ngaiakho.” 8Eikshuongei hao to laukei, “Lenbou, tou nyangko ong Jihudabüei kato laangei tetla lameikei; no khüto nyibou hauda si?” 9Jisuei jongaikei, “Chalou chenei angh anthüknyi akida si? Müt cheei chaloua paia longa, aphaiyetlabü, aishanga haoei ho kaodak ngesakbü hapda; 10lausikei müt cheei nangnak paialonga, hao phaiyetda, aieilausi ngesakbü kho hao to aki.” 11Kho lauan phaia haoei laukei, “Sen thangbou, Lazar nyeket shiakei; lausikei ngo hao lakseptila hauda.” 12Eikshuongei hao to laukei, “Bunyubou, hao nyeket shikei longa, hao mailabü.” 13Jisuei hao haibü shanga lauan kiteikei, lausikei haoei nyishoubü yepbü shanga lauda dogo haoenei dambei. 14Kheijinei Jisuei haoen la shangashatko lenkei, “Lazar haia, 15kanei mailemtila ngo khünei akiteibüei ngo kan shanga olinda. Sen hao jungto hauakho.” 16Hibü Thoma (laobou ngühtet “Phokshou”) ei jambü eikshuong to laukei, “Hao yoa hailabü lele senkei hauakho.”

Jisu kho Langngaibü hoba Langkei

17Ladang Jisu loukei kheijineije Lazar heea khünan phaia chalou leibounyet yingan kikei. 18Bethani kho Jerusalem nyangko, mail nyi thüngei aoan kikei. 19Jihudabü juong Martha si Mari jungto haosieibü na shanga maang sula louan kiteikei. 20Ladang Marthaei Jisu louada dogo ditkei, sao shuokla haukei; lausikei Mari chema setteikei. 21Kheijinei Marthaei Jisu to laukei, “Bunyubou, no hanei kiteia tegüje küna tehaikhoulabü. 22Ngei ngeakei, tou yinga tegükei, nyi Mühghaü ka ai ong hilaje, haoei kala kulabü.” 23Jisuei sao to laukei, “Kana langngailabü.” 24Marthaei Jisu to laukei, “Thonbü Chaloua langngaibü jihsiphaia hao nyibou langkeilabü dogo ngei ngeakei.” 25Jisuei sao to laukei, “Ngo langngaibü hoba langkei ki. Aoei kü to mailemda, hao haiasikei lang kilabü; 26hoba ao lang kida hoba kü to mailemda, hao ladangkei ühailabü. Nyi mailemdalao?” 27Saoei hao to laukei, “Haü, Bunyubou, kaodak to louko kibou, Mühghaü Shou, Messia kho no, dogo ngei mailemda.”

Jisu Haapbei

28Saoei kho lauan phaia, sao ngaikei hoba saoeibü na Mari ngalangan, hakphangshoua lenkei, “Lenbou kho hanei kia, hoba haoei no ngada.” 29Ladang Mariei kho ditkei sao tongde loenkei hoba hao jungto haukei. 30Kheijinei Jisu sangnyu to molung, lausikei Marthaei hao haüyoshang kaoena ong kiteikei. 31Hibü ladang saoeibü maang suko Mari yoa chema setbü Jihudabü shuongei Mari phühde loenan satan apbü hapbei, haoenei sao heedang to haapla hauda dogo daman sao phai sembei. 32Ladang saoei Jisu hapbei, saoei haoyou junga khü- petkei hoba hao to laukei, “Bunyubou, no hanei kiteikei teg- üje küna tehaikhoulabou.” 33Jisuei sao hoba sao yoa loubü Jihudabü shuongkei haapyoko hapbei. Hao to maang leilukei hoba waangkei, 34hoba laukei, “Kanei hao lanei khünkei?” Haoenei hao to laukei, “Yaangbou, louan chühashi.” 35Jisu haapbei. 36Kheijinei Jihudabüei laukei, “Haoei hao to latetche sanoukei, chühashi!” 37Lausikei haoen atei laukei, “Haoei nyekthubü shuong la nyek ipbukei. Ho müt ühaitila haoei dencheje kümbü yingma lo?”

