LUK 18

Latnyu si Matjembü shangabü Ngühphatbü

1Haoei haoen to athakko welaulabü hoba ladangkei hau athetlabü shangabü ngüh- phatbü che lenkei. 2Haoei laukei, “Sangnyu chenei matjembü che kikei, haoei Mühghaü to ühüt hoba ao mütlakei soumo aku. 3Kho sangnyua latnyu che kikei, hoba sao hao jungto hai lauko loutang lekei, ‘Kü dangbou khulimbo kü la mat jembushi.’ 4Longcheje haoei tokngaikei, lausikei kho phaia haoei hao lolo laukei, ‘Ngei Mühghaü to ühütsikei hoba müt la soumo akusikei, 5ho latnyuei ngo khonsaktidabü ngei sao mat jembulabü.’ ” 6Jisuei laukei, “Asaopobü matjembouei ai laudaje ditashi. 7Kholongaje Mühghaüei, chalou nangnak alauko ngekbü haoeibü pienbü shuong la ngühmaia mat ajembulep lo? Haoen to thuila hao kit khaiakei si? 8Ngei kan la lenda, haoei haoen pü lekuko tongde mat jembulabü. Lausikei, ladang Müteibü Shou loulaje kheijinei haoei kaodaka mailem haplep sai?”

Farisibou si Khüm Hebou Ngühphatbü

9Müt atei jembü saopobüa maang leman lubü shuongje pendou nyikuko jungeikei, khoei khübü to haoei tokei ho ngüh- phatbü lenkei: 10“Müt nyi lembü- chem to welaula angkei, che kho Farisibü hoba lubü che kho khüm hebou. 11Farisibou kho loan jembü lolo hai welaukei, ‘O Mühghaü, ngo lubü mütshuong tegü, aeilam aeiphopbü, maangalanbü, asang- alanbü ayingsi ho khüm hebou tegü ongkei ayingbü shanga ngei ka nyen sangda. 12Ngei bale chenei nyinei mühei nyengda, ngei hapbü pendou ka an phejan kuda.’ 13Lausikei khüm hebou heebüa lokei. Haoei khuthük ae chühangtila ongkei maang üang, lausikei haoeibü khüklang to jangngailangko laukei, ‘O Mühghaü, ngo shabü müt to onoukai.’ 14Ngei kan la lenda, che khütoje ho Mühghaü thedanga janbü hapan haoeibü chem to yankei; aishanga aoei jembü lolo tonenlaje hao hanlabü, lausikei aoei jembü lolo handa hao tonenlabü.”

Jisuei Nashou Hanbü shuong Haükubü

(Mt 19.13-15; Mk 10.13-16)

15Hao la meititila shanga mütshuongei nashou hanbü shuong to luko hao jungto leibako kikei; lausikei ladang eikshuongei kho hapbei, haoenei khübü leibabü shuong to hakkei. 16Lausikei Jisuei nashousi shuong leibala shanga haoen ngakei hoba laukei, “Nashousi shuong kü jungto loutiashi. Haoen teshilet, aishanga Mühghaü Sangle kho haoen tegübü shangabü ki. 17Maimaitham ngühmaia ngei kan to lenda, aoyouei Mühghaü Sangle nashou hanbü che tegü asungletlaje haoei khüto üetenlabü.”

Keibou

(Mt 19.16-30; Mk 10.17-31)

18Jihudabü leiyeibü cheei hao to phekei, “Lenbou maibou, pon- pen langkei hapla shanga ngei ai kümla?” 19Jisuei hao to jongaikei, “Nyi aila kü to maibou dogo ngada? Mühghaü to limanje aokei maibü aki. 20Nyi ngühkhüm shuong ngeakei: Asangalanbü teshon, Tehaiti, Tekok, Amlangbü ngühchung teku.” 21Müt khoei jongaikei, “Ngei khübü pendou kho ngo nashoua thama jungeia.” 22Ladang Jisuei kho ditkei haoei hao to laukei, “No tokei cheei aonkei; nyi kibü pendou yakashi hoba nam kho shalebü shuong la jankuashi, hoba nyi khuthüka nyaksinam kilabü; hoba kaiya hoba kü phai semshi.” 23Lausikei haoei kho ladang ditkei hao aeibou maangto shatkei, aishanga hao aeibou keian kikei. 24Jisuei hao aeibou maangto shatko hapan laukei, “Nyaksinam kibü shuong shanga Mühghaü Sangle to atlabü ho latetche sekkei! 25Keibüei Mühghaü Sangle to atkhoulabü khantoje nidku khün to ut shetlangbü sobou.” 26Kho ditbü danei laukei, “Kholonga ao ong khümenla?” 27Haoei laukei, “Müt shanga athükaminlabü kho Mühghaü shangaje thüklaminlabü.” 28Peterei laukei, “Kün shangakei lai? Künei küneibü chemsibung apyoa hoba ka phai sema.” 29Haoei haoen to laukei, “Maimaitham ngühmaia ngei kan to lenda, aoyouei Mühghaü Sangle shanga jembü chem, yak, jaisinasi shuong, nyusibou ayingsi shousi apyoa, 30haoen la toubü ho kaodak hanei aei phopan ashemmailabü ao aki, hoba loulabü metena ponpen langkei haplabü.”

Jisuei Hao Hailabü shangabü Semboula Lenbü

(Mt 20.17-19; Mk 10.32-34)

31Jisuei Anthüknyi kho leilangkei hoba haoen to laukei, “Ditashi, sen Jerusalem to angda, hoba Müteibü Shou shangabü thuseibü lea doan kibü pendou loushadlabü, 32aishanga hao Küksithang la khümbo kuan aplabü, hoba hao la nyikulabü, himou bautilabü hoba eokei thuoklabü; 33haoenei hao semeilabü hoba hao haitilabü, hoba sembounyeta hao langngailabü.” 34Lausikei haoenei khübü kho che ongkei aditen; kho ai ngühtet laukei haoenei ange hoba kho ai lauda haoenei adamen.

Jisuei Nyekthubü Hishauhiyungbü Maitibü

(Mt 20.29-34; Mk 10.46-52)

35Jisu Jerikho sühlamto, nyekthubü müt che lamkoa hishauko setan kikei. 36Ladang haoei mütshang danbü ditkei, haoei kho ai yingkeije dogo phekei. 37Haoenei hao to Nazaretbü Jisu danda dogo lenkei. 38Kheijinei haoei ngekkei, “Dawid Shou Jisu, kü to onoukai.” 39Hobaje thedanga paibü shuongei alementila shanga hao to hakkei, lausikei haoei aei kaangbou ngekkei, “Dawid Shou Jisu, kü to onoukai.” 40Jisu lokei hoba müt kho hao jungto leibala ngühkhüm kukei. Ladang hao nyangko loukei haoei hao to phekei, 41“Nyi kü la ka shanga ai kümtimang sühda?” Haoei laukei, “Yaangbou, kü la nyibou haptikai.” 42Jisuei hao to laukei, “Khei yingashi. Kaibü mailemei no maia.” 43Haoei khoyam hapngaikei hoba Mühghaü la soneikangbü kuko hao phai sembei. Ladang haoenei kho hapbei mütshuong pendouei Mühghaü nyen sangkei.

Currently Selected:

LUK 18: CHANGBSI

Highlight

Copy