LUK 8

Jisu phai Sembü Yaksa shuong

1Kho phaia Jisu sangnyu hoba sang shuong to hauko Mühghaü Sangle Ngühlang Maibü phinthonko songlenkei. Anthüknyi kho hao yoa haukei, 2hoba tokei yaksa shuong aoyou ka shabü sou shian sattia hoba shat maitikua, haoenkei yoan kiteikei. Khübü kho Magdalin nyenbü Mari, ao ka shabü sou nyet satkei; 3Herod chema thükkabou sambou Khuza yak Joanna, Sussana hoba lubü juongnyu yoan kikei. Khübü sao shuongei haoen ik ka longbüei ong Jisu hoba hao eikshuong pangteikei.

Youli Saakbü Ngühphatbü

(Mt 13.1-9; Mk 4.1-9)

4Ladang mütshuong yaang takshatkei hoba sangnyu juong ka mütshuong hao jungto yangkei, haoei haoen to ngühphatbüei laukei, 5“Youli saakbü che haoeibü sek to youli saakla koukei. Haoei saakjinei youli at lamkhonga shatkei hoba youei nakmaukei hoba mühkabü aushuongei hekhümbei. 6Youli at laangnyina shatkei, hoba ladang kho yembei yuian apbei aieilausi khünei nindei atakkei. 7Lubü youli jaklaaka shatkei, hoba jakham chingkei hoba naülepbei. 8Youli at kaomaia shatkei hoba yembei, hoba saongao onko lang hekkei.” Haoei kho laukhüman phaia ngekkei, “Ao nou yembei, haoei ditashi.”

Ngühphatbü Nyekchüh

(Mt 13.10-17; Mk 4.10-12)

9Hao eikshuongei kho ngühphatbü tetlabü ai dogo hao to phekei. 10Haoei laukei, “Mühghaü Sangle huphang ngüh ngela kan la kuakei, lausikei lubü shuong toje haoenei chühkokei aditenlabü lele ngei haoen to ngühphatbüa lauda.

Jisuei Youli Saakbü Ngühphatbü Wanan Lenbü

(Mt 13.18-23; Mk 4.13-20)

11“Ngühphatbü tetlabü ho: Youli kho Mühghaü ngühlang. 12Lamkhonga atbü kho ngüh ditbü shuong. Haoen mai alemtila hoba akhümentila shanga shabü mühghaü louan haoeneibü maang- pon ka ngüh kho langkuda. 13Laangnyina atbü youli tetlabü kho haoenei ladang ditda, olinbüei ngüh kho sungletda, lausikei haoen to li üatkei; hibü haoenei longche mailemda, hoba takteibü jihsiphaia haoen atetda. 14Jaklaaka atbü youli tetlabü kho, haoenei ngüh kho ditkei, lausikei haoen haujinei, maangmau hoba nyaksinam hoba ho kaodak olinbüei naülepda, hoba lang ehekda. 15Kaomaia shatbü youli maibü tetlabü kho, müt maibü hoba lanbü shuongei ngüh kho ditkei, haoenei maangpona kaangkhühtham sungletkei hoba youman asung shongko natenda.

Kammanga Wanthung

(Mk 4.21-25)

16“Aoeikei wanthung sapan kam maanga aküplepda, ayingsi shenphanga aphoda. Lausikei chem to lotbü shuongei ngesakbü haplabü lele haoei kho wanthung anshanga phoda. 17Aishanga akhuokenlabü lele aikei huan aki hoba angelabü hoba tang akhitlabü lele aikei aki. 18Hibü kanei ai ditdaje maangkuashi; aishanga aoei ki hao la kuyolabü, hoba aoei aki, haoei ai ki dogo damda, khokei hao ka langlabü.”

Jisueibü Nyu hoba Nasishuong

(Mt 12.46-50; Mk 3.31-35)

19Haonyu si haonasi shuong hao jungto loukei, lausikei mütshang yaangbü ka hao nyangko ohauen. 20Hao to, “Kanyu si kanasi shuong tanga loakei, hoba haoenei no haüyomang sühda”, dogo laukei. 21Haoei haoen to jongaikei, “Aoyouei Mühghaü ngühlang ditda hoba khübü jungeida kho künyu hoba künasi shuong.”

Jisuei Yeinak Thaktibü

(Mt 8.23-27; Mk 4.35-41)

22Nyetche hao hoba hao eikshuong long che to atkei, hoba haoei haoen to laukei, “Senei thim kho khatko thi aedang to haukho.” Hibü haoen meimeijung likei. 23Haoen haujinei hao nyeket shikei. Hobaje thim khonei yeinak lotkei, hoba haoeneibü long deiei shenda yingsije haoen thusheda kikei. 24Haoen louan hao kangan pitikei hoba laukei, “Lenbou, Lenbou, sen nyemda.” Hao pikei hoba yei si deishou to hakkei. Kheijinei yeinak thakkei, hoba jemetshouko kikei. 25Haoei haoen to laukei, “Kaneibü mailem lan ki?” Haoen hatkei hoba maang- pangkei, hoba haoen si haoen lauyokei, “Ho ao? Haoei yei si dei la mangkei ngühkhüm kuda, hoba haoenei hao ngüha leda.”

