LUK 4

Jisu Takteibü

(Mt 4.1-11; Mk 1.12-13)

1Jisu Jordan ka Soushou Saopobüei shenko longeikei. Hao Soushouei 2chalou saonyi leiyeijinei shabü mühghaüei hao takteikei. Khübü chaloua haoei aikei ashau, hoba ladang khübü chalou onkei, hao mühei haiko kikei. 3Kheijinei shabü mühghaüei hao to laukei, “No Mühghaü Shou longa, ho laangei wentek la yeitiashi.” 4Jisuei hao to jongaikei, “Laishibaei lauda, ‘Mütei wentek lansanei lang akilabü.’” 5Shabü mühghaüei hao leijung angkei hoba insing che kanglanga hao la kaodak sangle pendou lenkei, 6hoba haoei hao to laukei, “Ngei kala habü sangle soneikangbü hoba ho songdak hau pendou kulabü; aishanga ho kü la kua, hoba ngei ho ngei pienbü che la kula thükakei; 7hibü nyi ngo lema longa ho pendou kaibü yinglabü.” 8Jisuei hao to jongaikei, “Laishibaei lauda, ‘Nyi Bunyubou kaibü mühghaü ong lemjan hoba hao ong khangenjan.’” 9Haoei hao Jerusalem to leilangkei hoba hao lembüchem chemkhu thüka settikei hoba hao to laukei, “No Mühghaü Shou longa, no lolo haka atashi; 10aishanga Laishibaei lauda, ‘Haoei khuthük hangangbü no thounoula yantilabü, 11hoba ka you laang chenei ongkei akühtila haoenei no haoeneibü ikmaanga tonletlabü.’ ” 12Jisuei hao to jongaikei, “Ho lauakei, ‘Nyi Bunyubou ka Mühghaü tetaktei.’” 13Hobaje ladang shabü mühghaüei hao takteibü penkei, haoei hao tuisho shanga apyokei.

Jisuei Galila Haoeibü Kümsilei Khangbü

(Mt 4.12-17; Mk 1.14-15)

14Jisu Soushou Saopobü seia Galil to ngaikei; hoba hao shangabü ngühlang kaijembü kaonyek pendou ae aakei. 15Haoei haoeneibü sinagoga lenkei hoba müt pendouei hao sangkei.

Jisu Nazareta Asungletbü

(Mt 13.53-58; Mk 6.1-6)

16Hao inthonshang Nazaret to loukei, hoba hao hanghangbü tegü hao Nounyet sinagog to atkei; hoba hao wela lokei. 17Isaia thuseibü tulai hao la kukei, hoba ladang haoei kho sengkei, haoei ho doan kishang hapbei:

18 # Isa 61.1 “Bunyubou Soushou kü thüka kia,

aieilausi shalebü to ngühlang maibü

songlenla haoei ngo naangenko pienkei;

thüngdang kabü shuong la litibü ngühlang si nyekthubü to nyek khittibü

ngühlang ngekletla, hoba naklepbü

la solo kuko litila,

19 # Isa 61.2 hoba Bunyubouei maangshikbü po

ngekletkula haoei ngo hautikei.”

20Hobaje Jisuei tulai kho tungaian khangenbou la kungaikei hoba setkei; hoba sinagoga kibü pendoueibü nyek hao to thekei. 21Haoei haoen to laukei, “Tat ho Lai kaneibü noukhüna loushada.” 22Hobaje pendouei hao shangabü aukabü kukei hoba haoeibü sembung ka longbü onou ngüh to maangpangkei. “Ho Josef shou aying si?” dogo haoenei laukei. 23Haoei haoen to laukei, “Küla ho tetentanbü ngüh laukulabü, ‘Maitibou, no lolo maiashi’, hoba laulabü, ‘Ai ong nyi Kapernauma kümbü künei ditkei, kho hanei jembü kaoakei kümashi.’ ” 24Haoei laukei, “Ngühmaia ngei kan to lenda, thuseibü aokei jembü kaodaka asungletda. 25Ngei kan la shangashatko lenda, Elija jihsiphaia Israela ladang po sem lit lak müh khinkei, hoba ladang kaodak pendoua mühsinou longkei, khonei latnyu juong kiteikei; 26#1 Cho 17.9-24 lausi dogokei Elija Sidon kaonyek ka Zarepta latnyu to liman ao jungtokei ohauti. 27Elisha thuseibü jihsi- phaia Israela imbü juongnyu kikei lausikei Siriabü Naman to liman ao amai.” 28Hobaje haoenei habü ngüh ditjinei sinagoga kibü shuong pendou khauangkei. 29Haoen loenkei, sangnyu ka shian sattikei hoba laobou shong- ha haoeneibü sangnyu sangan kikei, kho küngkhüm to hao hangkosuko koulangtila shanga leian haukei; 30lausikei hao haoen kanglang ka shetlangkei hoba satkei.

Shabü Sou kibü Müt Che

(Mk 1.21-28)

31Hobaje hao Galila Kapernaum sangnyu che to loukei, hoba Nounyet haoen la lenkei.

32Haoei lenbüa haoen maang- pangkei, aieilausi haoei laubü khonei hau thonan kikei. 33Hobaje sinagoga asaopobü shabü mühghaü soushouei lapbü müt che kikei. Haoei ngüh yaangei ngekkei, 34“Nazaretbü Jisu, nyi kün to ai kümmang sühda? No kün shemtila loukei sai? No aoje ngei ngeakei: No Mühghaüeibü Saopobou kho ki.” 35Jisuei haoen to phangko laukei, “Alemenko hao ka longan apashi!” Kheijinei shabü sou khoei hao lembüchem jenyua phetettikei, hoba hao aleilutiko longan apbei. 36Haoen pendou maang- pangkei, hoba cheei che to laukei, “Haoei laubü kho ai? Aishanga haoei hau hoba sei yoan asaopobü soushou shuongla ngühkhüm kuda hoba haoen longan apda.” 37Hobaje hao shangabü lauyobü kaijembü kaonyek pendou ae phinthonko haukei.

Jisuei Müt Juongnyu Maitibü

(Mt 8.14-17; Mk 1.29-34)

38Haoei sinagog apyokei hoba Simon chem to atkei. Simoneibü yakeibü nyu mangbokei aeibou khonkuko kikei, hoba sao shangabü haoenei hao to joyokukei. 39Sao thedanga loan haoei mangbok to phangko laukei, hoba khoei apyokei. Sao khoyam laksepbei hoba nongnaeko haoen la oknyinkei.

40Chanyu nepbo kijinei shat phang pendouei shatbü hao jungto pendouei leibakei. Haoei haoen mütpem weko to ikei shangetkei hoba haoen maitikukei. 41Shabü soushou shuongkei, “No Mühghaü Shou” dogo ngekyoko longan apbei. Haoei haoen to phangko joyokei hoba haoen la laula shanga asakku, aieilausi hao Messia yingkei dogo haoenei ngekei.

Jisuei Sinagoga Songlenbü

(Mk 1.35-39)

42Ladang lang ngekei haoei apyokei hoba sangliphang kaoen che to haukei; lausikei noknyühei hao lameiko kikei. Haoen hao jungto loukei, hoba haoenei hao haoen jungka asattila haujembei; 43lausikei haoei haoen to laukei, “Lubü sangnyu shuongakei ngei Mühghaü Sangle Ngühlang Maibü songlenjan. Ho shanga ong ngo hautikei.” 44Hobaje haoei Jihuda sinagog shuonga lenkei.

Currently Selected:

LUK 4: CHANGBSI

Highlight

Copy