SAN LUCAS 14

Kuimbae jete iruru vae

1Jare metei ara Jesús ojo oike metei fariseo reta itenondegua jo pe okaru vaerä jae ndive, ara mbutuu pe. Jare fariseo reta oipïaro ñogüɨnoi Jesús. 2Jare Jesús oecha joko pe metei kuimbae jete iruru vae. 3Jayave Jesús oparandu mborookuai re oporomboe vae reta jare fariseo reta pe:

—¿Jupi pa yaporombogüera vaerä ara mbutuu pe?

4Ërei jae reta kïriiño. Jayave Jesús oñono ipo kuimbae imbaerasɨ vae re jare ombogüera. Jare jei chupe ojo vaerä. 5Jayave Jesús jei jókuae fariseo reta pe:

—Pemburika ani pegüeye oasavi yave ɨvɨkua pe ara mbutuu pe,#Mt 12.11. ¿mbaetɨ pa jupivei peo penoe joko güi?

6Jare jae reta mbaetɨ ipuere mbae jei Jesús pe kuae regua.

Omomora oguapɨ tenda tenondegua pe vae regua

7Jesús oecha kërai opaete oyeparea chupe vae reta oiparavo tenda tenondegua ikavi vae. Jayave jei chupe reta ombojaanga reve:

8—Kia oparea ndeve yave mendaa pe, agüɨye eguapɨ tenda tenondegua ikavi vae pe. Echa güɨramoi o iya oparea vi ïru imboetea yae ndegüi vae pe. 9Jare o iya güeruta jókuae imboetea yae vae reguapɨa pe, jare jeita ndeve: “Emee kuae kuimbae pe nderenda.” Jayave nde nemara reve reota reguapɨ tenda taɨkuegua ete vae pe. 10Ërei, o iya oparea ndeve yave, ekua eguapɨ tenda taɨkuegua ete vae pe, oparea ndeve vae ou yave jei vaerä ndeve: “Chevɨa-ïru, easa eguapɨ tenda tenondegua ikavi vae pe.” Jökorai reyemboeteukata mesa pe ñogüɨnoi nde ndive vae reta jóvai.#Pr 25.6-7. 11Echa oyembotuicha vae, oñemomichiukata ko. Jare oñemomichi vae, oyembotuichaukata ko.#Pr 29.23; Mt 23.12; Lc 18.14.

12Jayave Jesús jei oparea vae pe:

—Reipota yave reporomongaru, agüɨye eparea ndevɨa-ïru reta pe ani nderɨkeɨ ani nderɨvɨ reta pe, ani nerëtara reta pe, ani nerëta-ɨpɨ pegua oikokatu vae reta pe. Echa jae reta ipuere vi oparea ndeve, jökorai yave jekovia ma ko ndeve. 13Ërei reipota yave reporomongaru, eparea paravete vae reta pe, ipo jovaichombae reta pe, iköcho vae reta pe jare jesambae vae reta pe. 14Jökorai yave, reyerovia katuta. Echa jae reta ngaraa ipuere omboekovia ndeve. Ërei jekoviata ndeve jupi vae reta oikove ye yave.

Arete guasu re oyembojaanga vae

(Mt 22.1-10)

15Jare metei jae ndive oguapɨ oï mesa pe vae kuae oendu yave, jei Jesús pe:

—Oyeroviata ko, Tumpa iporookuaía pe okaruta vae.