Jisuei Shabü Sou kibü Müt che Maitibü

(Mt 8.28-34; Mk 5.1-20)

26Haoen Galil tangküng aenei kibü Gerasa kaonyek sühlangkei. 27Hao kao to lotjinei kho sangnyu kabü müt che louan hao to haüyokei. Hao to shabü sou shuong kikei hoba halokche haoei neisimei aleko kikei; hoba hao chema akiko heelaaka yepbo paikei. 28Ladang haoei Jisu hapbei, haoei ngekkei, hoba hao thedanga khüpetkei hoba ngüh yaangbüei hao to laukei, “Thükkabou Mühghaü Shou, Jisu, nyi aila ngo peksekda? Ngo ashiakoela ngei kato sudajada.” 29Aishanga Jisuei shabü soushou kho hao ka longan apla shanga ngühkhüm kukei. Hanghangko hao lapbei hoba hao yangmen hoba thüngdang namei khühan lombü phangakei phoko lekei; lausikei haoei phenbü kho thettikei hoba shabü soushouei hao yam to shian koutiko kikei. 30Jisuei hao to laukei, “Ka nyen ai?” Haoei laukei, “Juongnyu”, aieilausi shabü sou juongnyu hao to atan kikei. 31Haoenei hao to haoen thonshang akibü püngkhün to tohautikai dogo sukeijakei. 32Khünei shongha ukshuong lamshauko kiteikei; hoba shabü sou shuongei haoen khüto atla ngühkhüm kubü dogo hao to sukeijakei. Hobaje haoei sakkukei. 33Shabü sou shuong uk shuong to atkei, hoba uk shuong laanglip to nyuyoko koulangan thima shemetkei. 34Ladang lombou shuongei kho hapbei haoen satyokei hoba sangnyu si kaonyeka kho phinthonkei. 35Hobaje ai haüthükkei khüto chühla mütshuong yangbakei. Haoen Jisu jungto loukei, hoba shabü sou shuong longan apbou müt kho neisimei lean Jisu junga setan hapbei, hoba haoen hatyokei. 36Hobaje kho hapbü shuongei shabü souei lapbü müt lai khümenkei, kho haoen la lenkei. 37Gerasin kaon- yek kaijembo kibü müt pendouei haoen apyoan satla hao to sukeijakei, aishanga haoen aeibou hatenan apbei. Hibü haoen long to atkei hoba ngaikei. 38Shabü sou longan apbou müt khoei hao yoa kila sukeijakei, lausikei haoei hao to, 39“Kan chem to ngaiashi, hoba Mühghaüei ka shanga ai kümbeije kho lenashi”, dogo lauko ngaitikei. Hibü hao ngaikei hoba sangnyu pendoua Jisuei hao shanga ai kümbei kho phinthonkei.

Jisueibü Nei to Meitinyu Yaksa hoba Jairaseibü Nouyangshou

(Mt 9.18-26; Mk 5.21-43)

40Jisu longeijinei noknyühei olinko sungletkei, aishanga haoen pendouei hao chüheiko kikei. 41Sinagoga setshangbou, Jairas nyenan müt che loukei. Hao Jisueibü youa khüpetkei hoba hao to hao chemto loula sukeijakei, 42aieilausi haoei nouyangshou che ong po anthüknyi nashou kikei, hoba sao haiko kikei.

Hao haujinei noknyühei hao omlepbei. 43Hobaje yaksa che po anthüknyi sii koubüei shatko kikei, hoba saoei daktar shuong shanga saoei kibü pendou meisikei, aoeikei sao amaitien. 44Sao phaito loukei hoba haoeibü neiyik to meitikei, hoba khoyam sao sii koubü thakkei. 45Jisuei laukei, “Aoei kü to meitikei?” Aoeikei atheku, hoba Peterei laukei, “Lenbou, noknyühei no kailepan thungda.” 46Lausikei Jisuei laukei, “Atei kü to meitia; aishanga kü ka sei longa dogo ngei ngekei.” 47Ladang saoei uhuenlabü dogo ngekei, sao lühjilühko louan hao thedanga khüpetkei. Müt pendou thedanga saoei hao to aila meitikei kho wanan lenkei, hoba sao khoyam maian apbü shangabü khokan lenkei. 48Haoei sao to laukei, “Nashounyu, kaibü mailemei no maia. Haksoa ngaiashi.”

49Haoei lauko kijinei sinagog bunyu chem ka müt at louan laukei, “Kashou nouyangshou haia. Lenbou kip tejimti.” 50Jisuei kho ditkei hoba hao to laukei, “Tehüt. Maiong lemashi, hoba sao maian aplabü.” 51Ladang hao chem to loukei haoei Peter, Johan, Jakob hoba naeibü nyusibou to liman aokei hao yoa atla asakku. 52Müt pendou sao shanga manghaapbü ka haoeneibü khuku to jangngailangko haapyoko shaian kikei.

Haoei laukei, “Tühaap. Sao ühaikei; sao yepbei.” 53Sao haia dogo ngebü ka haoenei hao la nyikukei. 54Haoei saoeibü ika jenan ngekko laukei, “Nashounyu, pienashi.” 55Saoeibü soushou longeikei hoba sao khoyam pienkei. Sao la denche okashi dogo haoei sakkukei. 56Saoeibü nyusibou maangpangkei, lausikei haüthükbü kho aola alenla shanga haoei sakkukei.

Currently Selected:

LUK 8: CHANGBSI

Highlight

Copy