LUK 20

Jisueibü Hau shangabü Phebü

(Mt 21.23-27; Mk 11.27-33)

1Nyetche, Jisu Lembüchema mütshuong la lenko hoba Ngühlang Maibü songlenko kijinei, thükkabou ungshedbü shuong hoba Ngühkhüm lenbou shuong jaishou shuong yoa liko loukei, 2hoba hao to laukei, “Nyi habü ho ai hauei kümdaje kün la lenbü. Ho hau aoei kala kukei?” 3Haoei haoen to jongaikei, “Ngeikei kan ka ngüh che phelabü: Küla lenbü, 4Johaneibü baptibü kho khuthük ka si müt ka?” 5Haoenei haoen yoa hai lauko joyokei, “Senei ‘Khuthük ka’, dogo laualonga, haoei, ‘Kanei aila hao to maialem?’, dogo laulabü. 6Lausikei senei ‘Müt ka’, dogo laualonga mütshuong pendouei sen to laangei sonlabü; aishanga Johan kho thuseibü che yingkei dogo haoenei mailema.” 7Kho lakabü yingkeije haoenei angekei dogo haoenei jongaikei. 8Jisuei haoen to laukei, “Hobaje ngei habü kho ai hauei kümdaje ngei kan to alenda.”

Semlühlaaka Khüpbü shuong Ngühphatbü

(Mt 21.33-45; Mk 12.1-12)

9Haoei mütshuong la ho ngühphatbü lenkei: “Müt cheei semlühlaak lekei hoba sekham la lela moubü shuong la apyokuan kaonyek saabü to jih lounyu shanga satkei. 10Jih sühbüa, khei sekmoubü shuongei hao la semlühlaak ka mai at nakua dogo sambü che koutikei; lausikei sekmoubü shuongei hao ngümeikei hoba ik kong ngaitikei. 11Tokei haoei lubü sambü che koutikei; lausikei haoenei haokei ngümeikei hoba himou bautiko jungeikei hoba ik kong ngaitikei. 12Tokei haoei semboubü sambü che koutikei; lausikei haoenei haokei leilutikei hoba shian sattikei. 13Semlühlaak bunyuei laukei, ‘Ngei ai kümla? Ngei ngei sanoubü hoba jayangshou koutilabü. Haoenei hao to soumo hatlabü.’ 14Lausikei ladang sekmoubü shuongei hao hapbei, haoenei haoen yoa joyoko laukei, ‘Phet- phanbou kho ho ki; kho phet senei lelabü lele senei hao haitiakho.’ 15Hobaje haoenei hao semlühlaak ka shian sattikei hoba haitikei.

“Hibü semlühlaak bunyuei haoen to ai kümla? 16Hao loulabü hoba haoei khübü sekmoubü shuong kho shemtilabü, hoba semlühlaak kho lubü la kulabü.”

Ladang haoenei kho ditkei haoenei laukei, “Kheinyuje touma!” 17Haoei haoen to chühkei hoba laukei, “Kholonga ho Laishiba ngühtet ai:

‘Chemdangbü shuongei laobou laang ale kho chemnyek laang la yeikei’?

18Ao kho laang thüka atlaje hao netla yeilabü, hoba ho ao thükto lotlaje hao thamngu la yeiko ngünyinlabü.”

Khüm Kubü shangabü Phebü

(Mt 22.15-22; Mk 12.13-17)

