JOHAN 20

Hee Kongbü

(Mt 28.1-8; Mk 16.1-8; Lk 24.1-12)

1Balea shaangbounyet ete, jijimomoa Mari Magdalin hee to loukei hoba laang kho khüka khoklangan hapbei. 2Hibü sao laangjung Simon Peter si lubü eik aoto Jisuei sanoukei, haosi jungto loukei hoba haosi to lenkei, “Haoenei Bunyubou heekhün ka sunglanga, hoba haoenei hao lanei phokeije künei angekei.” 3Hibü Peter si lubü eik nyiei apyojung heedang aeto haukei. 4Ham liko laangkei; lausikei lubüei Peter leilangkei hoba heea shaang sühlangkei. 5Haoei seman chühlitikei, hoba nei inyaibü kho hangletan hapbei, lausikei hao maangto üt. 6Simon Peterkei hao phaito loukei, hoba heekhün to atkei; hoba haoei nei inyaibü kho hangletan hapbei, 7hoba khukabü nei khoje nei inyaibü yoa aying, lausikei kaoen chenei nopshaian kiteikei. 8Kheijinei lubü eik, ao shaang heea sühlangkei, haokei maangto atkei, hoba hapbei hoba mailembei; 9aishanga hao haibü ka langngaijan dogo laubü Laishiba ngüh haoenei moditen. 10Hibü eikshuong chem to haan ngaikei.

Jisu Mari Magdalin la Haptibü

(Mt 28.9-10; Mk 16.9-11)

11Mari heekoa haapbo loan kiteikei. Saoei haapbo haapbo heemang to semlitikei, 12hoba saoei, khuthük hangangbü nyi, thupaibü helea, Jisu mang phoshang khukhüm aenei che hoba che youdanga dogo setan hapbei. 13Haosiei sao to laukei, “No aila haapda?” Saoei haosi to laukei, “Haoenei ngeibü Bunyubou mang sunglanga, hoba haoenei hao lanei khünkeije ngei angekei.” 14Saoei khei lauan phaia sepeian chühngaikei hoba Jisu loan hapbei lausikei saoei kho Jisu dogo ange. 15Jisuei sao to laukei, “No aila haapda? Nyi ao lamda?” Hao bamang lombou dogo daman saoei hao to laukei, “Yaangbou, nyi hao langan kisije, kü la lenbü, hoba ngei hao ngailanglabü.” 16Jisuei sao to laukei, “Mari!” Saoei sepeikei hoba hao to Ibri ngühyema laukei, “Rabuni!” (kho tetlabü, Lenbou.) 17Jisuei sao to laukei, “Kü to tejung, aishanga ngo Bou jungto mo üangkei; lausikei ngeibü jaisinasi shuong jungto hauashi hoba haoen to, ‘Ngo kü Bou jungto hoba kaneibü Bou jungto, kü Mühghaü jungto hoba kaneibü Mühghaü jungto angda,’ dogo lenashi.” 18Mari Magdalin ngaikei hoba eikshuong to lenkei, “Ngei Bunyubou hapa,” hoba haoei sao to khübü lenkei dogo laukukei.

Jisuei Hao Eikshuong to Longan Lenbü

(Mt 28.16-20; Mk 16.14-18; Lk 24.36-49)

19Kho balea shaangbounyet, chasem kiteikei, hoba Jihudabü to hatbü ka eikshuong kishang kou khinngailangan kikei. Jisu loukei hoba haoen yoa lokei, hoba haoei haoen to laukei, “Kan yoa hakso kishi.” 20Haoei kho lauan phaia haoei haoen la haoeibü ik hoba haoeibü hiplang lenkei. Eikshuongei Bunyubou hapan olinyokei. 21Jisuei haoen to nyiboukei laukei, “Kan yoa hakso kishi. Bouei ngo hautibü tegü, ngeikei kan hautida.” 22Haoei kho lauan phaia, haoei haoen la metan jinkuko laukei, “Soushou Saopobü sungletashi. 23Kanei aoyoueibü shabü amai apbulaje, haoeneibü shabü apa; aoyou la kanei üpbulaje haoeneibü shabü nangakei.”

Jisu hoba Thoma

24Thoma (laobou ngühtet, “Phokshou”), Anthüknyi yo kabü che Jisu loujinei haoen yoa akitei. 25Lubü eikshuongei hao to laukei, “Künei Bunyubou hapa.” Haoei haoen to laukei, “Ngei haoeibü ik manga kojal nali ühüp longa, hoba kojal moa ngeibü ikjishou ütti longa, hoba haoeibü hiplang to ngeibü ik ütti longa, ngei maialemlabü.”

26Chalou set kian phaia nyibou hao eikshuong chem manga kikei hoba Thomakei haoen yoa kiteikei. Kou khinngailangan kikei lausikei Jisu lotan haoen yoa lokei hoba laukei, “Kan yoa hakso kishi!” 27Kho phaia haoei Thoma to laukei, “Kaibü ikjishou hato thenashi hoba kü ik to chühashi; kaibü ik litiashi hoba kü hiplanga phekattikai; maialemenko teki, lausikei mailemkai.” 28Thomaei hao to jongaikei, “Kü Bunyubou, kü Mühghaü.” 29Jisuei hao to laukei, “Nyi ngo hapabü nyi mailemda lo? Aoyouei ühüp lausi dogokei mailema, haoen olinbou.”

Ho Le Nyekchüh

30Ho lea adobü amaaphilabü juongnyu Jisuei eikshuong thedanga kümbei; 31lausikei Jisu kho Mühghaü Shou, Messia, dogo kanei mailemla shanga, hoba mailembo kanei hao nyena langkei hapla shanga ho ngüh doda.

Currently Selected:

JOHAN 20: CHANGBSI

Highlight

Copy