LUK 5

Jisuei Shaangbou Eikshuong Ngabü

(Mt 4.18-22; Mk 1.16-20)

1Ladang noknyüh hao kaijembo aüyoko loukei hoba Mühghaü ngühlang ditkei, hao Genesaret thim junga loan kikei, 2hoba haoei long nyi thimkoa senenan hapbei. Lausikei ngaulapbü dan khübü ka longan haoeneibü tak sakko hapbei. 3Hao long che to atkei, laobou Simoneibü kiteikei, hoba hao to long kho deiko ka leilila phekei. Hao setkei hoba noknyüh la long ka lenkei. 4Ladang haoei joyokhümbei haoei Simon to laukei, “Dei haübü aedang to long leiliashi hoba kaneibü takshuong mangto ngaulapla tekashi.” 5Simonei jongaikei, “Langyang sünga künei kümbeileikei hoba ai alap, lausikei nyi laualonga ngei takshuong teklabü.” 6Ladang haoenei khei kümbei haoenei ngau juongnyu seilepbei, hoba haoeneibü tak jitthetla khangkei. 7Haoenei lubü longa kibü haoeneibü eikjambü shuong louan thuiyola ik lepan lenko ngakei. Haoen sühlangkei hoba long nyi ham ngauei shensije long shuong mangto atla khangkei.

8Ladang Simon Peterei kho hapbei haoei Jisueibü youa khüpetko laukei, “Kü jungka bangashi Bunyubou, aieilausi ngo shabü müt.” 9Aishanga ngau juongnyu lapbei, hao hoba hao jambou shuong pendou maang- pangan apbei, 10hoba tokei Zebedi shou nyi, Jakob si Johan, aonyi Simon to thujambü shuong kiteikei, maangpangan shembei. Jisuei Simon to laukei, “Tehüt; tou ka jaüan nyi müt laplabü.” 11Haoenei long kaomai to leibakei, pendou apyokei, hoba hao phai sembei.

Jisuei Imbü Che Saüenkubü

12Hao sangnyu chenei kijinei nyetche imei shenan müt cheei hao hapbei. Haoei Jisu thedanga the khüman khüpetkei hoba sukojako laukei, “Yaangbou, nyi maang angsije nyi ngo saüenkula thükkei.” 13Jisuei hao ik shingan hao to meitiko laukei, “Ngei maangangda; no saüenashi.” Kheijineitham imei hao apyokei. 14Jisuei hao la ngühkhüm kuko laukei, “Aolakei telen, lausikei hauashi hoba no lolo ungshedbou la lenashi, hoba haoen to aukabü shanga Mosaei sakkubü tegü no saüenkubü shanga lemashi.” 15Lausikei hao shangabü ngühlang aei aei phinthonko haukei, hoba noknyüh yaang hao ngüh ditla hoba haoeneibü shat maila shanga takshatkei; 16lausikei hao sangliphang to satkei hoba welaukei.

Jisuei Phei Haibü Maitikubü

(Mt 9.1-8; Mk 2.1-12)

17Nyetche haoei lenko kikei. Galil, Judea hoba Jerusalem ka loubü Farisi hoba Ngühkhüm lenbou shuongkei khünei setan kikei; hoba maitilabü shanga Bunyubou sei hao yoa kikei. 18Kheijinei mütshuongei tuokshatei shatbü müt che shena lengbakei hoba hao Jisu thedanga lengan phokula haujembei. 19Mütshang hangjong haoenei atla athüksije haoen chemdak to nguikei, hoba laangkhüh khünyet danko haoeibü shen yoa jenyu to Jisu thedang to hao tonyantikei. 20Haoeneibü mailem hapan haoei hao to laukei, “Thangbou, ka shabü apbua.” 21Ngühkhüm lenbou shuong si Farisibü shuongei damngeilangko laukei, “Mühghaü nyikuko laubü müt kho ao? Mühghaü to liman aoei shabü apbula thükkei?” 22Jisuei haoeneibü maangpona wetyobü ngekei hoba jongaikei, “Kanei aila kaneibü maangpona dameida? 23‘Ka shabü apbua’ laubü sokei si, ayingsi, ‘Pienashi hoba paiashi’, dogo laubü sokei? 24Lausikei kaodaka Müteibü Shou la shabü apbula hau kia dogo ngei kan la lenlabü.” Hobaje haoei tuokshatei shatbü to laukei, “Ngei lenkho ditashi: pienashi, kaibü shen peashi hoba chem to ngaiashi.” 25Hao haoen thedanga phühde pienkei, hoba ainei hao yepbei kho haubakei, hoba Mühghaü la soneikangbü kuko chem to ngaikei. 26Hobaje haoen pendou maangpangkei, hoba Mühghaü la soneikangbü kukei, hoba haoenei aeibou hatko laukei, “Tat senei maangpanglabü hapa.”

Jisuei Levi Ngabü

(Mt 9.9-13; Mk 2.13-17)

27Kho phaia hao satkei hoba haoei Levi nyenbü khüm hebou che heshang chema setan hapbei, hoba haoei hao to laukei, “Küphai semashi.” 28Haoei pendou apyoan loenkei hoba hao phai sembei.

29Hobaje Jisu shanga Leviei hao chema lem yaang huiletkei, hoba khonei khüm hebü shuong mütshang yaang hoba lubü shuong dogo haoen yoa nyak shaushanga setan kikei. 30Farisi hoba haoeneibü Ngühkhüm lenbou shuongei hao eikshuong khulimbo nyamnyambo laukei, “Aila kanei khüm hebü si shabü shuong yoa shaudayungda?” 31Jisuei haoen to jongaikei, “Maisho kibü shuong shanga ayingko shatbü shuong shanga daktar khamda. 32Saopobü shuong ayingko shabü shuong maangpon sepeibü to ngala ngo loukei.”

Mühei Nyengbü shangabü Phebü

(Mt 9.14-17; Mk 2.18-22)

33Müt atei hao to laukei, “Johaneibü eikshuong hoba Farisi shuongei hanghangleko nyengko welauda: lausikei ka eikshuongei shauda yungda.” 34Jisuei haoen to laukei, “Kanei chemkanbou haoen yoa kian chemkanbou thangbou shuong mühei nyengtila thükkei sai? 35Lausikei chemkanbou haoen yo ka ngailanglabü, kheijinei haoenei mühei nyenglabü.”

36Haoei haoen la ngühphatbü che lenkei: “Aoeikei nei haanbü ka jitan nei hangbüa athipda; khei kümsije khoei nei haanbü ka jitan sungbü kho hangbü to abaulabü. 37Hobaje aoeikei ih haanbü phekhon shongmok hangbüa atakda; khei kümsije ih khoei phekhon shongmok kho thalabü. Hobaje kho saangkhümlabü, hoba phekhonkei leilulabü. 38Lausikei ih haanbü kho phekhon shongmok haansangmai to jinjan. 39Hobaje aoeikei ih hangbü yungan phaiaje haanbü amangsühda aishanga haoei lauda, ‘Hangbü kho ong maibou.’ ”

Currently Selected:

LUK 5: CHANGBSI

Highlight

Copy