LUK 16
16
Maanglimaangsang Ikjaibü
1Jisuei hao eikshuong to laukei, “Keibü müt che kikei hoba haoei haoeibü nyaksinam to chühbou thükkabou ikjaibü che kiteikei. Haoei bunyueibü nyaksinam apsilekuda dogo hao attiko bunyu to lenkei. 2Hibü haoei hao ngakei hoba laukei, ‘Ngei ka shangabü ditbü kho ai? Kaibü kümsilei tedtangbü weyobü kho kubü, aieilausi no touje thükkabü ikjai lela athük.’ 3Thükkabou ikjaibouei haoei lolo laungaikei, ‘Ngei tou ai kümsi maila? Ngeibü bunyuei kümsilei ngailangda. Ngo kao thula hau aki hoba ngo hishau hiyunglakei himouda. 4Ladang ngo thükkabou ikjai kümsilei ka sattilaje, mütshuongei haoeneibü chem to ngo leiyettilabü lele ngei ai kümlaje ngei ngeakei.’ 5Kheijinei haoei hao bunyu la sangh thebü shuong che chea ngakei, hoba haoei shaangbou to laukei, ‘Nyi kü bunyu la shemla sangh lajuche thekei?’ 6Haoei laukei, ‘Onang takletbü saongao.’ Thükkabou ikjaibouei hao to laukei, ‘Kaibü theyobü le sungba; hali setashi hoba anjinsem doashi.’ 7Hobaje haoei lubü che to laukei, ‘Hobaje nyikei sangh lajuche thean ki?’ Haoei laukei, ‘Youshou takyang saongao.’ Haoei hao to laukei, ‘Kaibü theyobü le sungba hoba saolei doashi.’ 8Bunyuei haoeibü maanglimaangsang, maangalanbou thükkabou ikjai sangkei; aishanga ngesakbü shousi shuong toje ho kaodak shousi shuong haoen jembü meten yoa aei sangboudobou.
9“Hobaje ngei kan to lenda, kanei kan shanga thangbou pailetla kaodak nyaksinam jungeiashi, khei yingsi ong kanei ladang kho apkhümlaje, kan thon akibü kishang to leiyetlabü. 10Ao to aeibou hanbüa maanglemenda, hao to juongnyuakei maanglemenlabü; hoba ao aeibou hanbüa ngühmaang alan, hao juongakei ngühmaang alanko ki. 11Hibü ho kaodakbü maangalanbü nyaksinam jungeibüa mangkei kan to maang alemen longa, aoei tükdebü nyaksinam jaitila kan to maang lemenla? 12Hobaje müeibüa kan to maang alemlonga, aoei kan la kaneibü kula? 13Sambü aoeikei bunyu nyi khangenla athük; aishanga haoei che mangsenlabü hoba lubü kho sanoulabü, ayingsi haoei che to maangshiklabü hoba che kho nyikulabü. Kanei Mühghaü si nyaksinam akhangenen.”
Jisuei Laubü Ngüh at
(Mt 11.12-13; 5.31-32; Mk 10.11-12)
14Nam to khambü Farisi shuongei khübü ngüh pendou ditan hao la nyikukei. 15Haoei haoen to laukei, “Kanei kan lolo müt thedanga janbü lela thükkei, lausikei Mühghaüei kaneibü maangpon ngekei; aishanga müt thedanga aeibou yaangenbü kho Mühghaü thedanga mangsenlabü.
16“Johan alou shongko Ngühkhüm si Thuseibü shuong kiteikei. Khüka jaüan Mühghaü Sangle Ngühlang Maibü kho songlena, hoba mütpem wekoei khüto atla haujemyoda. 17Lausikei Ngühkhüm ka dopem seijinbü hanbüshou che apbü toje müh si kaodak shemla sobou.
18“Aoei jembü yak to bangda hoba lubü ngada, haoei asangalanbü jungeida; hoba aoei laoei sattibü yaksa ngadaje haoei asangalanbü shonda.
Keibou hoba Lazar
19“Keibü müt che kikei. Haoeibü neisimei kho nakthüngle sakbü hoba inyaibü kiteikei, hoba chaangboua hao olinangko lemshou lemyaang kümbo kikei. 20Hobaje Lazar nyenan mouei shenbü hishau hiyungbü che haoeibü koukhüma phoyokei, 21hoba haoei keiboueibü khümsok ka atbülebü nyak shaula chüheikei; yongbou keishuong louan haoeibü mou to sekei.
22“Kheijinei hishau hiyungbü kho haikei, hoba khuthük hangangbü shuongei hao Abraham khuku to langkei. Keibou khokei haikei hoba khünkei. 23Hobaje yemsanga hao aeibou khonkuko kijinei haoei nyek longan chühkei hoba heebüa Abraham hoba haoeibü khukua Lazar hapbei. 24Haoei hao to ngakei hoba laukei, ‘Abou, Abraham, küto onoukai hoba Lazarei haoeibü ikjishou deia sheman kü lishang to sangtiko khamtikula yantikai, aishanga ngo ho wanlühei aicheküman khonsakda.’
25“Lausikei Abrahamei laukei, ‘Kü shou, no lang kijinei, nyi kaibü maiboutham hapbei dogo damenashi, hoba Lazarei kho tegü amaibou hapbei; lausikei tou hao haksoa kia, hoba no khonkua ki. 26Tokei khüto yoko, haka aoyou kan jungto haumang sühlaje athüklabü, hoba khüka kün jungto aokei loula athüklabü lele, kün si kan kanglanga thonshang akibü püngkhün yaangei aoakei.’ 27Haoei laukei, ‘Khülonga abou, hao kübou chemto hautikai dogo ngei kato sudajada, 28aishanga ngei jaisina müt ngao kia, haoei haoen to aukabü kula hautikai; khei yingsi ong haoen ho khonkushang to aloulabü.’ 29Abrahamei laukei, ‘Haoenei Mosa hoba thuseibü Lai shuong kia; haoenei khübü to ngüha nale.’ 30Lausikei haoei laukei, ‘Aying, abou Abraham; lausikei haikhün ka müt che haoen jungto ngaisije haoenei maangpon sepeilabü.’ 31Abrahamei jongaikei, ‘Haoenei Mosa hoba thuseibü shuong ngüh aditlonga, haikhün ka müt che langngaisi dogokei haoenei maialemlabü.’ ”
Currently Selected:
LUK 16: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