16Jayave Jesús jei chupe:

—Metei kuimbae oyapo arete tuichagüe jare oparea jeta vae pe. 17Tembíu oyɨ ma yave, omondo jembiokuai jei vaerä jókuae oparea chupe vae reta pe: “Peyu, oñeñono ma tembíu mesa pe.” 18Ërei opaete metei rami oyeopia reta, tenondegua ete jei: “Oime agua chekorä ajata amae jese. Jáeramo mbaetɨta chepuere aja. Ere ndeya pe iñɨ̈ro vaerä cheve.” 19Jare ïru vae jei chupe: “Oime agua pandepo yoayu güeye. Ajata amboaporova reta. Jáeramo mbaetɨta chepuere aja. Ere ndeya pe iñɨ̈ro vaerä cheve.” 20Jare ïru vae jei chupe: “Amenda ramo ete. Jáeramo mbaetɨta chepuere aja.” 21Jayave tembiokuai ou ye iya pe jare omombeu chupe opaete kuae regua. Jayave iya iyarasɨ reve jei jembiokuai pe: “Ekua jarembae voi opaete oka guasu jare kaye rupi, jare eru kuae pe paravete vae reta, ipo jovaichombae reta, iköcho vae reta jare jesambae vae reta.” 22Oyapo ma yave jökorai, tembiokuai jei iya pe: “Cheya, ayapo ma cheokuai rami, ërei oimeño ïru vae reta jendarä.” 23Jayave iya jei chupe: “Ekua opaete tape rupi jare kó päu rupi jare eru nderupíe reväe chupegüe, tɨnɨe vaerä chero. 24Echa che jae peve, mbaetɨta metei ave jókuae tenonde voi aparea chupe vae reta okaru chemesa pe.”

Yavai yae ko Cristo jupíe yaiko vaerä

(Mt 10.37-38)

25Jare jeta vae yogüɨraja Jesús jupíe. Jayave jae oyerova omae jese reta jare jei chupe reta: 26“Oime yave kia oipota ojo cherupíe vae, ërei ombotenonde yave tu, ichɨ, jembireko, imichia reta, tɨkeɨ jare tɨvɨ, jeindɨ jare jae etei oyembotenonde yave, ngaraa ipuere oiko cheremimboerä.#Mt 10.37. 27Jare kia nunga vae mbaetɨ ovoɨ ikurusu ojo vaerä cherupíe vae, ngaraa ipuere oiko cheremimboerä.#Mt 10.38; 16.24; Mc 8.34; Lc 9.23; Jn 12.24. 28Echa oime yave pegüi reta kia ikɨ̈reɨ oyapo o ɨvate vae, ¿oguapɨtaa pa oipapa mbovɨ ra jepɨta vae, oikuaa vaerä ikorepoti oupitɨta ra opa oyapo vaerä? 29Echa güɨramoi oñono güire iguapɨka, jare ipuereä opa oyapo yave, opaete oecha vae reta oyoyaita jókuae kuimbae. 30Jei retata: ‘Kuae kuimbae omboɨpɨ tëi omopüa o ɨvate, ërei ipuereä opa oyapo.’ 31Ani metei mburuvicha guasu ikɨ̈reɨ yave ojo oñeraro ïru mburuvicha guasu ndive, ¿oguapɨta räriä pa oyemongeta kavi, ipuereta ra jókuae diez mil isundaro reta ndive omoamɨri jókuae veinte mil sundaro ndive oporepeña ikotɨ vae? 32Jare oecha mbaetɨta ipuere jovaicho re yave, mombɨrɨ vɨteri jovaicho güi oï ramboeve, omondota jekovia pe omoñera agüɨye vaerä oñeraro jae ndive. 33Jökorai vi, oime yave kia pepɨte pe opaete imbaembae mbaetɨ oeya vae, ngaraa ipuere oiko cheremimboerä.

Yukɨ jembochɨmbae

(Mt 5.13; Mc 9.50)

34‘Yukɨ ikavi ko. Ërei jembochɨä ma yave, ¿mbae ra pa ikavita? 35Ikaviä etei ma mbaerä ave. Ɨvɨ peguarä ani, ɨtɨapɨ peguarä ave. Yamombo vaeräño ikavi. Oipota oyeapɨsaka vae toyeapɨsaka.’ ”

Currently Selected:

SAN LUCAS 14: GUABD

Highlight

Copy