19Kho jih khüneitham Ngühkhüm lenbou shuong si ungshedbou shuongei hao to ik shatla lameikei, lausikei haoen mütshuong to hatkei; aishanga haoei kho ngühphatbü haoen khulimbo laukei dogo haoenei ngekei. 20Haoenei jihsiphai maibü che chüheikei, hoba haoenei hao haoeibü ngüha mintilabü hoba governor hau hoba songdak hau la hao khümbo kuan apla shanga, aeibou lanan lenko kokpheibü dan litikei. 21Haoenei hao to phekei, “Lenbou, nyi laubü hoba lenbü kho tükde dogo künei ngekei, hoba nyi the to chühko akümda, lausikei ngühmaia Mühghaü lam shanga lenda; 22künei Kaisar la khüm kujan si akujan?” 23Haoei haoeneibü kok lapenkei hoba haoen to laukei, 24“Kü la sempak che lenbü. Ho aoeibü noksa hoba ao nyen dokei?” Haoenei laukei, “Kaisareibü.” 25Haoei haoen to laukei, “Kholongaje Kaisareibü Kaisar la kuashi hoba Mühghaüeibü Mühghaü la kuashi.” 26Haoenei mütshuong thedanga haoei laubü ngüh ka lapoula athükko kikei; haoei jong- aibü ngüh to haoen maang- pangkei hoba ngüh üangko apbei.

Haibü ka Langngaibü shangabü Phebü

(Mt 22.23-33; Mk 12.18-27)

27Haibü ka alangngaida dogo laubü Sadukibü at loukei hoba hao to phekei, 28“Lenbou, jaisina müt nyi kian che youyik akiko haialonga, na khoei latnyu kho leiyetjan hoba haojai shanga chemdang haatikujan dogo Mosaei kün shanga dokukei. 29Tou jaisina müt nyet kiteikei. Jaishoubouei yak che ngakei hoba shousi akiko haikei. 30Hobaje nyiboubüei 31hoba semboubüei sao lekei; kho tegü müt nyet khümboei sao ngakei; haoenei shousi akitei hoba haikhümbei.

32“Thonla yaksa khokei haikei. 33Nyibou langngaibüa sao kho aoeibü yak yingla? Aishanga haoen nyet pendouei sao yakla lekei.” 34Jisuei haoen to laukei, “Ho kaodakeibü shousi shuongei chem kanda hoba laolam yaknga kuyoda, 35lausikei aoyouei loulabü kaodak pailetla shanga hoba haibü ka langngaila muan ki haoenei chem akanda ayingsi laolam yaknga akuyoda. 36Maimaitham haoen haila athükkei, aishanga haoen khuthük hangangbü shuong tegü ki, hoba haibü ka langngaibüa phejan lebüei haoen Mühghaü shousi shuong ki. 37Lausikei haibü ka langngaibü shanga Mosaeikei wanlong buham shangabü Laia haoei Bunyubou kho Abraham Mühghaü, Isak Mühghaü hoba Jakob Mühghaü dogo lenakei. 38Mühghaü kho haibüeibü aying lausikei langkeibü Mühghaü ki; hao to müt pendou lang kida.” 39Ngühkhüm lenbou shuong yoa atei jongaikei, “Lenbou, nyi tükde laua”; 40aishanga haoenei hao ka aei phela maangei asom.

Khrista shangabü Phebü

(Mt 22.42-46; Mk 12.35-37)

41Haoei haoen to laukei, “Haoenei lai küman Khrista kho Dawideibü Shou dogo lauda? 42Dawidei mangkei Nyensang chia lea lauda,

‘Bunyubouei ngeibü Bunyubou to lenkei,

43ngei kaibü dangbou shuong ka you nakshang

la ayeiti shongko kü mae aenei setshi.’

44Hibü Dawidei hao to Bunyubou dogo ngada; kholonga hao laibü hao shou yingla?”

Jisuei Ngühkhüm Lenbou shuong Khulimbo Lenbü

(Mt 23.1-36; Mk 12.38-40)

45Haoei mütshuong pendouei ditko hao eikshuong to lenkei, 46“Ngühkhüm lenbou shuong, aoyouei nei loubü lean paimang sühda hoba namyak namseishanga salem maikuda, sinagoga thükkabou setshang hoba lemalanga setshang maiboutham kimmang sühda, 47aoyouei latnyueibü peisilei khümbuda hoba hela- haangla loubang welauda, haoen to maangsangashi; haoenei shedsikhau yaangbou haplabü.”

Currently Selected:

LUK 20: CHANGBSI

Highlight

Copy