JOHAN 21
21
Jisuei Eik Nyet la Longan Lenbü
1Kho phaia Jisu jembü lolo Tiberia yungnyua longan lenkei. Haoei hao lolo hai longan lenkei. 2Simon Peter, Thoma (laobou tetlabü, “Phokshou”), Galila Kanabü Nathaniel, Zebedi shounyi hoba haoeibü eik lubü nyi dogo chela kiteikei. 3Simon Peterei haoen to laukei, “Ngo ngau lapla kouda.” Haoenei hao to laukei, “Künkei ka yoto loulabü.” Haoen koukei hoba long to atkei, hoba khüyou haoenei ai alap. 4Chaphamlamto Jisu yungkoa lokei, lausikei eikshuongei kho hao yingkei dogo ange. 5Jisuei haoen to laukei, “Nashousi shuong, kanei aiche laplao?” Haoenei hao to jongaikei, “Alap.” 6Haoei haoen to laukei, “Tak kho long mae aedangto tekashi, hoba kanei shijo laplabü.” Hibü haoenei tekkei hoba ngau juongnyu minsije touje haoenei tak senenla athükko kikei. 7Eik, aoto Jisuei sanoukei, haoei Peter to laukei, “Ho Bunyubou yingakei.” Ladang Simon Peterei kho Bunyubou yingkei dogo ditkei, haoei nei huombei, (aishanga haoei kho hangletan phokei), hoba dei to tomatlangkei; 8lausikei lubü eikshuongje, taka ngau shenko minan, senjung haoeneibü longa loukei, aishanga haoen deiko ka yongan eheko, phak anjinsem thüng ong kiteikei. 9Ladang haoenei deikoa sühlangkei haoenei wankaka wan metenan, kho thüka ngau hoba wentek dogo phoan hapbei. 10Jisuei haoen to laukei, “Kanei tou lapbabü ngau ka at sungba.” 11Simon Peter long to likei hoba ngau yaangbüei shenko kibü tak kho kaomai to senbakei. Khünei ngau saongaoto anjinsemto sem kiteikei; khünei ngau juongnyu minasikei tak ajitthet. 12Jisuei haoen to laukei, “Kaiya, hoba lem jokashi.” Kho Bunyubou yingkei dogo ngean, eikshuong yoa aoeikei hao to, “No ao?” dogo phela maang ayaangen. 13Jisu loukei, hoba wentek sungkei hoba haoen la shonkukei hoba ngaukei kho tegü ong kümbei. 14Hao haibü ka langngaian phaia Jisuei hoei semboubü hao eikshuong la longan lenkei.
Jisu hoba Peter
15Ladang haoen lemjok wankei, Jisuei Simon Peter to laukei, “Jona shou Simon, nyi kü to habü pendou to aei sanouda lao?” Haoei hao to laukei, “Haü, Bunyubou, ngei no sanouda dogo nyi ngekei.” Jisuei hao to laukei, “Kü san shoushou shuong samashi.” 16Jisuei hao to nyiboukei laukei, “Jona shou Simon, nyi ngo sanouda lao?” Peterei hao to laukei, “Haü, Bunyubou, ngei no sanouda dogo nyi ngekei.” Jisuei hao to laukei, “Kü san shuong lomashi.” 17Jisuei hao to semboukei laukei, “Jona shou Simon, nyi ngo sanouda lao?” “Nyi ngo sanouda lao?” dogo hao to semboula laubü shanga Peter ngangkei; hoba haoei Jisu to laukei, “Bunyubou, nyi pendou ngekei; ngei no sanouda dogo nyi ngekei.” Jisuei hao to laukei, “Kü sanshuong samashi. 18Maimaitham ngühmaia ngei ka to lenda, no heshoudanga nyi lolo neihuom kaikei hoba no haumang sühbü pendou to haukei; lausikei ladang no sinlaje, nyi kaibü ik shinglabü hoba no laeto haumang asühda khüto no leilanglabü.” 19(Haoei kho ai haibüei Peterei Mühghaü soneikangtilabü kikei kho shean lenko laukei.) Kho phaia Jisuei hao to laukei, “Kü phai semashi.”
Jisu hoba Lubü Eik
20Peterei sepeian chühngaikei hoba eik ao to Jisuei sanoukei, hao phainei hapbei. (Ho, nyakshaujinei Jisueibü khukua nongan, “Bunyubou, no khümbo kuan aplabou kho ao?” dogo laubou kho kikei.) 21Ladang Peterei hao hapbei, haoei Jisu to laukei, “Bunyubou, hao shangabü lai?” 22Jisuei hao to laukei, “Ngei ngo alou shongko hao lang kitimang süha tegükei, ka shanga ai ki? Nyi kü phai semshi.” 23Hibü kho eik ühailabü lauda dogo jaisinasi shuong yoa phinthonkei, khei yingasikei Jisuei hao to hao ühailabü dogo alau, lausikei, “Ngei ngo alou shongko hao lang kitimang süha tegükei, ka shanga ai ki?” dogo laukei.
24Habü shangabü aukabü kubou hoba khübü doshaibou eik kho hao ki. Haoeibü aukabü tükde dogo senei ngekei.
Ngühküp
25Jisuei kümbüleibü lubükei juongnyu kia; haoen thenei thenko doa tegüje, kho dolabü le kho kaodakei mangkei atinlabü dogo ngei damda.
Currently Selected:
JOHAN 21: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
