LUK 9

Jisuei Eik Anthüknyi Hautibü

(Mt 10.5-15; Mk 6.7-13)

1Jisuei Anthüknyi kho chela ngashaikei hoba haoen la shabü sou pendou shian sattilabü si shatbü maitilabü sei si hau kukei; 2hoba haoei haoen Mühghaü Sangle phinthonla si shatbü maitila hautikei. 3Haoei haoen to laukei, “Wakou shanga, ju ayingsi neikong, ayingsi wentek, ayingsi nam, ayingsi mangyuk nyibang aikei tekün. 4Kan ao chem to ong atlaje, kanei apyoan asatshongko khünei thüngashi. 5Hobaje laju- cheei kan asungletlaje, ladang kho sangnyu ka kan bangda, haoen khulimbo kaneibü you ka thamngu kangan apashi.” 6Haoen bangkei hoba sang che ka sang che to shonko Ngühlang Maibü songlenko hoba haushang pendoua shatsinyat maitikuko haukei.

Herod Phenyembü

(Mt 14.1-12; Mk 6.14-29)

7Herod tetrarkei ho kümbü pendou shangabü ditkei. Hao aeibou maanga shukei, aieilausi Johan haibü ka langngaia dogo atei lauko kikei, 8atei Elija longakei dogo, hoba atei shangiedbü thuseibü yo ka che longeiakei dogo lauyoko kikei.

9Herodei laukei, “Ngei Johan khu thetkei; lausikei ao shangabü ngei hainyu ditda?” Hobaje hao to chühla haoei haujembei.

Jisuei Hajar Ngao Oknyinbü

(Mt 14.13-21; Mk 6.30-44; Jn 6.1-14)

10Youkoikjai shuong kho longeikei hoba haoenei kümbüleibü pendou Jisu la lenkei. Haoei haoen kokshoua Bethsaida nyenbü sangnyu che to leilangkei, 11lausikei noknyühei lapenan hao phai sembei. Haoei haoen sungletkei hoba Mühghaü Sangle shangabü lenkei, hoba aoyou maitilabü khaman kikei haoen dan maitikukei. 12Chasemlamto Anthüknyi kho loukei hoba hao to laukei, “Kaijembo kibü sangnyu si sangshuong to hauan sühshang si shausiyung hapenlabü lele noknyüh kho lintian apashi, aieilausi sen hanei sangliphang kaoen chenei kia.” 13Haoei haoen to laukei, “Kanei bouje haoen la denche okashi.” Haoenei laukei, “Künei wentek ngao hoba ngau penyi to liman aki. Kün hauan habü mütshuong pendou shanga shausiyung jekla sai?” 14Aishanga haoen müt hajar ngao thüng kiteikei. Haoei hao eikshuong to laukei, “Haoen anjinsem bang san sana settiashi.” 15Haoenei khei kümbei hoba haoen pendou setkhümbei. 16Haoei wentek ngao hoba ngau penyi kho jungan khuthük to chühangtian phaia haükukei hoba shaknyinkei; hoba haoei noknyüh junga phokula shanga hao eikshuong la kukei. 17Haoen pendouei photko shaukei. Netshou heshaikei hoba khoei kam anthüknyi shenkei.

Peterei Jisu shangabü Khuokenbü

(Mt 16.13-19; Mk 8.27-29)

18Jisu sanshoua welaujinei eikshuongkei hao yoa kiteikei, hoba haoei haoen to laukei, “Noknyühei ngo ao dogo lauda?” 19Haoenei jongaikei, “Johan Baptibou; atei lauda, Elija, hoba ateije shangiedbü thuseibü che longeikei dogo lauda.” 20Haoei haoen to laukei, “Lausikei kanei ngo ao dogo lauda?” Peterei jongaikei, “Mühghaüeibü Khrista.”

