LUK 11

Jisuei Welau shangabü Lenbü

(Mt 6.9-13; 7.7-17)

1Haoen kaoen chenei welauko kikei, hoba ladang hao thakkei, haoeibü eik yoa cheei hao to laukei, “Bunyubou, Johanei hao eikshuong la lenbü tegü kün la welaula lenbü.” 2Haoei haoen to laukei, “Ladang kanei welaulaje, hai laushi:

Abou, Ka nyen saopobü yingshi;

Ka Sangle kaiya;

3Chaangboua kün la chale shausiyung kubü;

4Hobaje kün la küneibü shabü apbu,

aishanga küneikei kün to shedbü

shonbü pendou la apbuda;

Hobaje takteibü to kün teleima.”

5Haoei haoen to laukei, “Tetlabüei kan yoa cheei thangbou che kia hoba hao jungto metuphanga hauan lauda, ‘Jena, kü la wentek sem lotbü. 6Kü thangbou che wakou ka kü junga sühakei hoba ngei hao la okla ai aki.’ 7Hobaje haoei chemmang ka jongaida, ‘Ngo khon tesaktikai. Kou khinngailangakei hoba kü shousi shuong shena kia; ngei kala kula shanga pienla athük.’ 8Ngei kan to lenda, hao hao thangbou yingbü shanga dogo hao laksepan hao la ai akusi dogokei, müt khoei ihimousapbo subüjabü ka hao lakseplabü hoba hao la hao mangsüh kulabü.

9“Ngei kan to lauda: Hiashi hoba kho kan la kulabü; lamashi hoba kanei haplabü; kuokashi hoba kou kho kan la ipbulabü; 10aishanga hibü wekoei hapda, aoei lamda haoei hapda, hoba kuokeibü pendou la kou kho ipbuda. 11Kan yoa, hao shouei (wentek che hisi, hao la laang kulabü, ayingsi) ngau che hisi hao la ngau jeila pinyu kulabü bou ao ki? 12Ayingsi haoei autei che hia longaje hao la sinkip che kulep lo? 13Khei yingalonga, khuthükkabü Bouei hao to hibü shuong la Soushou Saopobü lai aei akula!”

Jisu hoba Beelzebul

(Mt 12.22-30; Mk 3.20-27)

14Haoei ngoubü che ka shabü sou shian sattiko kikei. Ladang shabü sou satkei, ngoubü müt khoei joyokei, hoba noknyüh maangpangkei. 15Haoen yoa atei laukei, “Shabü sou thükkabou, Beelzebul jungeiko haoei shabü sou shuong shian sattida.” 16Lubü shuongei hao takteiko khuthük ka amaaphilabü che hikei. 17Haoei haoeneibü dambü ngekei hoba haoen to laukei, “Jembü khulimbo janyinbü sangle pendou lusakan apda, hoba chem cheei chem che khulimbo janyina longa tuongda. 18Hobaje Satanei hao khulimbo janyina longa haoeibü sangle lalokche loenla? Ngei kho lauda aieilausi ngei Beelzebulei shabü sou shian sattida dogo kanei lauda. 19Ngei Beelzebulei shabü sou shuong shian sattida longa, kan mütli shuongei aoei haoen shian sattida? Hibü haoen kho kaneibü matjembü shuong yinglabü. 20Lausikei ngei Mühghaü ikjishouei shabü sou shuong shian sattia longa, Mühghaü Sangle kho maimaitham kan jungto louan ki. 21Ladang hau kibü mütei insiaubu lamlean hao chem lomda, kheijinei haoeibü peisilei shuong kho püetakei; 22lausikei ladang hao to hau kibou müt cheei hao jungto louan thüklaje, haoeibü insiaubu penbüsoubü laonei haoei maanglembei, khübü kho haoei langkuda, hoba haoei soletbü shuong ka janda. 23Müt che kü yoa akilonga hao kükhu limbo ki, hoba müt cheei ngeibü sanshuong yoshaila athui longa haoei khübü lintida.

Shabü Sou Longeibü

(Mt 12.43-45)

24“Ladang müt che ka shabü sou che longan apda, haksoshang lambo ulangbü danko satda. Ladang che ongkei ühüplaje khoei lauda, ‘Kü chem lao ka ngo longkei, khüto ngo sepeijung ngaikho.’ 25Hao longeida hoba haoei kho kuettian he maiko phoan hapda. 26Kheijinei hao ngaida hoba hao to amaibü lubü soushou nyet leian atda, hoba haoen khonei kida; hoba kho müt thonbü thu kho shaangbou thu to amaibou yeida.”

Tükdebü Olinbü

27Haoei kho lauko kijinei, noknyüh ka yaksa cheei ngüh longko hao to laukei, “No künbou nasetshang hoba no yopbou sen latetche olinbou!” 28Lausikei haoei laukei, “Aoei Mühghaü ngüh ditda, hoba kümda, haoen olinbou, dogo laula maibou.”

