SAN LUCAS 13

Peeya peyemongeta ikavimbae vae pepɨa pe oï vae

1Jare amogüe joko pe ñogüɨnoi vae reta omombeu Jesús pe kërai Pilato oyukauka amogüe Galileaɨgua reta, jare jae omboyea jugüɨgüe mɨmba oyeyukagüe omee Tumpa pe vae ndive.

2Jayave Jesús jei chupe reta: “Güɨramoi pe reta peyemongeta kuae reta oiporara, iyoa yae opaete ïru Galileaɨgua reta güi ramo. 3Che jae peve, jökoraiä ko. Pe reta mbaetɨ peeya yave peyemongeta ikavimbae vae pepɨa pe oï vae, pekañɨteita vi ko. 4Ani jókuae dieciocho vae reta re osururu oɨvate Siloé pe jare opa oyuka vae, ¿peyemongeta pa jókuae reta iyoa yae opaete Jerusalén pe yogüɨreko vae reta güi? 5Che jae peve, jökoraiä ko. Pe reta mbaetɨ peeya yave peyemongeta ikavimbae vae pepɨa pe oï vae, pekañɨteita vi ko.”

Ɨva iambae re oyembojaanga vae

6Jayave Jesús jei vi chupe reta ombojaanga reve: “Metei kuimbae güɨnoi iuvarupa pe metei ɨva. Ojo tëi oeka ɨva ia, ërei mbaetɨ oväe chupe.#Is 5.1-7; Jer 2.21; 8.13. 7Jayave jei iko pe oparavɨkɨ chupe vae pe: ‘Mase, mboapɨ año ma ayu tëi aeka kuae ɨva ia jare mbaetɨ aväe chupe. Eyasɨa. Opɨ̈roiño ma ɨvɨ güɨnoi.’

8Jayave kó pe oparavɨkɨ vae jei kó iya pe: ‘Cheya, emaeño topɨta kuae año pegua. Tayoo räri iyɨpɨ rupi jare tañono kavararepoti iyɨpɨ re. 9Javoi ia yave, ikavi ko. Ërei mbaetɨ ia yave, eyasɨauka.’ ”

Jesús ombogüera kuña ara mbutuu pe

10Jesús oporomboe oï metei judío reta itupao pe ara mbutuu pe. 11Jare joko pe oï metei kuña dieciocho año ma aña omombaerasɨ vae. Ikupeatɨ oguata, mbaetɨ etei ipuere kërai ave yepe oyembosɨmbi. 12Jesús oecha yave, oenɨi jei chupe:

—Kuña, rekuera ma ko ndembaerasɨ güi.

13Jayave Jesús oñono ipo jese. Jare jupivei jókuae kuña ipuere oyembosɨmbi kavi jare omboɨpɨ omboete Tumpa.

14Ërei judío reta itupao pegua tenondegua iyarasɨ Jesús oporombogüera ara mbutuu pe ramo,#Ex 20.9-10; Dt 5.13-14. jei joko pe ñogüɨnoi vae reta pe:

—Ova ara ko oï yaparavɨkɨ vaerä. Peyu jókuae ara reta pe pekuera vaerä. Agüɨye peyu pekuera vaerä ara mbutuu pe.

15Jayave yandeYa jei chupe:

—Jova mókoi vae reta. ¿Pe reta peyoraä pa peraja pemboɨu pegüeye ani pemburika ara mbutuu pe? 16Mase, kuae kuña Abraham iñemuña pegua ko. Ërei Satanás dieciocho año ma omombaerasɨ. ¿Mbaetɨta pa jaekavi oyembogüera vaerä kuae mbaerasɨ güi ara mbutuu pe?

17Jesús jei kuae yave, opaete jovaicho reta imara. Ërei opaete vae reta oyerovia opaete mbae ikavi yae Jesús oyapo vae re.