Jisuei Hao Khonsaklabü hoba Hailabü shangabü Lenbü

(Mt 16.20-28; Mk 8.30—9.1)

21Haoei kho aola alenla shanga haoen la kaangko ngühkhüm kukei, 22hoba laukei, “Müteibü Shou aeibou khonkujan, hoba jaishou shuong si yaangenbü shuong si ungshedbou si Ngühkhüm lenbou shuongei inletlabü, hoba haitilabü hoba sembounyet langngailabü.”

23Haoei mütpem weko to laukei, “Müt atei kü phai loumang sühalonga, haoei jembü lolo thepetashi, chaangboua haoeibü peisei peashi hoba kü phai semashi. 24Aishanga müt cheei hao langkei püetmang sühalonga haoei kho maulabü; lausikei müt cheei kü nyen shanga hao langkei mausije haoei kho püetlabü. 25Aishanga müt cheei kaodak khümbo pailetan phaia jembü langkei mautojana longa ai ku pailetla? 26Aishanga aoei ngo hoba kü nyen shangabü the alenenlaje, Müteibü Shou jembü soneikangbü, Boueibü soneikangbü hoba saopobü khuthük hangangbü soneikangbüa loujinei hao shangabü the alenenlabü. 27Ngei kan to ngühmaia lenda, hanei loan kibü yoa atei Mühghaü Sangle ühüpshongko haibü jepan achühlabü.”

Sonjeibü

(Mt 17.1-18; Mk 9.2-8)

28Khübü ngüh lauan chalou set thüng danan phaia haoei Peter, Johan hoba Jakob leikei hoba shongh to welaula angkei. 29Hao welaujinei hao the chühla son phangche yeikei hoba haoeibü neisimei thuphaitham hoba lailaitham yeikei. 30Hobaje chühashi, müt nyi, Mosa si Elija hao to joyoko kikei. 31Haoen soneikangbüa longkei hoba hao bangbü danko Jerusalema Mühghaü lamthen loushadla kibü shangabü joyokei. 32Peter hoba hao yoa kibü shuong aeibou ngak longkei, lausikei haoen ladang pienkei haoeneibü soneikangbü si hao yoa loan kibü müt nyi kho hapbei. 33Mosa si Elijaei Jisu apyoan satjinei Peterei hao to laukei, “Lenbou, sen hanei kila aeibou maikei! Senei hanei dip sem, ka shanga che, Mosa shanga che, hoba Elija shanga che, dogo lekho.” Haoei ai laukeije haoei ange. 34Haoei kho lautoua sangmei che lotan haoen khuilepbei; hoba haoen sangmei maangto atjinei haoen hatkei. 35Sangmei ka ngüh che longko laukei, “Ho ngei pienbü Shou; hao to ditashi.” 36Ladang sangmeiei ngüh joyokhümbei, Jisu mütpem hapbei. Haoenei ngüh üang hoba haoenei ai hapbei aotokei khübü chaloua alen.

Jisuei Shabü Souei Lapbü Nashou Che Maitikubü

(Mt 17.14-18; Mk 9.14-27)

37Nyibounyet, ladang haoen shongh ka louyenkei, mütshang yaangbü cheei hao to haüyokei. 38Noknyüh yo ka müt cheei ngekkei, “Lenbou, kü shou to chühkai, aishanga hao ngeibü jayangshou ki, 39hoba shabü soushou cheei hao lapda hoba mangde ngekda; aishanga hoei hao semsem toptida hoba sembung ka uokjok ongtida; shayangleko longyoan ong haoei hao apyoda, hoba haoei hao la mo letida. 40Ngei ka eikshuong to shian sattikula sukeijakei, lausikei haoenei athük.” 41Jisuei jongaikei, “Kan maialembü hoba khüpeinyu paibü meten! Ngo kan yoa lalok kila hoba kan to lalokche natenla?” Kheijinei haoei müt khüto laukei, “Kashou hato leiba.” 42Hao louko kian shabü souei hao phetettikei hoba toptikei. Lausikei Jisuei shabü sou hakeiko nashoubou kho maitikei hoba haobou la kungaikei. 43Haoen pendou Mühghaü yaangenbü hau hapan maangpangkei.

