LUK 3

Johan Baptikuboueibü Songlen

(Mt 3.1-12; Mk 1.1-8; Jn 1.19-28)

1Kaisar Tiberia songdak po anthük ngaoboubüa, Pontia Pilat Judeaa governor kijinei, Herod Galila tetrark, haona Filip Itumia si Trakonitaa tetrark, hoba Lusania Abilena tetrark kiteikei. 2Ana si Kaifa nyi thükkabü ungshedbou kiteikei. Kho jihsiphaia yama Zekharia shou Johan jungto Mühghaü ngüh loukei. 3Haoei Jordan kaijembo kibü kaonyek pendou ae shabü ap haplabü shanga maangpon sepeiko baptila songlenko haukei. 4#Isa 40.3-4 Isaia thuseibü lea doan kibü tegü:

“Yama cheei ngekbü ngüh,

‘Kanei Bunyubou Lamnyu lamleashi,

hoba haoeibü youlam tangshaitham kümashi;

5kaonop pendou shenlabü, hoba shongh hoba

shonghshou pendou yenlabü,

nongbü kuokbü kaoen tangshaibü lam la yeilabü

hoba tokbü khuongbü lam lenglengtham yeilabü;

6hoba khunak shousi pendouei Mühghaü khümenbü haplabü.’ ”

7Haoei hao la baptitila loubü mütshuong to laukei, “Kan pinyu shousi shuong, loulabü maangshat ka satenla kan to aoei thungeikei? 8Kan tükde maang- pon sepeiakei dogo kaneibü thechühei lenenashi; hoba kan lolo, ‘Abraham küneibü bou kia’ dogo telau, aishanga ngei kan to lenda, Mühghaüei habü laang shuong ka Abraham shousi shuong longtila thükakei. 9Tokei wou kho bunyu chungthema thenakei. Laobou bunyua lang maibü eheklaje khoje aklabü hoba wan to jinlabü.”

10Noknyühei hao to phekei, “Khülonga künei ai kümla?” 11Haoei haoen to jongaikei, “Aoei mangyuk nyi ki haoei akibou to janyoashi, hoba aoei shausiyung ki haoeikei khei kümashi.” 12Khüm hebü shuongkei baptitila loukei hoba haoenei hao to laukei, “Lenbou, künei ai kümjan?” 13Haoei haoen to laukei, “Ngühkhümei sakkubü to liman tehe.” 14Sepai shuongeikei hao to phekei, “Hobaje küneikei ai kümjan?” Haoei haoen to laukei, “Ao kakei nam tukosekko teso ayingsi amlangbüei mü tüatti; kaneibü muei maanghaiashi.”

15Hobaje mütshuongei chüheiko kijinei, hoba müt pendouei Johan shangabü jembü maang- pona hao Khrista yinglaoma dogo dambo kijinei, 16Johanei haoen pendou to jongaikei, “Ngei maimaitham kan deia baptikuda, lausikei kü to hau kibou, aoeibü nguoklüh sengkula ngo amu, hao louada. Haoei kan Soushou Saopobü hoba wanei baptikulabü. 17Haoeibü amshang maisho saüenla hoba jembü nyak bunga thansheila shanga hao ika wan jungakei; lausikei haoei sho shuong ladangkei anyetbü wan to jinlabü.”

18Kho yoa lubü ngüh juongei haoei mütshuong thungeijangeiko songlenkei. 19Lausikei haoei Herod tetrark, haonaeibü yak Herodia aoa, hoba haoei kümsilei amaibü kümbü pendou shanga hakeikei. 20Tokei Herodei Johan thüngdang to jinkotham yongbou amaibou kümbei.

Jisu Baptibü

(Mt 3.13-17; Mk 1.9-11)

21Ladang müt pendou baptikhümbei Jisukei baptikei, hoba hao welauko kijinei, müh ipbei 22hoba Soushou Saopobü dukutuk phatko lotan hao to pakkei. Khuthük ka ngüh cheei joyoko laukei, “No ngei sanoubü Jayangshou. Ngei kato aeibou maanghaida.”

Jisu Thensilen

(Mt 1.1-17)

23Jisuei hao po khujin onjinei haoei jembü khangenbü kümsilei khangkei; dambü tegütham hao Josef shou kiteikei:

Heli shou Josef, Mathat shou Heli, 24Levi shou Mathat, Malkhai shou Levi, Janai shou Malkhai, Josef shou Janai, Mathatia shou Josef, 25Amos shou Mathatia, Nahum shou Amos, Esli shou Nahum, Nagai shou Esli, Maat shou Nagai, 26Mathatia shou Maat, Semein shou Mathatia, Josek shou Semein, Joda shou Josek, Joanan shou Joda, 27Resosa shou Joanan, Zerubabel shou Rhesa, Shealtiel shou Zerubabel, Neri shou Shealtiel, Melkhei shou Neri, 28Adi shou Melkhi, Kosam shou Adi, Elmadam shou Kosam, Er shou Elmadam, Joshua shou Er, 29Eliezer shou Joshua, Jorim shou Eliezer, Mathat shou Jorim, Levi shou Mathat, Simeon shou Levi, 30Judas shou Simeon, Josef shou Judas, Jonam shou Josef, Eliakim shou Jonam, Melia shou Eliakim, 31Mena shou Melia, Matatha shou Mena, Nathan shou Matatha, Dawid shou Nathan, Jesse shou Dawid, 32#Isa 11.1-2 Obed shou Jesse, Boaz shou Obed, Salmon shou Boaz, Nashon shou Salmon, Aminadab shou Nashon, 33Admin shou Aminadab, Arni shou Admin, Hezrion shou Arni, Perez shou Hezron, Jihuda shou Perez, Jakob shou Jihuda, 34Isak shou Jakob, Abraham shou Isak, Tera shou Abraham, Nahor shou Tera, Serug shou Nahor, 35Reu shou Serug, Peleg shou Reu, Eber shor Peleg, Shela shou Eber, Kenan shou Shela, 36Arfashad shou Kenan, Shem shou Arfashad, Noa shou Shem, Lamek shou Noa, Methusela shou Lamek, 37Enok shou Methusela, Jared shou Enok, Mahalalel shou Jared, Kenan shou Mahalalel, Enosh shou Kenan, 38Seth shou Enosh, Adam shou Seth, Mühghaü shou Adam.

Currently Selected:

LUK 3: CHANGBSI

Highlight

Copy