Lazar Langngaitibü

38Jisu to nyibou maangto shatko heekhün to loukei. Kho laangkhün che, hoba laang cheei thangngaian kiteikei. 39Jisuei laukei, “Laang kho khokan apashi.” Haibüeibü nou Marthaei hao to laukei, “Bunyubou, touje mangnyaülüm hilabü; hao haian chalou lei yinga.” 40Jisuei sao to laukei, “Nyi mailemsije nyi Mühghaü soneikangbü haplabü dogo ngei kala alen lo?” 41Hibü haoenei laang kho khokan apbei; hoba Jisuei chühangtikei hoba laukei, “Abou, nyi kü to ditkubü shanga ngei ka nyen sangda. 42Nyi kü to ponpen ditkuda dogo ngeikei ngeakei; lausikei hanei kaijembo loan kibü noknyüh laüa khei ngo hautibou kho no yingan kikei dogo haoenei mailemtila ngei ho laukei.” 43Kho lauan phaia haoei ngüh yaangei ngekkei, “Lazar, longashi.”

44Haian kibü müt kho haoeibü mangsho neiei kaian hoba haoeibü thenyek lemhamneiei yuklepan longkei. Jisuei haoen to laukei, “Mangsho nei sengkuashi hoba hao litiashi.”

Jisu Khulimbo Huonbü

(Mt 26.1-5; Mk 14.1-2; Lk 22.1-2)

45Hibü Jihudabü juong aoyou Mari jungto loukei, haoenei haoei kümbü hapbei, hoba hao to mailembei, 46lausikei haoen yoa at Farisibü jungto haukei hoba Jisuei ai kümbei kho haoen to lenkei. 47Hibü thükkabü ungshedbou shuong si Farisibü shuongei Thükkabou Kambü huiletkei hoba laukei, “Kho mütei ama- aphilabü juongnyu kümda. Sen ai kümbo setda? 48Senei hao khei apyoa longa, müt pendouei hao to mailemlabü, hoba Rombü louan seneibü lembüchem si sen phang ham leilukulabü.” 49Haoen yo kabü müt che Kaifa nyenbü, ao khüpo thükkabou ungshedbou penan kikei, haoei haoen to laukei, “Kanei ai angekei; 50sen phangshuong pendou shembhoulabü khantoje mütli shanga müt che haibü kho kan shanga maibou dogo kaneije damankei achühda.” 51Haoei ho haoeibü hauei laukei ji, lausikei khüpo thükkabou ungshedbou yingbü ka, phangshuong shanga Jisu haijan, 52hoba phangshuong shanga ong aying, lausikei haoei aan kibü Mühghaü shousi shuong chela yeiko leishaila shangabü haoei ho tetenkei. 53Hibü khünyet ka jaüan Jihudabüei Jisu haitila huonkei.

54Hibü haoei Jihudabü yoa abongyo, lausikei khüka lamang nyangko kibü kaonyek, Efraim nyenbü sangnyu to haukei, hoba hao khünei eikshuong yoa kikei.

55Jihudabü Püetbülem nyangko kikei, hoba haoen lolo saüenla shanga kaonyek ka müt juongnyu Püetbülem thedangto Jerusalem to angkei. 56Haoenei Jisu lameiko kikei hoba lembüchema loan haoen si haoen hai lauyokei, “Kanei ai damda? Hao maimaitham lem to aloulabü si ai?” 57Haoenei hao lapla shanga müt atei ongkei hao lan kije ngealonga, haoei ngühlang kujan, dogo thükkabü ungshedbü shuong si Farisibü shu- ongei ngühkhüm kuan kiteikei.

Currently Selected:

JOHAN 11: CHANGBSI

Highlight

Copy