JOHAN 9
9
Jisuei Nyekthuan Bukbü La Haptikubü
1Jisuei hao haujinei, bukjineithama nyek thubü müt che hapbei. 2Haoeibü eikshuongei hao to phekei, “Lenbou, hao nyek thuan buklabü lele, ho mütei si, haonyu haobouei shabü shonkei?” 3Jisuei jongaikei, “Ho haoeibü shabü ayingsi haoeibü nyusiboueibü shabüeikei aying; lausikei hao danko Mühghaü kümsilei tang khittila shanga hao nyek thuan bukkei. 4Senei changea ngo hautiboueibü kümsilei kümjan. Aoeikei akümaleienlabü lele nangnak louda. 5Ngo kaodaka ki shongko ngo kaodak ngesakbü.” 6Haoei khei lauan phaia, haoei kaoa eok thuokkei, hoba eoka thamdak totkei; haoei thamdak kho müteibü nyeka naangkukei, 7hoba hao to laukei, “Hauashi, hoba Siloam shumanga sakashi.” (Siloam ngühtet Hautikei.) Hibü hao hauan sakkei, hoba nyekei hapbo longeikei.
8Lepbü shuong hoba nyishou aoyouei hao hishau hiyungbü che dogo shenan kikei haoenei laukei, “Ho müt setan hishau hiyungko kibou kho aying lo?” 9Atei laukei, “Haü”; lubü shuongei laukei, “Ji, lausikei haoei hao phatkei.” Müt khoei haoei lolo laukei, “Kho ngo.” 10Haoenei hao to laukei, “Kholonga kaibü nyek lai küman ipbei?” 11Haoei jongaikei, “Jisu nyenbü müt cheei thamdak totkei hoba ngeibü nyeka naangkukei, hoba kü to laukei, ‘Siloam to hauashi hoba sakashi.’ Hibü ngo haukei hoba sakkei, hoba hapbei.” 12Haoenei hao to laukei, “Hao lanei ki?” Haoei laukei, “Ngei angekei.”
Farisibü shuongei Maitibü kho Phankei
13Shangied nyek thuan kibü müt kho haoenei Farisibü jungto leian haukei. 14Jisuei thamdak totan haoeibü nyek khittikubü kho Nounyet yingan kiteikei. 15Farisi shuongei haoei lai küman hapbei kho hao ka nyiboula phekei. Haoei haoen to laukei, “Haoei thamdak totan ngeibü nyeka naangkukei hoba ngei sakkei hoba ngei hapbei.” 16Farisibü atei laukei, “Kho kümbou müt kho Mühghaü ka aying, aieilausi haoei Nounyet ajungeida.” Atei laukei, “Müt ao shabü müt che ki haoei lai küman kheibü sei kümenla?” Hobaje haoen yoa janyinbü longkei. 17Haoenei nyek thubou to nyiboulakei laukei, “Haoei kaibü nyek ipbukei laudabü nyikei hao shangabü ai lauda?” Haoei laukei, “Hao kho thuseibü che ki.” 18Jihudabüei hao nyek thuan kibü maikei laubü ngühli kho haoeibü nyusibou angaba shongko maialem, 19hoba haoenei haosi ka phekei, “Bukjineithama nyek thuan bukkei dogo kanei laubü kasieibü shou kho ho sai? Kholonga haoei tou laibü hapda?” 20Haoeibü nyusibouei jongaikei, “Hao küsieibü shou hoba hao nyek thuan bukkei dogo kanei ngeakei; 21lausikei haoei tou lai küman hapda künei angekei, ayingsi aoei haoeibü nyek ipbukeije künei angekei. Hao ka pheshi, hao jaishou yingkei; haoei jembü shanga laulabü.” 22Haoeibü nyusibouei khei laukei, aishanga haoen Jihudabü to hatkei; aieilausi Jihudabü shuongei hai yeian kikei, khei müt atei ongkei hao Messia dogo theleda longa hao sinagog ka shian sattilabü. 23Khoei ong müt khoeibü nyusibouei laukei, “Hao jaishou yingkei, hao ka pheshi.”
24Hibü nyiboukei haoenei nyek thuan kiteibou kho ngabakei hoba hao to laukei, “Ngühmai lenshi. Ho shabü müt che dogo künei ngeakei.” 25Haoei jongaikei, “Hao shabü müt che si ai yingkeije ngei angekei; lausikei ngei che ngeakei kho, ngo nyek thuan kiteikei hoba tou ngei hapda.” 26Haoenei hao to laukei, “Haoei kato ai kümbei? Haoei kaibü nyek lai ipbukei?” 27Haoei haoen to jongaikei, “Ngei kan to lenan apa, hoba kanei aditku. Kanei aila ho nyibou ditmang sühda? Kankei haoeibü eik la yeimang sühda sai?” 28Haoenei hao to nyikuko laukei, “No haoeibü eik; kün Mosaeibü eikshuong. 29Mühghaüei Mosa to joyokei dogo künei ngeakei; lausikei ho mütje hao lakabüje künei angekei.” 30Müt khoei haoen to jongaikei, “Maangpanglabü kho ho ki, khei hao lakabüje kanei angekei, khei yingasikei haoei kü nyek ipbukei! 31#Isa 66.18 Mühghaüei shabü müt to aditkuda dogo senei ngeakei, lausikei müt atei Mühghaü to hadalonga hoba hao maangangbü kümsije, Mühghaüei hao to ditkuda. 32Müt cheei ongkei nyek thuan bukbü müt la nyek khittikukei dogo kaopakbü ka jaüan ladangkei ditan achüh. 33Kho müt Mühghaü ka aying tegüje, haoei aikei tekümenkhoulabü.” 34Haoenei hao to jongaikei, “Khangbü ka thama no shabüa bukkei. Kün to songlenlabü no ao?” Hobaje haoenei hao sinagog ka inletkei.
Soushou Nyekthu
35Haoenei hao inleda dogo Jisuei ditkei, hoba ladang haoei hao hapbei, haoei laukei, “Nyi Müteibü Shou to mailemda lao?” 36Haoei jongaikei, “Yaangbou, ngei hao to mailemlabü lele hao kho ao?” 37Jisuei hao to laukei, “Nyi hao hapa, hoba tou aoei kato joyoda, kho hao.” 38Haoei laukei, “Yaangbou, ngei mailemda”; hoba haoei hao thedanga khüpetkei. 39Jisuei laukei, “Aoyouei ühüpda haoenei haplabü lele, hoba aoyouei hapda haoen nyekthubü yeilabü lele matjemla shanga ngo ho kaodak to loukei.”
40Hao yoa kibü Farisi shuongei kho ditkei hoba laukei, “Künkei nyekthubü sai?” 41Jisuei haoen to laukei, “Kan nyekthubü tegüje kan shabü tekikhoulabü. Lausikei kanei, ‘Künei hapda’, dogo laudabü kaneibü shabü khei ong kia.”
Currently Selected:
JOHAN 9: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
