LUK 7
7
Jisuei Rombü Yaangbüeibü Sambü Maitibü
(Mt 8.5-13)
1Mütshuongei ditko haoei habü pendou laukhüman phaia hao Kapernaum to atkei. 2Saongao thükkabouei maangshikbü sambü che kikei; hao shatko kikei hoba hailabü lele kikei. 3Saongao thükkabouei Jisu shangabü ditkei hoba Jihudabü jaishou shuong hao jungto hautiko, haoeibü sambü püetkula loushi dogo sukeijakei. 4Haoen Jisu jungto loukei hoba hao to aeibou sukojako laukei, “Hao shanga ho kümsilei nyi kümla muakei; 5haoei kün mütli sanouda hoba kün la sinagogkei haoei dangkukei.” 6Jisu haoen yoa meimeijung haukei. Hao chem ka lalok ohauko kijinei saongao thükkabouei thangbou shuong hautiko laukei, “Yaangbou, no ailakei khon tesak, aishanga no kü chemsophang to lotla ngei amukei. 7Khoei ngo ka jungto loula ongkei amukei dogo ngei dambei; lausikei ngüh kho ong lenshi hoba kü sambü mailabü. 8Aishanga ngokei kü phanga sepai phoan songdak hau phanga kibü müt che ki. Ngei che to, ‘Khou’, dogo lauda hoba hao hauda; hoba lubü che to, ‘Kaiya’, dogo lauda hoba hao louda; hoba kü sambü to, ‘Ho kümashi’, lauda hoba haoei kho kümda.” 9Ladang Jisuei kho ditkei, hao hao to maangpangkei. Haoei hao phai sembo kibü noknyüh ae sepeikei hoba laukei, “Ngei kan to lenda, Israela mangkei ho tegü mailem yaangbü ngei ühüpou.” 10Ladang hautibü shuong chemto ngaikei haoenei sambü kho maian hapbei.
Jisuei Latnyueibü Shou Langngaitibü
11Kho phaia hao Nain nyenbü sangnyu che to haukei, hoba hao eikshuong si mütshang yaangbü che hao yoa haukei. 12Hao sangnyu bakou lousühbüsi, haibü müt che lengbakei; hao kho latnyu cheeibü jayangshou kiteikei. Hobaje sangnyu ka mütshang yaang sao yoa kikei. 13Ladang Jisuei sao hapbei haoei sao to sanouko chühkei, hoba sao to laukei, “Tühaap.” 14Hao thedang ae haukei hoba mang lengshang to meitikei, hoba pebü shuong atopeiko lokei. Haoei laukei, “Heshoubou, ngei kato lenda, pienashi.” 15Haibou kho lokei hoba joyola khangkei; hoba Jisuei haonyu la kukei. 16Müt pendou hatbüei shenkei hoba Mühghaü la nyensang kuko laukei, “Sen yoa thuseibü yaangbü che longakei, hoba Mühghaüei hao mütshuong pean chühda.” 17Hao shangabü ngühlang kho Judea khümbo hoba kaijembo kibü kaonyek pendou to aakei.
Johan Baptibou ka Ngühlang Künbü shuong
(Mt 11.2-19)
18Johaneibü eikshuongei hao la khübü pendou shangabü lenkei; hoba Johanei haoeibü eik nyi ngakei 19hoba haosi Jisu jungto, “Loula kibou kho no si ayingsi künei lubü che shanga haiteila?” dogo phela hautikei. 20Mütshuong hao jungto loukei hoba laukei, “Johan Baptibouei kün ka jungto, ‘Loula kibou kho no si, ayingsi künei lubü che shanga haiteila?’ dogo phela hautikei.”
21Kho jihsiphaia haoei shat phang phanga shatbü nyatbü hoba shabü souei shatbü juongnyu maitikei, hoba haoei nyekthubü juongnyu haptikukei. 22Haoei mütshuong to laukei, “Ngaiashi hoba kanei ai hapbei hoba ditkei kho Johan la lenashi: nyekthubü shuongei hapda, sokebü paida, imbü shuong saüenda, obangbüei ditda, haibü shuong langngaitida hoba shalebü shuong to Ngühlang Maibü songlenda; 23hoba ao kü hangshong aphaiyetda haoei haükei.”
