SAN LUCAS 15

Vecha okañɨ vae regua

(Mt 18.10-14)

1Jayave oyemboatɨ Jesús oïa pe opaete mburuvicha peguarä okovara vae reta jare jeko ikavimbae vae reta. 2Jayave fariseo reta jare mborookuai re oporomboe vae reta iñeenguru jese, jei reta:

—Kuae kuimbae oñemoïru jeko kavimbae vae reta ndive, jare okaru jae reta ndive.#Lc 5.29-30.

3Jayave Jesús jei chupe reta ombojaanga reve: 4“Metei kuimbae güɨnoi cien vecha, jare omokañɨ yave metei, ¿ngaraa pa oeya ñuu pe jókuae noventa y nueve vae, jare ojo oeka jókuae okañɨ vae oväe chupe regua? 5Jare oväe yave, ovoɨ güeru ye iyatiɨ re#Is 40.11; Ez 34.11-12; Jn 10.1-16; Heb 13.20. oyerovia yae reve. 6Jare ou ye oväe yave jëta pe, omboatɨ ivɨa-ïru reta jare jëta-ɨpɨ pegua reta, jare jei chupe reta: ‘Peyerovia che ndive. Echa aväe ye chevecha okañɨ vae.’ 7Che jae peve, jökoraiño vi ara pe oimeta yerovia tuichagüe metei iyoa vae oeya yave iyemongeta ikavimbae vae ipɨa pe oï vae. Jókuae noventa y nueve jupi vae reta güi. Jókuae mbaetɨ mbae jeko pegua oyepoepɨ vaerä vae reta.

Reare okañɨ vae re oyembojaanga vae

8Ani metei kuña güɨnoi yave payandepo reare, omokañɨ yave metei, ¿ngaraa pa omoendɨ mechero, jare otupei opaete o rupi, oeka kavi reve oväe chupe regua? 9Jare oväe chupe yave, omboatɨ opaete ivɨa-ïru reta jare jëta-ɨpɨ pegua reta, jare jei chupe reta: ‘Peyerovia che ndive. Echa aväe ye reare amokañɨ vae.’ 10Che jae peve, jökoraiño vi ara pe oimeta yerovia tuichagüe Tumpa iaraɨgua reta pe metei iyoa vae oeya yave iyemongeta ikavimbae vae ipɨa pe oï vae.”

Kunumi opa mbae omokañɨtei vae

11Jei vi chupe reta: “Metei kuimbae güɨnoi mókoi taɨ. 12Jare taɨ taɨkuegua vae jei tu pe: ‘Cheru, emee voi mo cheve mbaembae reeyata chembaerä vae.’ Jayave tu omboyao imbaembae taɨ reta pe. 13Jayave mbovɨ ara rupi taɨ taɨkuegua vae opa omboatɨ imbaembae jare ojo mombɨrɨ ambuae ɨvɨ pe. Joko pe opa omokañɨtei iyeugüi opaete imbaembae, iyapirai reteiño vae rupi. 14Jare opaetei ma omokañɨtei iyeugüi yave, ou karuai tuicha vae jókuae ɨvɨ pe, jare jae mbaetɨ ma mbae güɨnoi jou vaerä. 15Jayave ojo oyemboya metei kuimbae jókuae ɨvɨ pegua re. Jare jókuae kuimbae omondo jɨmbarókai pe oyangareko vaerä kuchi reta re. 16Jare kunumi oipota tëi oyemoangapɨɨ ɨvope kuchi reta jou vae re. Jare mbaetɨ kia ave omee chupe mbae jou vaerä. 17Jayave ou oyemongeta, jare jei iyeupe: ¡Cheru jëta pe, omombaravɨkɨ vae reta jeta güɨnoi jou vaerä! Ërei che kuae pe cheyukata ma yɨmbɨaɨ. 18Taja ye kuae güi cheru pe jare tae chupe: ‘Cheru, cheyoa ma Tumpa kotɨ jare ndekotɨ. 19Mbaetɨ ma jupi aiko vaerä nderaɨrä. Taiko nderembiokuairä.’ 20Jayave oyerova ye tu jëta kotɨ.

Ërei mombɨrɨ peve tu oecha jare oiparareko. Jayave tu osɨi oövaiti taɨ, oiküava jare oovapɨte. 21Jayave taɨ jei tu pe: ‘Cheru, cheyoa ma Tumpa kotɨ jare ndekotɨ. Mbaetɨ ma jupi aiko vaerä nderaɨrä.’ 22Ërei tu jei jembiokuai reta pe: ‘Peru temimonde ikavi vae pemondeuka chupe. Jaeramiño vi peñono moäka-vera ipoäka re jare pɨapaa ipɨ re. 23Jare peru toro taɨrusu vae ikɨra vae peyuka. Yakaru jare yayapo arete. 24Echa kuae cheraɨ omano vae rami ko cheve, ërei añave oikove ye ma cheve. Okañɨ chegüi, ërei añave oñeväe ye ma.’ Jare omboɨpɨ reta omboarete.

25Jare taɨ tenondegua vae oparavɨkɨ oï ko pe. Jare ou ye ma köiño jëta güi yave, oendu oyemimbɨ jare opɨrae ñogüɨnoi o pe vae. 26Jayave oenɨi metei tu jembiokuai jare oparandu chupe mbae ra ko jókuae oendu vae. 27Jayave tembiokuai jei chupe: ‘Nderɨvɨ ko ou ye, jare nderu oyukauka toro taɨrusu vae ikɨra vae, taɨ ou ye ikavi oväe ramo.’ 28Jayave taɨ tenondegua vae iyarasɨ jare mbaetɨ oipota oike o pe. Jayave tu oë o güi jare omoñera oike vaerä. 29Jayave jei tu pe: ‘Mase, jeta año ma ayeokuai ndeve. Jekuaeño ayapo ndeporookuai. Ërei mbaetɨi remee cheve kavara raɨ yepe, avɨa vaerä chevɨa-ïru reta ndive. 30Ërei kuae nderaɨ opaiño omokañɨtei ndembaembae kuña iyaguasa pota vae reta re vae ou ye yave, reyuka chupe toro taɨrusu vae ikɨra vae.’

31Jayave tu jei taɨ pe: ‘Cheraɨ, nde ko reiko avei che ndive, jare opaete chembae ndembae ko. 32Ërei ikavi ko yayapo arete jare yayerovia. Echa kuae nderɨvɨ omano vae rami ko cheve, ërei añave oikove ye ma cheve. Okañɨ chegüi, ërei añave oñeväe ye ma.’ ”

Currently Selected:

SAN LUCAS 15: GUABD

Highlight

Copy