LUK 10
10
Jisuei Anjinleito Nyi Hautibü
1Kho phaia Jisuei lubü anjinleito nyi pienkei hoba hao haulabü kibü sangnyu hoba kaoen weko to haoen nyibang hao thedangto hautikei. 2Haoei haoen to laukei, “Maimaitham sek juongnyu nyenakei lausikei eik shijo ong. Hibü haoeibü sek to eik juong koutiashi dogo kanei sek Bunyubou to welauashi. 3Hauashi, ngei kan sho shuong yoto san shoushou shuong tegü hautida. 4Shijimok ayingsi, neikong ayingsi nguok tekün; hoba lama aolakei salem teku. 5Kan ai chem to ong atlaje, shaang, ‘Ho chema hakso kishi’, dogo lenshi. 6Khünei hakso shou at kia longa, kaneibü hakso hao to baulabü; akitei longa kho kan jungto longeilabü. 7Haoenei ai ong kulaje shauko yungko kho chema thüngashi, aishanga kümbouei mu hapla mukei. Chem che ka che to teshon. 8Kan sangnyu che to atan mütshuongei kan sungletsije, kan thedanga ai ong tenkulaje kanei shauashi; 9khünei kibü shatbü shuong maitikuashi; hoba haoen to, ‘Mühghaü Sangle kan nyangko lousüha’, dogo lenshi.
10“Lausikei ai sangnyu to ong kan atlaje hoba haoenei kan asungletlaje, khükabü lamnyu to hauan, 11‘Kan khulimbo künei küneibü youa kakbü kan sangnyu kabü thamngukei kangan apda, lausikei ho ngeashi, Mühghaü Sangle nyangko lousühakei’, dogo laushi. 12Ngei kan la lenda Matjembü Chaloua kho sangnyu khütoje Sodom to natenla soshangbou yinglabü.
Maialembü Sangnyu shuong
(Mt 11.20-24)
13“Ka shanga ügütü, Khorazin! Ka shanga ügütü, Bethsaida! Aishanga kato kümbü seikümseilei shuong ho Sidon si Tair to kümbei laubü tegüje, haoen mütshuong neikek sean hoba tapa setan shangieda maangpon sepeian kikhoulabü. 14Lausikei matjemnyet kan toje Sidon si Tair to natenla soshangbou yinglabü. 15Hobaje no Kapernaum, no khuthük sühko tonenlep lo? No yemsanga sühko tonyanlabü. 16Kü eikshuong, aoei kan to ditkuda, haoei küto ditkuda, hoba aoei kan asungletda haoei ngo asungletda; hoba aoei ngo asungletda haoei ngo hautibou asungletda.”
Anjinleito Nyi Longeibü
17Anjinleito nyi kho olinyoko hai lauyoko longeikei, “Bunyubou, shabü souei mangkei ka nyena küneibü ngüha lekei.” 18Haoei haoen to laukei, “Ngei Satan khuthük ka langpon tegü atbü hapbei. 19Chühashi, pinyu hoba sinkip thüka, hoba dangbou sei pendou thüka nakeila ngei kan la hau kua, hoba haoei kan aineikei üaktilabü. 20#Dan 12.1 Lausikei shabü soushou shuongei kan to ngüha lebü shanga kan taolin; lausikei kaneibü nyen khuthüka doan kibü shanga olinashi.”
Jisu Olinbü
(Mt 11.25-27; 13.16-17)
21Kheijinei Soushou Saopobü danko Jisu olinbüei shenkei hoba haoei laukei, “Ngei no sangda, Abou, khuthük hoba kaodak Bunyubou, aieilausi nyi habü ho songbüdobü hoba lenenbü shuong ka huletkei, hoba nasak shuong to tang khitkei. Haü, Bunyubou, ngei no sangda, aishanga ho ka shanga maangshikbü kiteikei.
22“Ajanjan pendou Bouei kü la nongkukei; Bou to liman Shou ao yingkeije aoeikei angekei; hoba Shou hoba aoyou to Shouei hao tang khittila pienda, haoen to liman Bou aoje aoeikei angekei.”
23Haoei hao eikshuong ae sepeikei hoba huphanga laukei, “Kanei ai hapda kho hapbü shuong olinbou. 24Ngei kan la lenda, kanei hapbü shuong thuseibü juongnyuei hoba choba shuongei hapmang sühsikei ühüp, hoba kanei ditbü shuong ditmang sühsikei aditou.”
Maibü Samariabü Ngühphatbü
25Ngühkhüm lenbou che loenkei hoba hao huonkei. Haoei laukei, “Lenbou, ponpen langkei hapla shanga ngei ai kümjan?” 26Jisuei laukei, “Ngühkhüma ai doan ki? Nyi khünei ai weda?” 27#NA 6.5 Haoei jongaikei, “Ka maangpon pendouei, hoba ka soushou pendouei, hoba kaibü hau pendouei, hoba kaibü sensimaang pendouei, Bunyubou ka Mühghaü sanouashi, hoba nyi ka lepbou to jembü tegü sanouashi.” 28#Lev 18.5 Haoei hao to laukei, “Nyi tükde jongaia; kho kümashi hoba no lang kilabü.”
29Lausikei müt che khoei janbü mangsühkei hoba Jisu to laukei, “Kü lepbou ao?” 30Jongaiko Jisuei laukei, “Müt che Jerusalem ka Jerikho to yanko kikei hoba hao soshau soyungbü ikmang to atkei hoba haoenei haoeibü neisimei soan haileleko ngüman apyoan satkei. 31Hobaje ungshedbou che kho lamto yanto haükei, hoba ladang haoei hao hapbei haoei lamkhong ka kokei. 32Kho tegü Levibü che khüto loukei, hoba haoei ladang hao hapbei hao lamkhong ka kokei. 33Lausikei Samariabü che, wakoua hao kibü kaoen to louphambei, hoba ladang haoei hao hapbei haoei aeibou sanouko dambei. 34Hao hao jungto haukei hoba haoeibü moukhüna onang si ih jinkuan khühkukei; hoba haoei haoeibü gadua settikei, hoba sühshang che to leiban hao thounoukei. 35Nyibounyet haoei nam penyi sungenan chemsetbou la kuko laukei, ‘Hao pangtei onouashi hoba nyi ai ong aei atlaje, ngo nyibou longeijinei ngei kala ngaingoulabü.’ 36Khübü müt sem yoa soshau soyungbü kühshuokbü müt to aoei lepbou tegü jungeikei dogo nyi damda?” 37Haoei laukei, “Hao to üeisanou lenbouei.” Jisuei hao to laukei, “No hauashi, hoba haoei tegü kümashi.”
Jisuei Martha si Mari Pean Chühbü
38Haoen lama paijinei hao sang che to loukei, hoba Martha nyenbü yaksa cheei saoeibü chem to hao leiyetkei. 39Saoei na che Mari nyenan kikei, saoei Bunyubou you junga setan haoei laubü to ditkei. 40Lausikei Martha thungsijuokei maang noutikei. Sao loukei hoba laukei, “Bunyubou, künaei kü mütpem nongnaela apyobü ho nyi daman achühda lo? Kü to thuila sao to lenshi.” 41Jisuei sao to jongaikei, “Martha, Martha, kümsilei juongnyu shangabü no maangmauda hoba khonsakda, 42lausikei che ong khamda. Mariei phejan maibou piena, hoba ho sao ka aoei alanglabü.”
Currently Selected:
LUK 10: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