24Ladang Johaneibü ngühlang künbü shuong ngaikei, Jisuei noknyüh to hao shangabü laukei, “Ai to chühla kan yam to haukei? Yeiei thakdu soueibü chühla si? 25Lausikei kan aito chühla haukei? Inyaibü neisimei lebü müt che to chühla sai? Aoyou lailaibü neisimei leda hoba apsilebü langkeia haangda haoen choba chema ki. 26Lausikei kan ai chühla haukei? Thuseibü che sai? Haü, ngei kan to lenda, thuseibü che to khaibou, 27Laishibaei lenbü ho hao shangabü ki:
‘Chühashi, ngeibü ngühlang künbou,
aoei ka thedanga ka lamnyu lamlelabü,
hao ka thedangto ngei hautida.’
28“Ngei kan la lenda, yaksaei bukbü yoa Johan to yaangbou aki; lausikei Mühghaü Sanglea hanbou kho hao to yaangbou ki.” 29(Ladang haoenei kho ditkei, khüm hebü shuong yoan müt pendouei Mühghaü la nyensang kukei, aishanga haoen Johan Baptibouei baptikukei. 30Lausikei haoei abaptikubü Farisi shuong si Ngühkhüm lenbou shuongeije haoen shangabü Mühghaü lamthen asunglet.)
31“Khülonga, aito ngei ho meten mütshuong takteila? Haoen ai phatkei? 32Haoen namyakshanga cheei che to ngako,
‘Künei chia teibü lauko kan la pithung metkukei, hoba kanei atom;
künei manghaap chia laukei,
hoba kanei ühaap.’
dogo lauko setbü nashousi shuong phatkei. 33Aishanga Johan Baptibou wentek ashauko hoba ih ayungko loukei hoba kanei, ‘Hao to shabü soushou kia’ dogo lauda. 34Müteibü Shou shauko yungko loukei hoba kanei, ‘Chühashi, shaumang yungmang müt, ih yungbou, khüm hebou si shabü shuongeibü thangbou’, dogo lauda. 35Lausikei songsihon kho saoeibü shousi shuongei aukabü kuenda.”
Jisu Farisibü Simon Chema
36Farisibü müt cheei hao yoa shaulayungla hao huikei; hoba hao Farisibou chem to atkei hoba setkei. 37Kho sangnyua shabü langkeia kibü yaksa che kiteikei. Saoei hao Farisibü chema shaushang yungshanga setakei dogo ngekei hoba saoei ponlem onang ninulaang thungdou che sungbakei. 38Sao hao phainei haapbo lokei, hoba saoeibü nyeksiei haoeibü you nemla khangkei. Saoei saoeibü khulouei kho haman apbukei, hoba you to shepbo, ponlem onang naangkukei. 39Ladang hao leiyetbou Farisibouei kho hapbei, haoei hao lolo laukei, “Ho müt thuseibü che tegüje hao to meitinyu kho ao hoba ailaibü sao haoei ngelabü. Sao shabü sao dogo haoei ngejan.” 40Jisuei hao to jongaikei, “Simon, ngei ka to aiche lenlabü kia.” Haoei laukei, “Lenbü, Lenbou.” 41“Lotkubou müt che la sangh thebou müt nyi kikei. Cheei nam saongao hoba cheei anjinsem thean kikei.
42“Ladang haosiei shemla ai akitei, haoei haosi ham la sangh kho apbukei. Haosi yoa aoei hao to aei sanoula?” 43Simonei jongaikei, “Sangh juongbou thebouei, dogo ngei damda.” Jisuei hao to laukei, “Kho tükde!” 44Yaksanyu aei sepeian haoei Simon to laukei, “Nyi kho yaksa hapdalao? Ngo ka chem to lotkei. Nyi kü you shanga dei aku; lausikei saoeibü nyeksiei kü you nemtikei hoba saoeibü khulouei haman apbukei. 45Nyi kü sembung to ashep; lausikei saoeije ngo lotsilengko küyou shepbü athak. 46Nyi kü khua onang anaangku; lausikei saoei kü youa ponlem naangkukei. 47Khoei ngei ka to lauda, sao shabü juongnyu kiasikei apbuda, hoba ho saoeibü sanou yaangbou aukabü ki. Lausikei ao la hansho ong amai apbuda haoei hansho ong sanouda.” 48Hobaje Jisuei sao to laukei, “Ka shabü apbuda.” 49Hao yoa shaushanga setan kibü shuongei haoen lolo laungaikei, “Shabü to liko apbulabü müt kho ao?” 50Haoei yaksanyu to laukei, “Kaibü mailemei no khümena. Haksoa ngaiashi.”
Currently Selected:
LUK 7: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