Mostaza jäɨgüe

(Mt 13.31-32; Mc 4.30-32)

18Jesús jei: “¿Mbae ra yambojaangata Tumpa iporookuaía re? ¿Mbae re ra ambojaangata? 19Yambojaanga metei mostaza jäɨgüe, metei kuimbae güɨraja oñotɨ iko pe vae re. Okuakuaa jare oyeapo ɨvɨra tuichagüe. Jare güɨra reta yogüeru oyapo jaitɨrä jese.”

Mbɨyape imbovúa

(Mt 13.33)

20Jare jei ye chupe reta: “¿Mbae re ra ambojaangata Tumpa iporookuaía? 21Yambojaanga jese mbɨyape imbovúa. Kuña omboyea jókuae mbɨyape imbovúa veinte kilo trigokúi ndive yave, opaetei ombovu vae rami ko.”

Öke ipɨmii vae

(Mt 7.13-14,21-23)

22Jare Jesús ojo ramboeve Jerusalén kotɨ, oasa tëta guasu reta rupi jare tëta raɨ reta rupi oporomboe reve jokoropi. 23Jayave metei vae oparandu Jesús pe:

—CheYa, ¿mbovɨ yae pa oyemboasaukata vae?

Jare jei chupe reta:

24—Peñemomɨ̈rata peike vaerä öke ipɨmii vae rupi. Echa che jae peve, jeta vae oipota tëita oike, ërei ngaraa ipuere. 25Echa o iya oyokenda ma yave öke, pe reta pepɨtata oka pe. Jayave pembopu tëita öke jare pereta: “OreYa, oreYa, eipea öke oreve.” Ërei jae jeita peve: “Che mbaetɨ pokuaa.” 26Jayave pemboɨpɨta pere: “Rokaru nderóvai, jare nde reporomboe oreroka guasu reta rupi.” 27Ërei jae jeita peve: “Che jae peve, che mbaetɨ pokuaa. Pesɨrɨ chegüi opaete pe ikavimbae#Sal 6.8. iyapoa reta.” 28Jayave peyaeota jare peräi pembokɨrɨrɨuta.#Mt 22.13; 25.30. Peecha yave Abraham, Isaac, Jacob jare opaete ñeemombeúa reta Tumpa iporookuaía pe ñogüɨnoi. Ërei pe reta ikatu pe peïta. 29Yogüeru retata opaete ketɨ ketɨ güi, jare oguapɨ retata mesa pe Tumpa iporookuaía pe.#Mt 8.11-12. 30Ërei pemaendúa kuae re: Amogüe añave oñemomichi vae ombotenondeta ko, jare oyembotuicha vae ombotaɨkueta.#Mt 19.30; 20.16; Mc 10.31.

Jesús ipɨatɨtɨ yae Jerusalén re

(Mt 23.37-39)

31Jókuae ara yogüeru Jesús oïa pe amogüe fariseo reta, jare jei reta chupe:

—Ekua kuae güi, echa Herodes oipota ndeyukauka.

32Jayave Jesús jei chupe reta:

—Pekua pere jókuae aguara pe, kërai ambosɨrɨta aña reta oya jese vae reta güi jare ambogüerata imbaerasɨ vae reta añave jare pɨareve. Jare kóeramo opata ma cheparavɨkɨ. 33Añete ko, ikavi ko aja añave, pɨareve jare kóeramo Jerusalén kotɨ. Echa mbaetɨ ko jaekavi metei ñeemombeúa omano vaerä ïkotɨa Jerusalén güi.

34¡Jerusalén! ¡Jerusalén!, reyuka ñeemombeúa reta. Reyapi reyuka ita pe Tumpa ombou ndekotɨ vae reta. Jeta vese chekɨ̈reɨ tëi amboatɨ ndeipo reta, uru omboatɨ imembɨ reta ipepo igüɨ pe rami, ërei nde mbaetɨ reipota. 35Mase, pero reta opata oyemboai opɨta pegüi. Che jae peve, ngaraa ma chereecha pere regua: “Toyemboeteuka yandeYa jee re ou vae.”#Sal 118.26.

Currently Selected:

SAN LUCAS 13: GUABD

Highlight

Copy