Jisuei Hao Hailabü shangabü Nyibou Lenbü

(Mt 17.22-23; Mk 9.30-32)

Haoei kümbü pendou shangabü müt pendou maangpangyoko kijinei hao eikshuong to laukei, 44“Habü ngüh nouanepbo ditashi; ho kan shanga ki: Müteibü Shou mütshuongeibü ikmang to khümbo kuan aplabü.” 45Haoenei laubü ho aditen, hoba haoenei kho ngühtet ashuoklabü lele haoen ka huan kikei; hoba ho shangabü hao to phela haoen hatko kikei.

Ao Yaangkei?

(Mt 18.1-5; Mk 9.33-37)

46Ao yaangbou dogo haoen yoa ngüh wetyo khangkei. 47Jisuei haoen maangphanga wetyobü ngekei, hoba haoei nashou che leibaan hao junga lotikei. 48Haoei haoen to laukei, “Aoei kü nyena ho nashou sungletlaje haoei ngo sungletda; hoba aoei ngo sungletda haoei ngo hangangbou sungletda; aishanga kan yoa hanbou kho pendou to yaangbou ki.”

Ao Kan Khulimbo Aying Hao Kan Shanga

(Mk 9.38-40)

49Johanei jongaikei, “Lenbou, müt atei ka nyena shabü sou shian sattiko künei hapbei, hoba künei hao shiletla haujembei, aieilausi hao kün yoa ka phai asemda.” 50Jisuei hao to laukei, “Hao thangetla hau tejem; ao kan khulimbo aying hao kan shanga ki.”

Samariabü Sang Cheei Jisu Asungletbü

51Ladang hao khuthük to anlanglabü jihsiphai sühkei, haoei maangnyu angko Jerusalem ae haula meimeikei, 52hoba haoei hao thedangto ngühlang künbü shuong hautikei. Haoen haukei hoba hao shanga lamlela Samariabü sang che to atkei; 53lausikei haoenei hao asunglet aieilausi hao Jerusalem ae hauko kikei. 54Ladang eikshuong Jakob si Johanei kho hapbei, haosiei laukei, “Bunyubou, haoen lonan aptila künei khuthük ka wan lotla sakkula nyi maang angdalao?” 55Jisuei chühngaian haoen to hakkei (hoba laukei, “Kan ai soushoueibü yingkeije kanei angekei, 56aishanga Müteibü Shou mütshuongeibü langkei shemtila shanga aying lausikei haoen püetla loukei!”) Hobaje hao lubü sang che to haukei.

Jisu Phai Semenlabü

(Mt 8.19-22)

57Haoen lama hauko kijinei müt cheei hao to laukei, “No lae ong haulaje ngo ka phai semlabü.” 58Jisuei hao to laukei, “Selong shuongei laangpob ki hoba mühkabü aushuongei hap kia, lausikei Müteibü Shouje hao khu nongshang aki.” 59Haoei che to laukei, “Kü phai semshi.” Lausikei haoei laukei, “Yaangbou, ngo shaang hauan kübou khünla sakkubü.” 60Lausikei haoei hao to laukei, “Haibü shuongei haoen haibü khünla apyoashi, lausikei noje hauashi hoba Mühghaü Sangle ngühlang phinthonashi.” 61Lubüei laukei, “Ngei ka phai semlabü, yaangbou; lausikei shaangla chema kibü shuong to bangbü salem ngüh lenla sakkubuma.” 62Jisuei hao to laukei, “Müt aoei hao ik sek shapshang to hatan phaiae chühngaidaje hao Mühghaü Sangle shanga amukei.”

Currently Selected:

LUK 9: CHANGBSI

Highlight

Copy