JOHAN 10
10
Sanchem Ngühphatbü
1“Ngühmaia ngei kan to lenda, ao koukhüm danko sanchem to alotda lausikei lubü lam aeka nguida, hao kokbü hoba yepeibü; 2lausikei san shuong lombouje koukhüm danko lotda. 3Hao la koukhüm lombouei ipbuda, hoba san shuongei hao ngüh ditda; haoei jembüeibü sanshuong nyenshenko ngada hoba leian satda. 4Ladang haoei jembüeibü pendou leibada, hao haoen thedanga paida, hoba sanshuongei hao phai semda aieilausi haoenei hao ngüh ngekei. 5Haoenei yenbou phai asemlabü, lausikei hao jungka laangjung satkhümlabü aishanga haoenei yenboueibü ngüh kho ashenkei.” 6Jisuei kho ngühphatbü haoen to laukei, lausikei haoei haoen to ai laudaje haoenei aditen.
Jisu Sanlombü Maibü
7Jisuei nyibou laukei, “Maimaitham ngühmaia ngei kan to lenda, ngo sanshuong shanga koukhüm. 8#Jer 23.1 Kü to shaang loubü shuong pendou kokbü hoba yepeijawebü, lausikei sanshuongei haoen to aditku. 9Ngo koukhüm; ngo danko atei lotsije hao khümenlabü, hoba lotlabü hoba anglabü hoba lamshaushang haplabü. 10Kokbüje koklangla hoba haitila hoba leilutila shanga ong louda. Mütshuongei langkeibü nahapla shanga ngo loukei hoba ho apsileko haplabü. 11Ngo sanlombü maibü. Sanlombü maibüei sanshuong shanga haoeibü langkei phoyokuda. 12Mulambü müt, ao sanlombü ji, ayingsi sanbuboukei aying, ladang sho che louko hapda haoei sanshuong apyoda hoba wenjung satda, hoba shoei taketda hoba lintida. 13#Zec 11.16-17 Kho aieilausi hao mulambü müt hoba haoei sanshuong shanga adambuda. 14-15Ngo sanlombü maibü, Bouei ngo lai ngekei, kho tegü ngei jembüeibü ngekkei, hoba jembüeibüei ngo ngekei; hoba sanshuong shanga ngei kü langkei phoyokuda. 16#Isa 56.8 Ho sanchema ayobü ngeibü san lubü kia. Ngei haoenkei leibajan hoba haoenei kü ngüh to ditlabü, hoba haoen sanlombü che yoa sanshuong che yeilabü. 17Bouei ngo sanouda, aieilausi kho nyibou hapmeilabü lele ngei kü langkei phoyokuda. 18Aoeikei ho kü ka alangda, lausikei ngei ho ngei lolo phoyokuda. Ngei ho phoyola janbü ki hoba ngei ho nyibou hapmeila janbü ki. Kübouei kü to ho kümla lenkei.”
19Tokei Jihudabü yoa ho ngüh danko janyinbü longkei. 20Haoen juongei laukei, “Hao to shabü sou kia, hoba langet angda. Kanei aila hao ngüh ditda?” 21Lubü shuongei laukei, “Habü hoje shabü souei lapbü ngüh aying. Shabü souei nyekthubü nyek khittikula thüklep si?”
Jihudabüei Jisu Wailetbü
22Jerusalema Saüenbü Lem kikei. Kho poanga; 23hoba Jisu Solomon chemsophanga lembü- chema paiko kikei. 24Jihudabüei hao kailepbei hoba hao to laukei, “Nyi kün lalokche phenyemtila? No Messia yingalonga kün la tou chongchingko lenbü.” 25Jisuei haoen to jongaikei, “Ngei kan to lena, hoba kanei maialemda. Ngei kü Bou nyena kümbü kümsileiei kü shangabü aukabü kuda; 26lausikei kanei maialemda, aieilausi kan ngeibü sanshuong aying. 27Kü sanshuongei kü ngüh ditda; ngei haoen ngeakei hoba haoenei kü phai semda. 28Ngei haoen la thon akibü langkei kuda, haoen ladangkei amaulabü, hoba aoeikei kü ikmang ka haoen asolanglabü. 29Kü Bouei ai küla kuan ki kho pendou to yaangbou, hoba aoeikei Boueibü ik ka haoen sola athükkei.” 30Bou hoba ngo che ong.
31Jihudabüei hao to tetla nyibou laang hekei. 32Jisuei haoen to jongaikei, “Bou ka ngei kan la kümsilei juongnyu lena. Khübü yo ka laobou kümsilei shanga kanei kü to tetla?” 33#Lev 24.16 Jihudabü shuongei hao to jongaikei, “Kümsilei maibü shanga künei kato atetda, lausikei Mühghaü nyikubü shanga, hoba no müt che ong yingan, nyi no lolo Mühghaü la yeibü shanga. 34#NC 82.1-6 ‘Kan mühghaü shuong’, dogo Mühghaüei laubü kaneibü Ngühkhüma adokei lo? 35Haoen aoyou jungto Mühghaü ngüh loukei, haoei haoen to mühghaü dogo ngakei, hoba Laishiba ngüh sungenan apla athükkei. 36Kholongaje, ngei ‘Ngo Mühghaü Shou’ dogo laubü shanga, Bouei ao saüenkei hoba kaodak to hautikei, hao to kanei ‘Nyi Mühghaü nyikuda’, dogo lauda lo? 37Ngei Kübou kümsilei aküm longaje kü to maitelemkai; 38lausikei ngei khübü kümda longa, kanei kü to maialemasikei, Bou kü to ki hoba ngo Bou to ki dogo kanei damenlabü hoba ngelabü lele, kümsilei shuong to mailemshi.” 39Hibü nyiboukei haoenei hao lapla haujembei; lausikei hao haoen ikmang ka satenkei.
40Hao nyibou Jordan thi aedang, Johanei shaangla baptikushang to haukei, hoba hao khünei kikei. 41Müt juong hao jungto loukei. Haoenei laukei, “Johanei amaaphilabü ai aküm, lausikei Johanei ho müt shangabü laubü pendou kho tükde ong kiteikei.” 42Hobaje juongei hao to khün mailembei.
Currently Selected:
JOHAN 10: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
