LUK 21

Latnyuei Lembü

(Mt 12.41-44)

1Haoei chühantikei hoba keibü danei haoeneibü jongsak lembüchem namphot to jinko hapbei. 2Haoei akialebü latnyu cheei poisa penyi jinko hapbei; 3hoba haoei laukei, “Ngühmaia ngei kan la lenda, ho shalebü latnyuei haoen pendou to juongbou jina, 4aishanga khübü pendou kho haoen kibü keibü ka jinkei, lausikei ho yaksaei sao shalejongle ka saoeibü langkei shanga kibü pendou jinkukei.”

Jisuei Lembüchem Leilulabü shanga Laubü

(Mt 24.1-2; Mk 13.1-2)

5Haoen yoa atei lembüchem hoba hemaibü laang shuong hoba lembüsabüei he maitibü shanga lauyoko kikei. Haoei laukei, 6“Kanei chühko kibü habü shuong shanga laang che thüka che alusakko thenan akilabü lele chalou che loulabü.”

Khonsak hoba Shieikoe

(Mt 24.3-14; Mk 13.3-13)

7Haoenei hao to phekei, “Lenbou, khübü kho ladang ong yingla? Hobaje khübü loushadlamto amaaphilabü ai yingla?” 8Haoei laukei, “Kan ayingbü to aleilangtila maangsangashi. Aishanga kü nyena, ‘Ngo hao’, hoba ‘Pienbü jihsiphai kho süha’, dogo lauko loulabü. Haoen phai tesem. 9Lausikei ladang kanei wapyosuyo hoba bangku sakku ditlaje temok. Khübü shaang haüthükjan, lausikei thonbü khoyamje alousühlabü.” 10Kheijinei haoei haoen to laukei, “Phangei phang khulimbo hoba sangleei sangle khulimbo lolabü; 11selo kaang nyilabü hoba kaoen kaoena mühsinou hoba shatsinyat limsilang kilabü; müha hatlalühlabü hoba amaaphilabü yaang kilabü. 12Lausikei khübü pendou ühaüthükjinei mütshuongei kan lamlabü hoba shieikoelabü; haoenei kan sinagog to khümbo kuan aplabü hoba kan thünglabü; kü nyen shangabüa kan choba shuong hoba governor shuong jungto leibalabü. 13Kan shanga aukabü kula kho jihsiphai maibü yinglabü. 14Jongaila shanga jihsiphai asühjinei lamlela tedamei, 15aishanga kaibü dangbou aoeikei tokngaila ayingsi khulimbo alauenlabü lele kan la ngüh hoba songsido kulabü. 16Kan nyusibouei, jaisinaei, chempenei hoba jenabou shuongei khümbo kuan aplabü, hoba haoenei kan at haitilabü. 17Kanei kü to ngüha lebü shanga müt pendouei kan mangsenlabü. 18Lausikei kaneibü khu ka khulou pemche ongkei amaulabü. 19Thon sühko natenbü danko hanei kaneibü langkei pailetlabü.

Jisuei Lembüchem Leilulabü shangabü Lenbü

(Mt 24.15-21; Mk 13.14-19)

20“Ladang kanei sepai shuongei Jerusalem kaijeman haplaje, kheijinei kanei sao leilulabü jihsiphai süha dogo ngeashi. 21Aoyou Judea a kilaje haoen shongh to satashi; sangnyu maanga kibü shuongei apyoan satashi, hoba aoyou batak aian kilaje haoen sangnyu to tütngai; 22aieilausi khübü kho kayang chalou shuong ki; haoen Laishiba ngüh pendou loushadtila shanga loukei. 23Khübü chaloua shia künan kibü ayingsi senyopbü yaksa shuong shanga ügütü! Aishanga kaonyeka khonku yaang hoba ho mütli thüka Mühghaü maangshat yaang kilabü. 24Haoen inlouei tuonglabü, haoen phang pendou to lang senlabü, hoba Küksithangeibü pienbü chalou aloushad shongko Jerusalem kho Küksithangei nakeila lelabü.

Müteibü Shou Loubü Chalou

(Mt 24.29-31; Mk 13.24-27)

25“Chanyu, litnyu hoba khanshoulitshoua amaaphilabü kilabü hoba kaonyudaka phangshuong si hoba deishou ngühyobü langhei maang ngouan shempotham khonsakyolabü; 26mütshuongei kaodaka haüthükko loubü hatlabü to chühan maang litilabü, aishanga khuthükbü sei kho nyaakeilabü. 27Kheijinei haoenei Müteibü Shou sangmeia sei hoba soneikangbü yaanga louko haplabü. 28Ladang khübü haüthükla khanglaje, chühangtiashi, ngüm shingan chühashi, aieilausi kaneibü khümenbü nyangko louda.”

Bhuklong ka Ditletbü

(Mt 24.32-35; Mk 13.28-31)

29Haoei haoen la ngühphatbü che lenkei: “Bhuklong hoba lubü bunyu pendou to chühashi. 30Haoen pik nyemshang longsi lengko, aoei alensikei kanei khüto chühan sulang nepda dogo kanei ngeda. 31Kho tegü kanei ladang khübü haüthükko haplaje Mühghaü Sangle nyangko lousüha dogo ngeashi. 32Ngühmaia ngei kan to lenda, habü ho pendou aloushad shongko ho meten adanlabü. 33Khuthük si kaodak dankhümlabü, lausikei kü ngüh ladangkei adanlabü.

Pianleman Kijan

34“Yaübükotbü, ihjaakbü hoba ho langkei maangdühei kaneibü maangpon atsheile ayeitila maangsangashi. Kho Chalou kho kan thükto hakde alottila shanga maangsangashi, 35aishanga kaonyudaka kibü pendou thükto ho tin che tegü shemletlabü. 36Pianleman kiashi, loushadlabü kibü khübü pendou ka satenlabü, hoba Müteibü Shou thedanga loenlabü lele, jihsiphai pendoua welauko kishi.”

37Chaloua haoei lembüchema lenkei, hoba nangnak hao Oliv shongh shui dogo laubü shongh khünei yepbo kikei. 38Mütshuong pendouei lembüchema hao ka ditla shanga enyu pian hao jungto louko kikei.

Currently Selected:

LUK 21: CHANGBSI

Highlight

Copy