Ezekela 11
11
Yerusalem Wà Mó Lé Hkyak Jéyáng Râ Hkyô
1Haú hkûn, Sô gi, ngo lé bún mù, buìhtoq hkyam shut hu tô é, haû Yhûmsîng Garaî é yhûm mâ é hkum shut shuî ló ri. Hkum haú má byù í xe ngo yuq nyi tô ri; haú bâng chyáng, Azura é yhang zo Yazani-a eq Benai-a é yhang zo Pelati-a nhik le bo lom tô é lé ngò myang ri; yhángnhik gi, ming zaû nhik nghut akô. 2Haú hkûn, haû Yhûmsîng Garai gi, ngo lé, “Byù zo ê, byù shí bang gi, wà shî lé, a ge é hkyô htûng mù, agè ashop é hpàqchyî byi bang nghut akô. 3‘Ngá-nhúng gi, yhûm saí râ ahkyíng a jé shi; wà shî gi, mingdam au nghut mù, ngá-nhúng gi, sho nghut nyi lhê.’ ga yhángmòq taî bum akô nghut ri. 4Haû mù, byù zo ê, yhángmòq lé htuqhtîng é myìqhtoi htoi aq; myìqhtoi htoi aq.” ga taî ri.
5Haú hkûn, haû Yhûmsîng Garaî é Sô ngá chyáng jé mù, ngò taí râ dang lé Yhang taî kyô é gi, “Haû Yhûmsîng Garai shî su ga taî ri; Isira-elaq a-myû mâ é hkyô-u shê bang ê, núngmòq gi, haû su ga taí bekô nghut kôlhang, Ngò gi, núngmòq é myìt má lúng é lhúnglháng lé sê lhê. 6Núngmòq gi, wà shî má byù myo myo sat pyám mù, wà hkyô pé má màng lhoqpyíng bekô nghut ri.
7Haû mù, haû Ahko Ahkáng lhúnglháng wó Sû Yhûmsîng Garai shî su ga taî ri; núngmòq dú pyâm tô é màng pé gi, sho nghut mù, wà shî gi, mingdam au nghut ri; nghut kôlhang, Ngò gi, núngmòq lé wà shî mai hkat htoq pyám râ nghut lhê. 8Núngmòq gi, shâm lé gyùq bum akô; haû mù, Ngò gi, núngmòq lé htuqhtíng râ matú shâm jé nhâng râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 9Ngò gi, núngmòq lé, wà shî mai hkat htoq mù, gó-mîng byu pê é lòq má àp byî pyám luî, núngmòq lé hpu zo nhâng râ nghut é mara dam byi râ nghut lhê. 10Núngmòq gi, sham èq sat lheq pyâm é hui kôrâ nghut lhê; Ngò gi, núngmòq lé Isira-elaq é maukyo pé má târâ jéyáng râ nghut lhê. Haú hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê. 11Wà shî gi, núngmòq é matú mingdam au dùt râ a nghut; núngmòq le mingdam au hkaû mâ é sho dùt kôrâ a nghut; Ngò gi, núngmòq lé Isira-elaq é maukyo pé má târâ jéyáng râ nghut lhê. 12Haú hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê; hkâsu mù gâ le, núngmòq gi, Ngá é hkunmó pé lé a cháng kô é htoq agó, Ngá é târâ pé lé le a cháng kut kômù, núngmòq é awui ayàm mâ é byù myû wui é nyì yàp htûngli lé shèq cháng bekô nghut ri.” gâ ri.
13Haû mù, ngò myìqhtoi htoî nyi é u, Benai-a é yhang zo Pelati-a shi byùq bê nghut ri. Haú hkûn, ngò gi, myòqdong ngóm gòp luî, “Goì ê! Ahko Ahkáng lhúnglháng wó Sû Yhûmsîng Garai ê! Nàng gi, Isira-elaq a-myû mâ é nyi myìt gyó tô é bang lé, lhúnglháng lhoqhtên pyám râ nghut lhê lhú?” nghû htê mó èq wùt garû ngau é nghut lhê.
Isira-elaq Byu Pé Dum Taû Lò Râ Matú Htûm Tô É Danghtum
14Haû Yhûmsîng Garaî é mungdang ngá chyáng jé é gi, 15“Byù zo ê, Yerusalem wà mó mâ é byu pé gi, náng é gu-mang shúm zung byùq é bang eq gótû Isira-elaq byù bànshoq bang eq séng luî, ‘Yhángmòq gi, haû Yhûmsîng Garai eq wê gâng byùq bekô; shí mau lé gi, ngá-mòq sing é maumyî dùt râ matú ngá-mòq lé byî to bê nghut lhê.’ ga taî akô nghut ri.
16Haû mù, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; yhángmòq lé Ngò mau we mâ é byù myû wui chyáng nhang kat mù, mîngdán pé má lhoqpyo hâng kat kôlhang, Ngò gi, yhángmòq jé é mîngdán pé má, yhángmòq é matú, sân-yúng jowò byam dùt byi râ nghut lhê.’ nghû taí aq.
17Hau htoq agó, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, byù myû wui chyáng mai núngmòq lé shuî tsîng yù mù, núngmòq lé lhoqpyo hâng kat é mîngdán pé mai shuî taû lò luî, Isira-elaq mau lé dum àp byi râ nghut lhê.’ nghû le taí aq.
18Yhángmòq gi, hau má taû jé lô mù, haú mâ é agòt a-u é hparà lhô azòng pé eq achaq achyut é hparà hpôlhô pé lé huî sêng pyám râ nghut lhê. 19Ngò gi, yhángmòq lé, rading ralhum za dùt é i-myìt kat byi mù, yhángmòq chyáng sô asik kat byi râ nghut lhê; Ngò gi, yhángmòq chyáng mai lùqgòk i-myìt lé huî sêng pyám byi mù, gùngsho i-myìt kat byi râ nghut lhê. 20Haú hkûn, yhángmòq gi, Ngá é hkunmó pé lé cháng mù, Ngá é târâ pé lé rago châng so kôrâ nghut lhê. Yhángmòq gi, Ngá é byu pé dùt kôrâ nghut mù, Ngò gi, yhángmòq é Garai Gasang dùt râ nghut lhê. 21Nghut kôlhang, yhángmòq é agòt a-u é hparà lhô azòng pé eq achaq achyut é hparà hpôlhô pê htâng châng é i-myìt bò bâng é yubàk mara lé gi, Ngò, yhángmòq é ulhum htoq má jé nhâng râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.” gâ ri.
22Haú hkûn, ayàm má lhêngchap tsing jòq tô é hkerubim pé gi, yhángmòq é dùng pyo kat jáng, Isira-elaq é Garai Gasâng é hpungwup shingkang gi, yhángmòq é ahtoq má jòq tô ri. 23Haû Yhûmsîng Garaî é hpungwup shingkang gi, wàhkaû mai toq ló luî, wà buìhtoq hkyam mâ é bùm htoq má ló nô tô ri. 24Sô gi, haû Garai Gasâng é So èq byî é shing-rán má, ngo lé bún yû mù, Babelon byu pê é mau má shúm zung nyì bâng chyáng shuî jé e ri.
Haú hkûn, ngò myang é shing-rán gi, ngá chyáng mai toq ló byùq bê nghut ri; 25Ngò gi, haû Yhûmsîng Garai mai ngo lé tûn shit é lhúnglháng lé, shúm zung nyì bâng chyáng taî kyo bê nghut lhê.
Currently Selected:
Ezekela 11: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
