LUK 17
17
Shabü
(Mt 18.6-7,21-22; Mk 9.42)
1Haoei eikshuong to laukei, “Müt shabüa phaiyettilabü kho louphangphang, lausikei ao danko khübü haüthüklaje hao shanga ügütü!
2“Hao shangaje, habü hanbü shuong yo ka che ongkei phaiyettibü khantoje, ngünjin laang che ngüma yakan si mangto tekan attibü khaibou. 3Maangsangashi! Kaibü jaisinaei shedbü shona longa, hao to hakashi, hoba hao maangpon sepeisije, hao la amai apbushi. 4Haoei chalou chenei kakhu limbo nyetnei shedbü shona longa, hoba ka jungto nyetnei longeian hao maangpon kümeda dogo kato laua longaje, nyi hao la ap kujan.”
Mailem
5Youkoikjai anthüknyi khoei Bunyubou to laukei, “Kün la mailem aei yaangtikai.” 6Jisuei laukei, “Kan to mailem yongkoshiklang tetche ongkei kisije, kanei kho pilong to laulabü, ‘Pheienashi hoba sia keashi’, hoba khoei kan ngüha lelabü.
Sambü Cheeibü Kümsilei
7“Tetlabüei kan yoa müt cheei sek moutiko ayingsi san shuong lomtiko sambü che kia. Ladang hao sek ka lunglaje haoei hao to, ‘Toutham kaiya hoba shaula yungla setashi’ dogo lauda lao? 8Aeiko haoei hao to bouje, ‘Nyak peiashi hoba ngo shauji yungjinei shombü jinkula lamleashi; kho phaia nyi lolo shaushi’, dogo alauda si? 9Hao la kümla nongkubü kümbü shanga haoei sambü nyen sangda lao? 10Kho tegü kaneikei, ladang kan la kümla nongkubü pendou kümsemlaje kanei hai laujan, ‘Kün sambü shuong; kün nyen sanglabü ai aki. Künei ai kümjan kiteikei kho künei küma.’ ”
Jisuei Imbü An Maitibü
11Hao Jerusalem to haujinei haoei Samaria si Galil kanglang ka dankei. 12#Lev 13.45-46 Hao sang che to haujinei imbü müt anei hao haüyokei. Haoenei tuisho hauan lokei 13hoba ngekkei, “Jisu! Bunyubou! Kün to onoukai!” 14Ladang haoei haoen hapbei, haoei laukei, “Hauashi hoba kan lolo ungshedbü shuong to lenashi.” Haoen haujineitham haoen maian apbei. 15Haoen yoa müt che, hao maingaibü hapan, ngüh yaangei Mühghaü la soneikangbü kuko longeikei; 16hoba Jisueibü you junga khüpetkei hoba hao nyen sangkei. Hao Samariabü kikei! 17Jisuei laukei, “Müt an pendou saüenkei ji si? Müt güje lan ki? 18Ho küksithang che hato liman Mühghaü la soneikangbü kungaila longeibü lubü ao akitei lo?” 19Hobaje haoei hao to laukei, “Pienashi hoba hauashi. Kaibü mailemei no maitia.”
Sangle Loubü
(Mt 24.23-28,37-41)
20Ladang Farisibüei hao to Mühghaü Sangle ladang loula dogo phekei, haoei haoen to jongaikei, “Mühghaü Sangle kho kanei haiyeibüei alouda. 21Haoenei, ‘Chüha, hanei kia!’ ayingsi ‘Khünei kia!’ dogo alaulabü. Aieilausi Mühghaü Sangle kho kan yoa kia.”
22Haoei eikshuong to laukei, “Kanei Müteibü Shou chalou shuong ka che ongkei hapmang sühko waanglabü jihsiphai che lousühlabü. 23Haoenei kan to laulabü, ‘Chühashi, hao khünei kia!’ ayingsi ‘Hao hanei kia!’ Tohau, haoen phai telang; 24aishanga langpon ponsi lai ji mühthon ka jinei sühko ngesakda, kho tegü Müteibü Shou haoeibü chaloua yinglabü. 25Lausikei shaangla hao aeibou khonkujan hoba ho metenei wailetlabü. 26Hobaje Noa chaloua yingbü tegü, Müteibü Shou chalouakei kho tegütham kilabü; 27Noa longchem to atbü chalou asühshongko hoba yungsen loukouan haoen pendou ashem shongko, haoenei shaukei yungkei, haoenei leiyetkei hoba haoenei laolam yaknga kuyoko loukei. 28Kho tegü ong, Lot chaloua kibü tegü yinglabü: mütshuongei shaukei hoba yungkei, jekkei hoba yaakkei, kekei ongkei hoba chem dangko kikei; 29#Kao 19 lausikei Lot Sodom ka satnyet khuthük ka wan hoba wanlong lotkei hoba haoen pendou shembei. 30Kho tegü ong Müteibü Shou tang khitlabü chalouakei kilabü. 31Kho chaloua müt che chemdaka kialonga hoba haoeibü peisilei chemanga kialonga, haoei khübü sungla ayanjan, hoba kho tegü ong ao seka khüpan kilaje haokei khüpeian toung. 32Loteibü yak damenashi. 33Ao mütei haoeibü langkei püetla haujemdaje kho maulabü, lausikei aoei jembü langkei maulaje haoei kho püetlabü. 34Ngei kan la lenda, khüyou yepshang chenei müt nyi kilabü, che leilanglabü, lubü che kho phoyolabü. 35Yaksa nyi chela shem shiko kilabü; che leilanglabü, hoba che kho phoyolabü. 36(Müt nyi sek chenei kilabü; che leilanglabü hoba lubü che kho phoyolabü.)” 37Haoenei hao to jongaikei, “Lanei, Bunyubou?” Haoei haoen to laukei, “Lanei haibü mang ki khünei hogon shuong takshatlabü.”
Currently Selected:
LUK 17: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