Amaaphilabü Mangsühbü

(Mt 12.38-42)

29Ladang noknyüh hao jungto nyuyoko kikei, haoei laukei, “Ho meten amaibü ki. Hoei amaaphilabü lamda, lausikei Jona amaaphilabü to liman ho meten la amaaphilabü ai akulabü. 30Aishanga ailai Ninevibü to Jona amaaphilabü che yeikei, kho tegü Müteibü Shoukei ho meten amaaphilabü che kilabü. 31Yungthang Chobasaoei ho meten mütshuong yoa matjemshanga lolabü, hoba haoen yuktilabü, aishanga saoei thonbü kaodak ka Solomon songsihon ditla loukei; lausikei Solomon to yaangbou che hanei kia. 32Ninevibüei matjemshanga ho meten yoa lolabü hoba ho meten yuktilabü, aieilausi Jonaei songlensi haoen maangpon sepeikei; lausikei Jona to yaangbou che hanei kia.

Mang Ngesakbü

(Mt 5.15; 6.22-23)

33“Ao müteikei wanthung jikan hushang kaoena ayingsi kammanga aphoda; lausikei chemto loubü shuongei ngesakbü haptila haoenei wanthung anshanga phoda. 34Ka nyek kaibü mang wanthung ki. Ladang ka nyek maisho kilaje kaibü mang pendou ngesakbüei shenda; lausikei ladang kho amaiko kilaje ka mangkei nakthühbüei shenda. 35Kato kibü ngesakbü kho nakthühbü si ai yingkeije daman chühashi. 36Hibü kaibü mang pendou nakthüh ai akiko ngesakbüei shenan kialonga, wanthung sonlailaibü ngesakbüei kala ngesakbü kubü tegü, kaibü mang ngesakbüei shenlabü.”

Jisuei Farisibü hoba Ngühkhüm Lenbou shuong Attibü

(Mt 23.1-36; Mk 12.38-40)

37Haoei kho laukhümjinei Farisibü cheei hao hao yoa shaula yungla ngakei; hao atkei hoba shaushang yungshanga setkei.

38Haoei nyakshau thedangto asakasambü hapan Farisibou aeibou maangpangkei. 39Jisuei hao to laukei, “Kan Farisi shuongei thung hoba phau tang sakda, lausikei kan maanga aeilam aeiphop hoba amaibüei shenakei. 40Kan ngoubü shuong, tang kümbou khoei maangkei kümbei aying lo? 41Lausikei maangkabou kho jongsak la kuashi hoba kan shanga khümbo saopobü yinglabü. 42Kan Farisibü shanga ügütü! Kanei shongen hoba sangkhau yik hoba lubü pikshik pendou ka an phejan kuda, hoba kanei ngühmai matjem hoba Mühghaü sanou wailetda. Kanei lubü kho awailetko habü hokei kümbou kikei. 43Kan Farisibü shanga ügütü! Kanei sinagoga thükkabou setshang mangsühda hoba namseishanga salem maikuda. 44Kan Farisibü shanga ügütü! Aishanga kan mütei ashenbü hee phatkei, hoba mütshuongei angeko kho thüka paida.”

45Ngühkhüm lenbou yoa cheei hao to jongaikei, “Lenbou, nyi khübü laujinei künkei yoan nyikuda.” 46Haoei laukei, “Kan Ngühkhüm lenbou shuong shangakei ügütü! Kanei akünenlabü on mütshuong la küntida, lausikei kanei on khünei kaneibü ikjishou cheei ongkei ameitida. 47Kan shanga ügütü! Kaneibü pisibou shuongei thuseibü shuong haitikei hoba kanei haoeneibü hee yaüda. 48Hibü kan pisibousi shuongeibü kümsilei shanga kan aukabü ki hoba kho kanei haü lauda; aieilausi haoenei haoen haitikei hoba kanei haoeneibü hee yaüda. 49Khoei ong Mühghaü songsihonei lauda, ‘Ngei haoen yoto thuseibü shuong hoba ngühlang künbü shuong hautikulabü, khüka haoenei at haitilabü hoba at shieikoelabü.’

50-51“Hibü kaopakbü ka jaüan thuseibü sii phinbü pendou, Abel sii ka khangan lemshon si sao- pobü kanglanga haitibü Zekharia sii sühko ho meten ka hilabü.

52“Kan Ngühkhüm lenbou shuong shanga ügütü! Kanei songsido koukhin langa; kan jembükei üt hoba atko kibü shuongkei kanei shiletkei.”

53Ladang hao khüka satkei, Ngühkhüm lenbou shuong si Farisibü shuong aeibou khauangkei hoba hao to ngühsidei juongnyu pheyo khangkei; 54hoba haoei laubü ka shedbü denche lapla shanga haiyeikei.

Currently Selected:

LUK 11: CHANGBSI

Highlight

Copy